Ս.Ֆարմանյան. Վիլնյուսի գագաթաժողովից հետո, որին ՀՀ-ն անպայման մասնակցելու է, կհստակեցվեն համագործակցության ուղղությունները
«Մենք քննարկեցինք հնարավոր այն ուղղությունները, որտեղ կարող ենք համագործակցել և ներդնել մեր ուժերը: Ամենակարևորն այն է, որ երկուստեք կա համագործակցության ցանկություն»,- ԱԺ-ում համատեղ ասուլիսի ժամանակ հայտարարեց Հայաստան-Եվրամիություն խորհրդարանական համագործակցության հանձնաժողովի համանախագահ Սամվել Ֆարմանյանը:
Իսկ նրա գործընկեր Միլան Ցաբրնոխը հայտարարեց, որ ԵԽ անդամները Հայաստանը ճանաչում և ընդունում են որպես առանցքային գործընկեր. «Մենք սերտորեն համագործակցում ենք միմյանց հետ տարբեր ձևաչափերով, կոնկրետ պարոն Ֆարմանյանի հետո` խորհրդարանական ձևաչափով»,- նշեց նա:
«Հայաստան-ԵՄ հարաբերությունները զարգանում են, մենք աջակցում ենք դրան և ուշադիր հետևում ենք այն գործընթացներին, որ տեղի են ունենում ձեր երկրում: Մենք աջակցում ենք ժողովրդավարության, մարդու իրավունքների պաշտպանությանը, ԶԼՄ-ների ազատության հաստատմանը` որպես եվրոպական հիմնարար արժեքներ»,- թվարկեց պաշտոնյան:
Անդրադառնալով Մաքսային միությանը միանալու Հայաստանի կայացրած որոշմանը, Մ.Ցաբրնոխն ասաց, որ շրջադարձային այդ որոշումից հետո, փաստորեն կարճ ժամանակ անց են հանդիպում և այս հանդիպումը տեղի է ունենում Վիլնյուսի գագաթաժողովից առաջ. «Մենք հարգում ենք Հայաստանի որոշումը և խորհում ենք այն մասին, թե այս նոր պայմաններում ինչպիսի հարթակներ պետք է ստեղծենք համագործակցությունը շարունակելու համար»,- շեշտեց Մ.Ցաբրնոխը:
Անդրադառնալով նախօրեին ՀՀ նախագահ Սերժ Սարգսյանի հետ կայացած հանդիպմանը, եվրոպացի պաշտոնյան ասաց, որ դա առաջին հանդիպումը չէր ՀՀ նախագահի հետ և չափազանց բարձր է գնահատում այն բաց երկխոսությունը, որ տեղի ունեցավ. «Պարոն նախագահը շատ հստակ ու խորը կերպով բացատրեց այն պատճառները, որոնց հիման վրա տեղի է ունեցել այդ որոշումը (նկատի ունի ՄՄ-ին միանալու որոշումը): Իսկ ինչ վերաբերում է Վիլնյուսի գագաթաժողովին, մենք ակնկալում ենք, որ կշարունակենք վիզաների դյուրացման գործընթացը, որոնք ավելի կդյուրացնեն ՀՀ քաղաքացիների ճամփորդությունները և մուտքը դեպի եվրոպական երկրներ: Կշարունակենք մեր աջակցությունը ժողովրդավարության, քաղաքացիական հասարակության ձևավորման և այլ քննարկումներում: Պետք է վերստին փորձենք ստեղծել կամ նոր շունչ հաղորդել այն ծրագրերին, որոնք Ասոցացման համաձայնագրի շրջանակում էին իրականացվում, որովհետև Ասոցացման համաձայնագիրը համատեղելի չէ Հայաստանի Մաքսային միությանը միանալու որոշմանը»,- ընդգծեց Մ.Ցաբրնոխը:
Սամվել Ֆարմանյանն էլ հավելեց, որ ՀՀ-ն մեծապես կարևորում է ԵՄ հետ սերտ համագործակցությունն ու դրա շարունակականությունը. «Մենք ևս մեծապես կարևորում ենք ԵՄ հետ համագործակցությունը: Տեղի է ունենում բավականին ինտենսիվ գործընթաց` Երևան-Բրյուսել, որը նպատակ ունի ձևավորելու օրակարգը և առավելապես հստակեցնելու այն ուղղությունները, որոնցով ՀՀ-ԵՄ հարաբերությունները հետայսու պետք է շարունակվեն» ,- նշեց Ս.Ֆարմանյանն ու հավելեց, որ հայկական կողմը շատ լավ հասկանում է, որ վերջին զարգացումների կոնտեքստում կա որոշակի չհասկացվածություն: Բայց համոզմունք հայտնեց, որ Վիլնյուսի գագաթաժողովից հետո, որին Հայաստանը, շեշտեց, անպայման մասնակցելու է, կհստակեցվեն այն ուղղությունները, որոնցով կշարունակվի համագործակցությունը ՀՀ-ԵՄ միջև:
Իսկ վիզաների դյուրացման հարցի վերաբերյալ Ս.Ֆարմանյանն ասաց, որ առաջիկա քառօրյայում այդ հարցը կքննարկվի ԱԺ-ում, որից հետո կվավերացնի ՀՀ նախագահը և հույս հայտնեց, որ հունվարի 1-ից այն ուժի մեջ կմտնի.
«Վիզաների դյուրացումը վերջին տարիների համագործակցության կոնկրետ արդյունքներից մեկն է, ինչը փաստում է, որ ՀՀ-ԵՄ համագործակցությունը անցած տարիներին եղել է շատ արդյունավետ»,- հավելեց պատգամավորը:
Լրահոս
Տեսանյութեր
18-20 տարեկան տղաներն իրենց կյանքի գնով Արցախում կանխել են ցեղասպանություն. Հովիկ Ավանեսով