Ձեր վստահելի աղբյուրը

Հայ-ռուսական (Սլավոնական) համալսարանի պրոռեկտոր Պարգև Ավետիսյանը և նրա նախկին կինը՝ Լիլիթ Տիգրանյանը, այժմ հայտնվել են դատարանում: 1999 թվականին մեկ տարի տևած ամուսնական կյանքից հետո ամուսնալուծվում են և 2000-ին Պարգև Ավետիսյանը դատարանի միջոցով պարտավորվում է երեխայի համար ամսական ալիմենտ վճարել՝ սկզբում 5000 դրամ, իսկ 2002 թվականից սկսած՝ 8000 դրամ:

Այժմ երեխան 14 տարեկան է, և նրա մայրը՝ Լիլիթը ու նրա ներկայացուցիչ Փաստաբանների պալատի փաստաբան Ապետնակ Պողոսյանը հայցով դիմել են Ավան և Նոր Նորք վարչական շրջանների ընդհանուր իրավասության դատարան` նախկինում սահմանված ալիմենտի չափը փոխելու և ծնողի վաստակի կամ այլ եկամտի մեկ քառորդի չափով ալիմենտ սահմանելու պահանջով: Սակայն Պարգև Ավետիսյանը և դատարանում նրա ներկայացուցիչ Փաստաբանների պալատի փաստաբան Հարություն Ազատյանը առարկում են ներկայացված հայցին, այն համարում անհիմն և առաջարկում գնալ հաշտեցման ու որպես ալիմենտ վճարել ամսական ֆիքսված գումար՝ 35 հազար դրամ: Բայց այս առաջարկին էլ համաձայն չեն հայցվորն ու նրա ներկայացուցիչը. Լիլիթն ասում է, որ երեխան մեծանում է, իսկ ինքը 35 հազար դրամով չի կարող բավարարել նրա առօրյա գոնե դպրոցական ծախսերը: 

Փաստաբան Ապետնակ Պողոսյանը, վկայակոչելով դեռ նախորդ տարիներին դատարան ներկայացված պատասխանող կողմի փաստաթղթերը, ասում է, որ Ավետիսյանը դատարանին համոզել է, որ ինքը ամսական ստանում էր 77 ԱՄՆ դոլար աշխատավարձ, ունի ընտանիք և չի կարող 8000 դրամից ավել ալիմենտ հատկացնել երեխային: Այս անգամ դատարան ներկայացված տեղեկանքում պրոռեկտորը նշել է, որ համալսարանում իր ստացած աշխատավարձը կազմում է շուրջ 200 հազար դրամ և կարող է ալիմենտը վճարել 25 հազար դրամի չափով:

Ըստ փաստաբան Պողոսյանի, հաշվի առնելով նվազագույն աշխատավարձի մասին օրենսդրությունը, իրենք պահանջում են փոփոխել ալիմենտի չափը՝ այն հասցնելով պատասխանող կողմի ստացած ընդհանուր եկամուտների 1/4-րդով: «Իմ ունեցած տեղեկություններով, Պարգև Ավետիսյանի եկամուտների չափը կազմում է ավելի, քան մեկ միլիոն դրամ: Նրանց կողմից փորձ է արվում խեղաթյուրել դատական գործընթացը և պահանջել, որ ֆիքսված գումար լինի, որը բնականաբար, մեր պահանջածից քիչ է», -մեզ հետ զրույցում ասաց պարոն Պողոսյանը:

Եվ որպեսզի իր ունեցած տեղեկությունը ճշտի, մինչև նախնական դատական նիստը, Ապետնակ Պողոսյանը հարցում էր արել ՀՀ կառավարությանն առընթեր պետական եկամուտների կոմիտե՝ պարզելու, թե որքան եկամուտ ունի Սլավոնական համալսարանի պրոռեկտորը: Սակայն երկու անգամ փաստաբանի կատարած հարցմանը հրաժարվել են պատասխանել՝ նշելով, որ «ՀՀ ԿԱ պետական եկամուտների կոմիտեում կազմակերպություններում գրանցված աշխատակիցների անհատական հաշվառում չի իրականացվում»: Կենտրոնական բանկից ևս չեն պատասխանել Պարգև Ավետիսյանի ունեցած բանկային հաշիվների մասին հարցմանը: Ի դեպ, Ապետնակ Պողոսյանը ՊԵԿ-ի կողմից իր հարցերին չպատասխանելու համար դիմել է Վարչական դատարան, սակայն այստեղ նրա հայցադիմումը վարույթ չի ընդունվել՝ գրությունը վարչական ակտ չհամարելու պատճառաբանությամբ:

