Ձեր վստահելի աղբյուրը

Նախօրեին Հայաստանի նախագահի նստավայրի մոտ բողոքի ակցիա իրականացրած Վանաձորի մանկատան նախկին սան Թագուհի Քոչարյանը ուշ երեկոյան վերադարձել է Վանաձոր: Թագուհին Panorama.am-ի թղթակցի հետ զրույցում ասաց, որ ակցիայի ժամանակ, երբ լրագրողները լուսանկարում էին իրեն, նամակների ընդունման բաժնից մեկը մոտեցել է և խնդրել դատական սխալները բոլորը մի գրությամբ ներկայացնել իրենց:

«Ինձ մոտեցավ մի մարդ, անունը չեմ հիշում ու ասաց, որ փաստաբանին խնդրեմ առանձին կետերով գրի, թե ինչ սխալներ կան գործում և ուղարկեմ իրեն: Դրանից հետո ասեց, որ իրանք կուղարկեն նոր նշանակված դատախազին` Գևորգ Կոստանյանին», -փոխանցեց Թագուհին:

Մանկատան նախկին սանը նախագահից խնդրում էր որպեսզի «մարդավարի ուշադրություն» դարձնեն իր ամուսնու` դարձյալ մանկատան նախկին սան Ռոման Կուդաշինի գործի քննության ընթացքին:

Panorama.am-ը բազմիցս ներկայացրել էր ներկայացրել էր Վանաձորի մանկատան նախկին սաների վերաբերյալ այս պատմությունը: 24-ամյա Ռոմանը, ով ազգությամբ ռուս է և վաղ հասակում կորցրել է ծնողներին, մանկատնից դուրս գալուց հետո աշխատել է Վանաձորի ՀԷՑ-ում որպես մոնտյոր ու իրենց աշխատավարձով, ինչպես Թագուհին էր պատմել, կարողացել են նորմալ ապրել: Վանաձորում ապրում են վարձակալած բնակարանում, մինչև պետությունը նրանց բնակարան կհատկացնի: Թագուհին ասել է, որ իրենց պահանջները քիչ են եղել, իսկ ընտանիք մտնող գումարը բավարարել է իրենց ու նորմալ ապրել են, հետևաբար գողություն կատարելու մասին մտքներով անգամ չի անցել:

Վանաձորի մանկատնից 2011-ի հունիսին գողացված երաժշտական կենտրոնը դառնում է պատուհաս այս նորաստեղծ ընտանիքի գլխին: Ըստ նախաքննության տվյալների և այնուհետև` Լոռու մարզի ընդհանուր իրավասության դատարանի դատավոր Մուշեղ Հարությունյանի 2012-ի հուլիսի 13-ին կայացրած վճռով Ռոման Կուդաշինը մանկատան մյուս սաներից մեկի` Արթուր Կիրակոսյանի ու Վանաձորի բնակիչ Տարոն Մելիքջանյանի հետ միասին մուտք են գործել մանկատուն և գողացել մանկատան երաժշտական կենտրոնը: Եվ նույն դատարանի վճռով Արթուրն ու Տարոնը դատապարտվել են հինգ տարի ազատազրկման, իսկ Ռոմանը` 4: Առաջին ատյանի դատարանի վճիռը Վերաքննիչ դատարանը թողել է ուժի մեջ, իսկ Վճռաբեկ դատարանը վարույթ չի ընդունել: Դատական այս քաշքշոցի մեջ Թագուհին երեխա էր կորցրել, իսկ կյանքը վերածվել դժոխքի: Ռոմանն այժմ հետախուզման մեջ է:

Կառավարության դեմ Թագուհու բազմաթիվ բողոքի ակցիաներից հետո Լոռու մարզի դատախազ Հակոբ Ղարախանյանը ընդունել էր Թագուհուն, խոսել նրա հետ, ուսումնասիրել գործը: Նրա խնդրանքով, Լոռու մարզի փաստաբան Ռուբեն Հակոբյանը գործով նոր հանգամանքների առկայության մասին դիմում էր ներկայացրել Լոռու մարզի դատախազություն, որտեղից այն ուղարկվել էր ոստիկանության Լոռու մարզի վարչություն: Այժմ Թագուհին հույս չունի, որ ընթացք կտան և նոր քննություն կիրականացնեն: «Ես համոզված եմ քնեցնելու են գործը ու ոչ մի քննություն չեն իրականացնելու», մեզ հետ զրույցում ասել էր Թագուհի Քոչարյանը:

Այս գործին առնչվող Panorama.am-ի հրապարակումները