Ձեր վստահելի աղբյուրը

ՀՀ առողջապահության նախարար Դերենիկ Դումանյանի մոտ տեղի ունեցած աշխատանքային խորհրդակցության ժամանակ քննարկվել են համակարգում ֆինանսական միջոցներն առավել նպատակային ծախսելու, ինչպես նաև ոլորտում առկա բացթողումների և անառողջ երևույթների դեմ պայքարի հարցերը։ Այս մասին հայտնում են նախարարության մամուլի ծառայությունից:

«Համակարգում շատ անցանկալի երևույթ է նկատվում։ Պետության կողմից անվճար բուժում ստանալու իրավունք ունեցող քաղաքացիներին մերժում են բժշկական օգնություն ցույց տալ` պատճառաբանելով, թե միջոցները սպառվել են։ Հավաստիացնում եմ, որ յուրաքանչյուր նման դեպք առանձնահատուկ քննարկման առակա կդառնա և մեղավորները խստությամբ կպատժվեն, քանի որ միջոցները նախատեսված են ողջ տարվա համար»,- ասել է Դերենիկ Դումանյանը։

Նախարարը միաժամանակ խստությամբ պահանջել է բուժհաստատություններում հարգալից վերաբերմունք ցուցաբերել բոլոր հիվանդների նկատմամբ` հայտնելով, որ ստացված դժգոհությունների դեպքում կպատժվեն հիվանդանոցների տնօրենները։

«Գաղտնիք չէ, որ առողջապահության համակարգի բյուջեն ավելի փոքր է, քան կպահանջվեր նախանշված բոլոր ծրագրերը լիովին և ցանկալի մակարդակով իրականացնելու համար։ Այս պարագայում չափազանց կարևորվում է եղած ֆինանսական միջոցներն առավել արդյունավետ և խիստ նպատակային օգտագործելը։ Դեռևս մտահոգիչ է բժշկական օգնության որակը։ Դրա համար մենք պետք է խոր վերլուծություններ կատարենք և հստակեցնենք, թե հատկապես որտեղ են միջոցներն անարդյունավետ իրացվում, որտեղ կան դրանք տնտեսելու իրական հնարավորություններ։ Միաժամանակ պետք է ուժեղացնենք վերահսկողությունը պետական ծրագրերի իրականացման որակի նկատմամբ»,-ասել է նախարարը։

Հիշեցնենք, որ Panorama.am-ը նմանատիպ մի քանի իրավիճակի մասին ահազանգ էր ստացել, երբ սեպտեմբերի կեսերին շաքարով հիվանդներին Երևանի բուժհիմնարկներից մեկում հրաժարվել են անալիզներ վերցնել, մեկ հղիի հրաժարվել են պետպատվերով հետազոտել և այլն:

Նախարարությունից նաև հայտնում են, որ Դումանյանը կարևորել է նաև արդյունավետ կառավարման, պետական ծրագրերի` առաջին հերթին ծննդօգնության և երեխաների հիվանդանոցային պատշաճ մակարդակի բուժօգնության կազմակերպման, ֆինանսների ծախսման թափանցիկության ապահովման ու այլ հարցեր։

Նախարարության ստորաբաժանումների և առանձին ծառայությունների ղեկավարներին Դերենիկ Դումանյանը հանձնարարել է վերլուծությունների հիման վրա, ըստ առանձին ոլորտների ֆինանսական միջոցների արդյունավետ և թափանցիկ ծախսման, վերահսկման գործող մեխանիզմների ներդրման ծրագրեր մշակել։ Հետագայում դրանք կամբողջացվեն` դառնալով մեկ միասնական ծրագիր։

Նախորդիվ`

Ի՞նչ անել, որպեսզի պետպատվերը հասանելի լինի ամբողջ տարի . Պատասխանում է նախարարը