Պարոն Պողոսյանը դրանից հետո մերժումներ է ստացել նաև վերաքննիչ ու վճռաբեկ բողոքներ ներկայացնելուց հետո: Այդքանից հետո փաստաբանի համար հստակ է՝ «որոշ շահագրգիռ անձինք ուղղակի խոչընդոտում են արդարադատության իրականացմանը», քանի որ Պարգև Ավետիսյանը Վճռաբեկ դատարանի դատավոր Սերժիկ Ավետիսյանի եղբայրն է:

Ինչևէ, նոյեմբերի 1-ին Ավան և Նոր Նորք վարչական շրջանների ընդհանուր իրավասության դատարանում դատավոր Էդուարդ Ամալյանի նախագահությամբ տեղի ունեցած նախնական դատական նիստում դատարանը մերժեց հայցվոր կողմի միջնորդությունները դտարանի միջոցով պետեկամուտների կոմիտեից ու Կենտրոնական բանկից Պարգև Ավետիսյանի եկամուտների մասին տեղեկություն ստանալու վերաբերյալ:

Այնուհետև, պատասխանող կողմի ներկայացուցիչ Հարություն Ազատյանը հայցվոր կողմին առաջարկեց հաշտության համաձայնության գալ ու ամսական Պարգև Ավետիսյանի կողմից ստանալ 35 հազար դրամ ֆիքսված ալիմենտ՝ 10 հազարով ավելի, քան ավելի վաղ նշվել էր պատասխանող կողմի դատարան ներկայացված փաստաթղթում: Սակայն դատարանում Լիլիթ Տիգրանյանը հայտարարեց, որ այդ գումարը բավարար չէ երեխային պահելու համար ու ինքը համաձայն չէ գնալ հաշտեցման: Իսկ Ապետնակ Պողոսյանն էլ դատարանում հայտարարեց, որ եթե սահմանվի ֆիքսված գումար, ապա դա կհակասի թե ՀՀ գործող օրենսդրությանը, թե Վճռաբեկ դատարանի նախադեպային որոշմանը («Գոհար Կիրակոսյանն ընդդեմ Լևոն Զազյանի» գործ-հեղ.):

Կողմերը այդպես էլ հաշտության համաձայնության չեկան, և նախնական դատական նիստը մտավ դատաքննության փուլ ու քանի որ դատավորը արձակուրդ էր մեկնելու, նիստը հետաձգվեց մինչև դեկտեմբերի 3-ը:

Նիստից հետո Panorama.am-ի թղթակցի հետ զրույցում Պարգև Ավետիսյանի ներկայացուցիչ Հարություն Ազատյանն ասաց, որ իր վստահորդի հետ քննարկել են, և ինքը նախապես հայտարարված 25 հազար դրամ ալիմենտի գումարը պատրաստ է դարձնել 35 հազար դրամ: «Մենք մինչև դատական նիստը խոսել, քննարկել ենք, և նա պատրաստ է 10 հազար դրամ ավելացնել, այն է՝ 35 հազար դրամ կայուն գումար ալիմենտ վճարել: Հաշտության համաձայնության գալով մենք ուզում էինք ուղղակի լուծել վեճը», -փոխանցեց փաստաբանը: Նա, մատնանշելով ընտանեկան օրենսգրքի 71-րդ հոդվածը, որի համաձայն կայուն գումարով ալիմենտ է բռնագանձվում այն դեպքում, երբ ալիմենտ վճարող անձի եկամուտը կամ աշխատավարձը կայուն չէ, պնդում է, որ հայցվորի պահանջն անհիմն է: