Ձեր վստահելի աղբյուրը

Երևանի 2-րդ Եկմալյան 5 հասցեի նորակառույց շենքում բնակարաններ ձեռք բերած քաղաքացիների մի մասը հայտնվել է անելանելի վիճակում: Մարդիկ բնակարաններ են գնել կառուցվող շենքում, վճարել են գումարի հիմնական մասը, շենքն արդեն կանգուն է, իսկ իրենց թույլ չեն տալիս ներս մտնել: Այս մասին բնակիչներն ասացին այսօր, լրագրողների հետ հանդիպմանը:

2005 թվականից մարդիկ «Նարեկ-Դավիթ» ՍՊԸ-ի հետ անշարժ գույքի առուվաճառքի նախնական պայմանագրեր են կնքել, որոնք վավերացրել է նոտար Ալվարդ Մելքոնյանը: Բնակիչները բնակարանների համար վճարել են պայմանագրերում նշված գումարների 90 տոկոսը, իսկ մնացած 10 տոկոսը պետք է վճարեին բնակարանների սեփականության վկայականները ստանալուց հետո:

Բնակիչներից Սուրեն Աբրահամյանն ասաց, որ իրենք դեռ չեն հասցրել տեղավորվել իրենց նոր գնած բնակարաններում, երբ 2011-ին շենքի կառուցապատող Գագիկ Պապոյանի դեմ դատավարություն է սկսվել, ու նրա ձերբակալությունից հետո հայտնվել է Երևանի ավագանու ԲՀԿ-ական նախկին անդամ Անդրանիկ Խալոյանը ու հայտարարել է, որ շենքն իրեն է պատկանում: Բնակիչներն իրենց բանալիներն ունեին, բնակարաններում վերանորոգում էին արել ու մի օր եկել են ու պարզել, որ երկաթից դուռը փակել են ու չեն կարողանում մտնել շենք:

Քաղաքապետարանից բնակիչները պարզել են, որ Խալոյանը ձեռք է բերել շենքի հողատարածքի մի մասը: Շենքի զբաղեցրած հողատարածքը մոտ 695 քմ է, որից սեփականության իրավունքով Անդրանիկ Խալոյանին է պատկանում 500 քմ-ը: Բնակիչները պնդում են, որ նա ապօրինի է ձեռք բերել այդ տարածքը: Խալոյանը հողատարածքը սեփականաշնորհել է 2008-ին, երբ շենքի երեք հարկն արդեն կառուցված էր:

Շենքը երկու մուտք ունի, որից մեկում մարդիկ արդեն բնակվում են, ինչ-որ կերպ հաջողացրել են տեղավորվել, ասում են բնակիչները: Այն մուտքը, որում բնակարաններ են ձեռք բերել հիսուն բնակիչներ, մարդկանց պնդմամբ, Անդրանիկ Խալոյանը փակել է, թույլ չի տալիս մտնել: Նախ պատճառաբանել են, թե վերելակը տեղադրված չէ, և անվտանգ չէ, որ մարդիկ բնակվեն: Ինչից հետո արդեն պահակներ է նշանակել, որոնք բնակիչներին թույլ չեն տվել մտնել իրենց տներ:

«Այդ հողատարածքն ապօրինի է հատկացվել նրան: Հիսուն ընտանիք դուրսն են մնալու, իսկ Խալոյանը, որ մի փոքր հողատարածք ուներ, ուզում է իրենով անել շենքը: Նա ապօրինի ներիսց փակել է շենքը, սվառկա է արել, որ չկարողանանք մտնել»,- ասաց Սուրեն Աբրահամյանը:

Մեկ այլ բնակիչ Լաուրա Կարապետյանը հայտնեց, որ ինքը ութսուն հազար դոլար մուծել է, բայց մնացել է դրսում ու վարձով է ապրում: Նա նաև տեղեկացրեց, որ իրենք այս ընթացքում կոսմետիկ վերոնորոգում էին արել բնակարաններում, հավելյալ գումարեր էին ծախսել:

Բնակիչներն ընդգծեցին, որ Գագիկ Պապոյանն իրենցից հավաքած գումարներով է կառուցել շենքը, իսկ Խալոյանը շինաշխատանքների համար ոչ մի դրամ չի վճարել: Իսկ վերջինս բնակիչներին առաջարկել է գնալ Գագիկ Պապոյանից հետ պահանջել գումարները:
Բնակիչները նաև իրավապահ մարմիններին են դիմել, սակայն նրանց բողոքի հիման վրա գործը դեռ ընթացք չի ստացել, քանի որ կառուցապատող Գագիկ Պապոյանի դեմ արդեն մեկ ուրիշ գործ ընթանում է, և բնակիչներին այդ գործում ներգրավվել են որպես տուժողներ: Նրանք պնդում են, որ իրենք «խնդիր չունեն Պապոյանի հետ, վերջինս կառուցել է շենքը, իրենց խնդիրը Խալոյանի հետ է, ով եկել ու ապօրինի տիրացել է շինությանը»:

«Ժամանակը գնում է, մենք Պապոյանի դատի հետ կապ չունենք: Գումարները վճարել ենք, իսկ մեր բնակարանները պատրաստ են: Ես արդեն վեց տարի է բնակարան եմ ձեռք բերել, բայց չեմ կարողանում այնտեղ ապրել: Մենք մեր բնակարաններն ենք պահանջում»,- ասաց բնակիչներից Մհեր Մարությանը: