Ձեր վստահելի աղբյուրը

Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի դատավոր Վազգեն Ռշտունին նշանակվել է Կոտայքի մարզի դատախազ: Այդ մասին հայ իրավաբանների ֆեյսբուքյան խմբում գրառել է ՀՀ Փաստաբանների պալատի փաստաբան Երեմ Սարգսյանը ու նշել.

««Անհավանական նշանակում դատախազությունում: Դատական համակարգը տուժեց, իսկ դատախազականը միանշանակ շահեց: Գևորգ Կոստանյանի կադրային քաղաքականությունը հույսեր է տալիս. նախորդ արժանի նշանակումը Արթուր Դավթյանին Երևան քաղաքի դատախազ նշանակելն էր»:

Նկատենք, որ դատավորին մեկ այլ պաշտոնի նշանակման դեպքում նա պետք է հրաժարական ներկայացնի, որը պետք է ստորագրվի հանրապետության նախագահի կողմից: Այդ առնչությամբ ՀՀ Դատական դեպարտամնետի հասարակայնության հետ կապերի բաժնի պետ Արսեն Բաբայանը Panorama.am-ին ասաց, որ հրապարակային են միայն Արդարադատության խորհրդի որոշումները, այս պահին Վազգեն Ռշտունու դիմումի վերաբերյալ որոշում հրապարակված չէ:

Ներկայացնում ենք Վազգեն Ռշտունու կենսագրությունը՝ ըստ court.am-ի

Ծնվել է 1980 թվականին Երևան քաղաքում։
2000 թվականին ավարտել է ԵՊՀ իրավաբանական ֆակուլտետը։
2002 թվականին ավարտել է ԵՊՀ իրավաբանական ֆակուլտետի մագիստրատուրան։
2005 թվականին ավարտել է ՀՀ ԳԱԱ փիլիսոփայության, սոցիոլոգիայի և իրավունքի ինստիտուտի ասպիրանտուրան։
2004 թվականին աշխատել է ՀՀ Արտաքին գործերի նախարարության իրավաբանական վարչության ՀՀ միջազգային պայմանագրերի կատարման և ներպետական իրավունքների բաժնում՝ որպես իրավաբան։
2005 թվականին աշխատել է «Համահայկական երիտասարդական միջազգային կենտրոն» հիմնադրամում՝ որպես իրավաբան։
2005 թվականից մինչև 2006 թվականն աշխատել է ՀՀ Վճռաբեկ դատարանի աշխատակազմի իրավական փորձաքննությունների վարչությունում՝ որպես մասնագետ, այնուհետև՝ որպես ավագ մասնագետ։
2006 թվականից զբաղեցրել է ՀՀ Վճռաբեկ դատարանի աշխատակազմի իրավական
փորձաքննությունների վարչության պետի պաշտոնը։
2008 թվականից մինչև 2009 թվականն աշխատել է Երևանի քրեական դատարանի դատավոր:
2009 թվականի փետրվարի 27-ին ՀՀ Նախագահի հրամանագրով նշանակվել է Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի դատավոր:
Իրավաբանական գիտությունների թեկնածու է։