Վերաքննիչ դատարանի դատավորը կարևոր փաստաթուղթ է անտեսել, ինչի արդյունքում մարդիկ զրկվում են բնակարանից (տեսանյութ)
Դատական իշխանության նկատմամբ հասարակության անվստահությունը գնալով ահագնանում է: Այդ մասին այսօր լրագրողների հետ հանդիպմանը հայատարարեց ՀՀ Փաստաբանների պալատի խորհրդի անդամ, փաստաբան Կարեն Մեժլումյանը և ներկայացրեց երևանյան ընտանիքներից մեկի` Կոբալյանների գործը:
Կոբալյանները մի քանի տարի առաջ վաշխառու Կարինե Եղիազարյանից ամիսը 5 տոկոսով 7000 ԱՄՆ դոլար են վերցրել, որի դիմաց Երևանի Վարդաշեն թաղամասում գտնվող իրենց բնակարանը, որպես ապահովման միջոց, ըստ Մեժլումյանի, շինծու առուվաճառքի պայմանագրով ձևակերպել են վաշխառուի անունով: Փաստաբանի ներկայացմամբ, տոկոսը 3 ամիս վճարել են, սակայն արդեն 4-րդ ամսում նրանց բնակարանը վաշխառուն առանց Կոբալյանների իմացության, 18 մլն դրամ (60 հազար ԱՄՆ դոլար) գումարով վաճառում է: Շուրջ 3 տարի Կոբալյաններն ապրում են բնակարանում, սակայն նոր գնորդը դատարանի միջոցով փորձում է վտարել նրանց:
«Իրենք դիմում են ինձ, մենք էլ մեր հայցն ենք ներկայացնում Արմավիրի ընդհանուր իրավասության դատարան, որպեսզի բնակարանի առուվաճառքի պայմանագիրը շինծու ճանաչվի: Զուգահեռ դիմում ենք ոստիկանություն և վաշխառության փաստով քրեական գործ է հարուցվում: Մենք այդ որոշումը ներկայացնում ենք դատարանին ու ասում ենք` կասեցրեք գործի քննությունը, որպեսզի քրեական գործով վերջնական դատական ակտ կայացվի», պատմեց Մեժլումյանը` ընդգծելով, որ Արմավիրի ընդհանուր իրավասության դատարանի դատավոր Հովհաննես Մելքոնյանը գործի վարույթը չի կասեցնում: Ու այդ մասին մի քանի միջնորդություններ մերժում է, սակայն հետո Կոբալյաններին իրենց բնակարանից վտարելու վճիռ է կայացնում: Սակայն Կոբալյաններն ու փաստաբանը չեն հանձնվում և դիմում են Վերաքննիչ դատարան` վերաքննիչ բողոքում նշելով, որ պետք է կասեցվեր վարույթը, քանի որ վաշխառության մասին քրեական գործ կա հարուցված: Սակայն այս ատյանում էլ նույնն էր սպասվում` Վերաքննիչ դատարանը դատավոր Ամրահի Պետրոսյանի նախագահությամբ մերժում է բողոքը`պատճառաբանելով, որ քրեական գործ հարուցելու մասին որոշումը չի ներկայացվել դատարան և բացակայում է գործի նյութերի միջից:
«Այդ որոշումից հետո ես շտապ գնում եմ, գործի նյութերին ծանոթանալու դիմում եմ ներկայացնում, տեսնում եմ, որ այդ որոշումը կա ու հեռախոսովս նկարում եմ ու այդ հիմքով վճռաբեկ բողոք եմ ներկայացնում: Չեմ կարծում, թե առաջին ատյանի ու վերաքննիչ դատարանի դատավորները նման ապօրինությունների ու կեղծիքի են գնացել ու չորս հոգանոց ընտանիքին իրենց բնակարանից ապօրինի վտարել են բացառապես իրենց արյան մեջ ադրենալինի ծավալն ավելացնելու համար: Կարծում եմ, որ նման կեղծիքի գնալու համար անհրաժեշտ էր նաև կոռուպցիոն միջամտություն», -հայտարարեց փաստաբան Մեժլումյանը:
Փաստաբանը մեկ այլ հանգամանք էլ նշեց. Անձը` Արտակ Գալստյանը, որին վաճառվել է բնակարանը, հայտնի վաշխառու է, որը Երևանում 26 բնակարան ունի: «Այսինքն գումար է պտտվում»,- նկատեց փաստաբանը:
Հոկտեմբերի 6-ին Մեժլումյանը Վճռաբեկ դատարան բողոք է ներկայացրել և սպասում են պատասխանի:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
