Ձեր վստահելի աղբյուրը

Հայ-ադրբեջանական սահմանի և ղարաբաղա-ադրբեջանական զորքերի շփման գծի տարբեր հատվածներում, հակառակորդի կողմից տեղի ունեցող ագրեսիվ գործողությունները, որոնք նաև ուղեկցվում է երկուստեք կորուստներով ու վիրավորներով, ևս մեկ անգամ մեզ ստիպում է առավել լրջորեն մոտենալ առկա մարտահրավերներին: Հակառակորդի ռեսուրսային առավելությունը, հայկական կողմը փորձում է չեզոքացնել որակական բաղադրիչի գերակայությամբ: Ի դեպ, պաշտպանության նախարարը որպես կարգախոս հռչակել է փոքր ուժերով մեծ խնդիրներ լուծելու սկզբունքը, ինչը առկա իրողությունների պայմաններում բանակի առջև դրված գլխավոր խնդրին հասնելու լավագույն նախապայմաններից է:

Պետական սահմանի մարտական պահպանության իրականացումը բանակի առաջնային խնդիրն է, իսկ այսքան սպասված խաղաղության պահպանումը ապահովվում է մեծ ջանքերի ու աշխատանքի շնորիվ:

Հաշվի առնելով վերջին շրջանում պետական սահմանի տարբեր հատվածներում գրանցվող ադրբեջանական սադրանքները, Panorama.am-ը մեկնել է հյուսիս-արևելյան սահման՝ տեղում ծանոթանալու առաջնագծում իրականացվող աշխատանքներին:

N զորամասի հրամանատարի մարտական հերթապահության գծով տեղակալ, փոխգնդապետ Հայկ Մադաթյանը, ով ուղեկցում էր մեզ, նշեց, որ առաջնագծում պետական սահմանի պահպանությունն առավել արդյունավետ դարձնելուն ուղղված քայլերը մշտական բնույթ են կրում:

«Հրամանատարության կողմից խնդիր է դրված մարտական հենակետերն ապահովել այնպիսի կահավորանքով, ինչը հնարավորություն կտա ոչ միայն լուծել սահմանի պահպանության հարցը, այլ առավելագույնը ապահովել մեր զինծառայողների անվտանգությունը»,- նշեց Հ. Մադաթյանը:

Նրա խոսքերով, մանավանդ, վերջին շրջանում հակառակորդի ակտիվացումներից հետո, առաջնագծում իրականացվող աշխատանքներն առավել ակտիվ բնույթ են ստացել՝ հնարավորինս չեզոքացնելու հավանական սադրանքները:

Պետական սահմանի այդ հատվածի մարտական պահպանությունն իրականացնող գումարտակի շտաբի պետ մայոր Նորայր Ավետիսյանը նշեց, որ հոգեբանական առումով, հակառակորդի քայլերը որևէ ազդեցություն չեն թողնում զինծառայողների վրա, քանի որ Ադրբեջանը մշտապես էլ փորձում է սադրանքների գնալ, սակայն հայ զինծառայողները պատրաստ են ցանկացած գնով լուծելու իրենց առջև դրված մարտական խնդիրը:

Մեր այցելած բոլոր հենակետերում ակտիվ ինժեներական աշխատանքներ էր իրականացվում, որոշներում էլ դրանք ավարտական փուլում էին:

«Միաժամանակ իրականացվում է վերահսկողություն, որպեսզի մարտական դիրքերում հերթապահություն կրող անձնակազմը հետևի անվտանգության կանոններին, անընդհատ իրազեկման աշխատանքներ են տարվում»,- նշեց մայոր Ավետիսյանը:

Մեր այցի ընթացքում, մարտական հենակետերում հանդիպեցինք նաև երկրորդ բանակային կորպուսի հրամանատար Պողոս Պողոսյանին, ով իր տեղակալների հետ շրջում էր մարտական հենակետերում ու տեղում անհրաժեշտ ցուցումներ տալիս:

Ի դեպ, կորպուսի հրամանատարի տեղակալներից գնդապետ Բաղրամյանը, հայտնի մարշալ Հովհաննես Բաղրամյանի թոռն է, ով հետևելով հայտնի մարշալի ճանապարհին, ժամանակին ընտրել է զինվորականի ճանապարհը: