Ձեր վստահելի աղբյուրը

Էլեկտրոնային տիրույթում մեկնաբանությունների վերահսկողությունը լուրջ ռեսուրսներ է պահանջում, ասում է տեղեկատվական անվտանգության փորձագետ Սամվել Մարտիրոսյանը: Այսօր լրագրողների հետ հանդիպման ժամանակ, անդրադառնալով սոցիալական ցանցերում տեղեկատվական հոսքերի և մեկնաբանությունների վերահսկողությանը, նա նշեց, որ արևմտյան երկրներում այժմ դաշտը ազատ է, չի վերահսկվում, մինչդեռ կան երկրներ, որտեղ լուրջ ռեսուրսներ են ծախսում մեկնաբանությունների վերահսկողության համար: 

«Վատ արտահայտությունները հայերենում այնքան գռեհիկ են հնչում, որ դժվար կայքն օգտագործի դրանք: Օրենսդրական դաշտը մի քիչ հետ է ընկած, օրենքը գրվել է այն ժամանակ, երբ դեռ բլոգները, «ֆեյսբուքը» գոյություն չունեին»,- ասաց փորձագետը: Սամվել Մարտիրոսյանը, անդրադառնալով իրավական պատասխանատվությանը, նշեց, որ մեկնաբանությունները նաև բովանդակություն են ստեղծում, դրանք ներգրավվում են ընդհանուր եռուզեռի մեջ: «Ֆեյսբուքի» մեկնաբանությունների հավելվածն էլ կայքի համար հավելյալ այցելություններ է բերում, ու դժվար կլինի դատարանին համոզել, որ դա բովանդակության մի մասը չէ:

Փորձագետը նշեց, որ շարժը հիմա գնում է դեպի սահմանափակումներ, և հիշեցրեց վերջերս կայացած ՄԻԵԴ որոշումը, երբ էստոնական կայքում օգտատերերը մեկնաբանություններ են գրել, ՄԻԵԴ-ն ընդունեց որոշում, որն ընդդեմ կայքի էր:

«Դա կարող է լուրջ հետևանքներ ունենալ, սա խոսում է նրա մասին, որ լրատվամիջոցները պետք է սկսեն վերահսկել մեկնաբանությունները: Պետք է ողջամիտ ժամանակահատվածում ջնջվի մեկնաբանությունը, իսկ ողջամիտը, նշանակում է, որ կայքը պետք է նախամոդեռացում անի, իսկ դա լրացուցիչ ծախսեր է ենթադրում»,- ասաց նա:

Ասուլիսին ներկա էր նաև սոցիոլոգ Ահարոն Ադիբեկյանը, ով նկատեց, որ էթիկայի խնդիրները չեն կարող օրենքները կարգավորել, ըստ նրա՝ դա մարդկային հարաբերությունների հարց է: «Սահմանը բավական նուրբ է, ոչ նորմատիվային բառապաշարը յուրօրինակ է տարբեր երկրներում: Բարեբախտաբար, կայքեր կան, որ վերահսկում են նյութերը: Կան ֆիլտրեր, որ ադմինները կարող են վերահսկել եկող նյութերը: Ինտերնետը մարդկության էության արտացոլումն է, վեհն ու նսեմը համատեղ են հանդես գալիս, երևի պիտի ձգտենք, որ մարդկությունը լինի կատարյալ»,- ասաց նաև և հավելեց, որ ինտերնետից օգտվողները պետք է փորձեն մաքրել դաշտը:

Հոգեբան Իրինա Ծատուրյանը ինտերնետը նմանեցնում է ատոմային էներգիայի, որը կարող է և շատ վատ գործ կատարել, և լավ: «Դեռահաս տարիքից ինտերնետից օգտվելը նման է երեխային մութ անտառի սկզբում թողնել գնալուն: Մենք չգիտենք ինչ գազանի կհանդիպի նա այնտեղ: Մարդը, երբ մեծանում է, չի կարող կողմնորոշվել իրավիճակների մեջ, մտնում է մի դաշտ, որտեղ կարող է ինքն իրենց կորցնել: Ինտերնետը խոշորագույն ինֆորմացիա կրող է, բայց դա ոչ միշտ է ճիշտ և պարզ: Ինտերնետով ծանոթությունների հետևանքով էլ են լուրջ խնդիրներ լինում, կարող է լինել տրաֆիկինգի վտանգ, շատ հաճախ սեռն են փոխում, տղան հանդես է գալիս աղջկա անվան տակ, և հակառակը: Երիտասարդը, որի հոգեկանը կարգավորված չէ, մտնում է այդ խառը իրավիճակի մեջ: Մենք գործ ունենք մի բանի հետ, որ մարդը խեղաթյուրվում է, չի հասկանում ում հավատալ, ում՝ ոչ»,- ասաց նա: