Ձեր վստահելի աղբյուրը

Ամեն տարվա վերջին երեք-չորս ամիսներին առողջապահության համակարգում ստեղծվում է մի իրավիճակ, երբ պետպատվերով բուժում ստանալը դառնում է անհնար. Բուժհաստատությունների ու նաև առողջապահության նախարարության բացատրությունը մեկն է` փող չկա:

Այսպես, Panorama.am-ը նմանատիպ մի քանի իրավիճակի մասին ահազանգ է ստացել, երբ սեպտեմբերի կեսերին շաքարով հիվանդներին Երևանի բուժհիմնարկներից մեկում հրաժարվել են անալիզներ վերցնել, մեկ հղիի հրաժարվել են պետպատվերով հետազոտել, իսկ մի քանի օր առաջ էլ ահազանգ ստացանք Վանաձորից` փոքրիկ Միլենան, ով աչքի ուռուցքի հետևանքով կորցրել է մեկ աչքը և հիմա պետք է ստուգվի, որպեսզի պարզ լինի, թե որքանով է ապահով մյուս աչքը (հարկավոր է գլուխը նկարել), չկարողացավ հետազոտվել, քանի որ բոլոր այս դեպքերում պետպատվերին հատկացվող գումարները վերջացել էին:

Եվ ահա այսօր Ազգային Ժողովում այս խնդրին անդրադարձավ Առողջապահության նախարար Դերենիկ Դումանյանը, ում այդ հարցը` ինչ անել, որ միջոցները չսպառվեն տարվա կեսին, տվեց ՀՀԿ խմբակցության անդամ Մանվել Բադեյանը և առաջարկեց նաև մեխանիզմ սահմանել այս ավանդույթ դարձած խնդրից ձերբազատվելու համար:

Նախարար Դումանյանի պատասխանը սպառիչ էր, բայց հասարակ քաղաքացու համար ոչ այդքան հասկանալի, քանի որ հստակ որևէ ձևակերպում չհնչեց, թե հաջորդ տարվանից, ասենք, այս խնդիրն այլևս չի լինի ու հիվանդները, որոնք պետպատվերի կարիք ունեն, ժամանակին կստանան այն.

«Նման մեխանիզմներ կան` պայմանագրով մենք ֆիքսում ենք համամասնությունները, թե բուժհաստատությունները ինչպես պետք է գումարները տնօրինեն: Յուրաքանչյուր հիմնարկի գլոբալ բյուջե ենք տալիս և կազմում ենք գրաֆիկ, թե ինչպես պետք է բուժհիմնարկը ծանրաբեռնվածությունն ապահովի, որպեսզի ամբողջ տարվա համար` հունվարի 1-ից դեկտեմբերի 31 կարողանա համաչափորեն ծախսել այդ գումարները: Մեխանիզմների մեջ նաև նշվում է, որ այն դեպքերում, երբ դիմողների թիվը ավելին է, քան հիմնարկի հնարավորությունները կամ հզորությունները, ապա հիմնարկը այդ մասին պետք է ժամանակին տեղյալ պահի նախարարությանը, որպեսզի նախարարությունը այն հիմնարկներում, որտեղ դրանց ընդհանուր քանակը դեռևս հեռու է սպառումից, ինքնուրույն կոորդինացնի այդ խնդիրը»,- իր խոսքում նշեց նախարարը:

Բացի դրանից, շարունակեց Դ.Դումանյանը, պայմանագրով ֆիքսված է, որ յուրաքանչյուր կետի չկատարման դեպքում կարող է անգամ պայմանագիրը ընդհատվել հիմնարկի հետ.

«Դուք ինքներդ եք հասկանում, որ դրանից խիստ պատիժ այլևս լինել չի կարող: Այս մեխանիզմները գոյություն ունեն, բայց եթե կան ավելի արդյունավետ մեթոդներ ես պատրաստ եմ դրանք լսել»,- հավելեց Առողջապահության նախարարը:

Արդեն քննարկումից հետո Panorama.am-ը հետաքրքրվեց նախարարից, քանի որ իր ելույթից այդպես էլ պարզ չէր, թե ինչ պետք է անեն այն հիվանդները, որոնք պետպատվերով բուժում չեն ստանում ֆինանսների սպառման պատճառով.

«Պետք է վճարեն»,- եղավ նախարարի պատասխանը: Հարցրեցինք` իսկ եթե ընտանիքը սոցիալապես անապահով է.
«Եթե սոցիալապես անապահով է չպետք է վճարի»:

Նախարար Դումանյանին տեղեկացրեցինք մեր ահազանգերի մասին, երբ մարդկանց հետ են ուղարկում, քանի որ գումարները սպառվել են, թեև նշված դեպքերում կան և սոցիալապես անապահովներ և հաստատ մեր ստացված ահազանգերից դուրս էլ նման դեպքերը քիչ չեն:

Դ.Դումանյանն արձագանքեց. «Պետպատվերի շրջանակներում չեն կարող հետ ուղարկել: Մենք ունենք թեժ գիծ և ամեն առավոտյան իմ գործը սկսվում է թեժ գծով ստացված ահազանգերի ուսումնասիրությամբ»,- ասաց նա:

Երբ նշեցինք, թե ոչ բոլորը գիտեն թեժ գծի մասին, նախարարը հորդորեց բոլորին տեղեկացնել այդ մասին և տեղյակ լինել իրենց իրավունքներից:

Նշենք, որ որոշ դեպքերում բժշկական հաստատությունները, որպեզի իրենց դիմած քաղաքացիներին չհիասթափեցնեն ու չթողնեն հիվանդության հետ դեմ առ դեմ, հույս են տալիս, թե հնարավոր է գումարների վերաբաշխում լինի և մեկ շաբաթ կամ տասը օր անց նորից այցելեն բուժհաստատություն: Որոշ դեպքերում այդպես էլ լինում է` կարողանում են պետպատվերով սպասարկել, բայց այդ դեպքում էլ տուժում են բժիշկները. մեր տեղեկություններով, հոկտեմբերի սկզբին այս մեթոդով մի բժիշկ 46 հիվանդ է սպասարկել մեկ օրվա ընթացքում, հերթն այնպիսին էր, և օրվա վերջում բժշկին էր մասնագետի օգնություն հարկավոր: Ասել է թե` ծայրահեղությունից ծայրահեղություն ….