Ձեր վստահելի աղբյուրը

«Իրանը ԼՂ հակամարտության կարգավորմանն ուղղված առաջարկությունների փաթեթ է մշակել»,-այդ մասին Ադրբեջանում Իրանի դեսպանության պաշտոնական կայքի հաղորդմամբ՝ հայտարարել է դեսպան Մոհսեն Փաք Այինը:

Իրանի դեսպանը, ադրբեջանական «Իրավունք և ազատություն» ամսագրին տված հարցազրույցում, անդրադառնալով Ադրբեջանի և Լեռնային Ղարաբաղի Հանրապետության միջև առկա հակամարտությանը և այդ համատեքստում հայ-ադրբեջանական պատերազմի վերսկսման հավանականությանը, մասնավորապես պատասխանել է. «Քանի դեռ ԼՂ հակամարտությունը չի լուծվել, հավանականություն կա, որ պատերազմը կարող է վերսկսվել: Տարածաշրջանում անվտանգության խաթարումը Իրանի համար վտանգ է ներկայացնում: Իրանը և՛ Հայաստանի և՛ Ադրբեջանի հետ ցամաքային սահման ունի, հետևաբար անվտանգության հաստատումը բխում է Իրանի շահերից: Վերջին շրջանում թե՛ Ադրբեջանի, թե՛ Հայաստանի սպառազինության ավելացումը պատերազմի վերսկսման հավանականությունը մեծացնում է»:

Ադրբեջանում Իրանի դեսպանը, անդրադառնալով ԼՂ հակամարտության կարգավորման գործում Իրանի մասնակցության հավանականությանը, մասնավորապես նշել է. «Մենք պատրաստ ենք աջակցել խնդրի կարգավորմանը: Իրանը ԼՂ հակամարտության կարգավորման առնչությամբ առաջարկությունների հատուկ փաթեթ ունի մշակած: Եթե հակամարտող կողմերը Իրանի միջնորդական առաքելությունը ընդունեն, ապա Թեհրանը կհրապարակի իր առաջարկությունները»:

Այն հարցին, թե ԼՂ հակամարտության կարգավորման վրա ի՞նչ ազդեցություն կունենա Իրան-ԱՄՆ հարաբերությունների կարգավորումը, դեսպան Փաք Այինը պատասխանել է. «Իրանի և ԱՄՆ-ի հարաբերությունների բարելավումը կնպաստի ոչ միայն ԼՂ հակամարտության կարգավորմանը, այլև կնպաստի աշխարհում անվտանգության հաստատման գործին»:

Նախորդող հրապարակումներ՝
Ադրբեջանում ԻԻՀ դեսպան. Իրանը Հայաստանի հետ իր հարաբերությունները չի խզի

Ադրբեջանում ԻԻՀ դեսպան. Իրանի և Հայաստանի լավ հարաբերությունները թույլ են տվել, որպեսզի ԼՂ հակամարտությունը կրոնականի չվերածվի

Ադրբեջանում ԻԻՀ դեսպան. Լեռնային Ղարաբաղի հետ կապված որևէ անկայունություն լուրջ ազդեցություն կունենա Իրանի անվտանգության վրա