Ձեր վստահելի աղբյուրը

Եվրոպական խորհրդարանը հոկտեմբերի 23-ի լիագումար նիստում կողմ քվեարկեց «Եվրոպական հարևանության քաղաքականություն, համագործակցության ուժեղացում։ Եվրոպական խորհրդարանի դիրքորոշումը 2012 թ.-ի զեկույցին»:
Զեկույցում ներկայացվում է Արևելյան գործընկերության քաղաքականության շրջանակներում իրականացված գործընթացները, Արևելյան գործընկերության անդամ երկրների հետ հարաբերությունները։ Բանաձևի «Արևելյան գործընկեության» վերաբերյալ հատվածում անդրադարձ է կատարվում անդամ երկրների տարածքում առկա հակամարտություններին:

Թեմայի շուրջ Panorama.am-ը զրուցեց ԱԺ ՀՀԿ խմբակցության անդամ, ՀՀԿ Գործադիր մարմնի անդամ Գագիկ Մինասյանի հետ:

-Պարոն Մինասյան, ընդունված փաստաթղթում անշուշտ մեզ համար առավել կարևոր է Հայաստանի մասին տեղ գտած ձևակերպումները, մասնավորապես, Արցախի հարցում: Այս տեսանկյունից, ինչպե՞ս կգնահատեք բանաձևի՝ արցախի հիմնախնդրին վերաբերող հատվածը:

-Եվրամիությունը վաղուց ձևակերպել է իր դիրքորոշումը Արցախի հիմնախնդրի կարգավորման գործընթացի վերաբերյալ, այս տեսանկյունից պետք է նշեմ, որ ընդունված բանաձևը անհավասարակշռված է, իսկ սա նշանակում է, որ Եվրախորհրդարանն այս հարցում հետևողականություն չի դրսևորել: Համենայնդեպս, ԵՄ այն պաշտոնյաները, ովքեր իրավասու են հանդես գալու պաշտոնական դիրքորոշմամբ, հայտարարել են, որ աջակցում են ԼՂ հիմնահարցի կարգավորման հարցում միակ մանդատը ունեցող միջազգային կառույցին՝ ԵԱՀԿ Մինսկի խմբի համանախագհներին և իրենց աջակցությունն են հայտնել եռանախագահող երկրների կողմից պարբերաբար հնչող հայտարարություններին:

-Ըստ Ձեզ, ինչո՞վ է պայմանավորված նման բանաձևի ընդունումը:

-Ամենայն հավանականությամբ, բանաձևի վրա բավականին մեծ ազդեցություն են ունեցել թուրք-ադրբեջանական լոբբին, որի դրսևորումները բավականին թափանցիկ ձևով դրսևորվում են բանաձևի որոշ ձևակերպումներում:

-Պարոն Մինասյան, այս բանաձևի հետ կապված, կա տարածված տեսակետ այն մասին, որ սրանով Արևմուտքը փորձում է ճնշումների ենթարկել Հայաստանին, ինչը պայմանավորված է ՀՀ-ի՝ Մաքսային միության անդամակցության մտադրության մասին հնչեցված պաշտոնական դիրքորոշմամբ:

-Չեմ կարծում, թե Եվրամիությունը փորձ է կատարել այս ձևով արձագանքել Հայաստանի ինտեգրման պրոցեսներին:

-Ո՞րն է նման դեպքերում Հայաստանի անելիքները:

-Կարծում եմ՝ մեր համապատասխան կառույցները, այդ թվում՝ խորհրդարանը, ԱԳՆ-ն ու, մանավանդ, արտերկրում գործող դիվանագիտական առաքելությունները պետք է առավել զգոն լինեն՝ հնարավորինս բացառելու ոչ միայն նման բանաձևերի ընդունումը, այլ աշխատանքներ տանելու եվրոպացի այն գործընկերների հետ, ովքեր նման հարցերում առաջնորդվում են տարաբնույթ շարժառիթներով:

Հիշեցնենք, որ Եվրոպական խորհրդարանի բանաձևի Լեռնային Ղարաբաղի հակամարտությանը բաժնում նշվում է. «Եվրոպական խորհրդարանը վերահաստատում է իր դիրքորոշումը, որ Արևելյան գործընկերության անդամ մեկ երկրի կողմից մյուս երկրի տարածքի օկուպացիան խախտում է գործընկերության հիմնարար սկզբունքները և նպատակերը։ Լեռնային Ղարաբաղի հարցը պետք է լուծվի ՄԱԿ-ի Անվտանգության խորհրդի 1993 թ-ի 822, 853, 874 և 884 բանաձևերի, ԵԱՀԿ Մինսկի խմբի հիմնարար սկզբունքների և 2009 թ-ի Լ’Ակվիլայի համատեղ հայտարարության հիման վրա»։