Ձեր վստահելի աղբյուրը

 Նոյեմբերի 14-ին «Արամ Խաչատրյան» համերգասրահում տեղի ունեցավ Խ. Աբովյանի անվան հայկական պետական մանկավարժական համալսարանի «Լավագույն ուսանող» մրցանակաբաշխությունը։ Լավագույնի կոչմանն արժանացավ բուհի հատուկ կրթության ֆակուլտետի ուսանողուհի Ասյա Հակոբյանը։


 Մանկավարժական համալսարանի ուսանողական խորհրդի նախագահ Ներսիկ Մարգարյանը տեղեկացրել է, որ բուհում «Լավագույն ուսանող» մրցանակաբաշխությունն ամենամյա է։ Ըստ Հայաստանի երիտասարդական հիմնադրամի հասարակայնության հետ կապերի ծառայության`10 ֆակուլտետային լավագույն ուսանողներից ընտրվում է բուհի լավագույնը։

Լավագույն ուսանողի ընտրությունը տեղի է ունենում ըստ հաստատված կանոնակարգի, և հիմք են ընդունվում մի շարք չափանիշներ՝ առաջադիմություն, հասարակական ակտիվություն և այլն։ Ֆակուլտետային 10 լավագույն ուսանողները պարգևատրվեցին նոութբուքերով, իսկ բուհի լավագույն ուսանողն իր ամառային 8-օրյա հանգիստը կանցկացնի Իտալիայում։

Հայաստանի երիտասարդական հիմնադրամի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը նշեց, որ նման մրցանակաբաշխությունները նպատակ ունեն ուսանողներին ցույց տալու, որ գիտելիքը, բարձր առաջադիմությունը խրախուսվում է։ «Հայաստանի երիտասարդական հիմնադրամի կողմից ամեն ինչ արվում է, որպեսզի նման ծրագրերն ուսանողության շրջանում ավելի հաճախակի լինեն։ Ուսանողը պետք է համոզված լինի, որ ինքն իր ուժերով կարող է հասնել նվաճումների, և նրա գիտելիքը կարող է գնահատվել տարբեր բնագավառներում»,- ասաց Կարեն Ավագյանը։

Նա նաև նկատեց, որ գերազանց առաջադիմությամբ և ակտիվությամբ հատկապես առանձնանում են իգական սեռի ներկայացուցիչները։ Ընդ որում, մանկավարժական համալսարանի բոլոր 10 ֆակուլտետներում էլ լավագույնի կոչմանն այս տարի արժանացան ուսանողուհիները։

Լավագույն ուսանող ճանաչված Ասյա Հակոբյանը լրագրողների հետ զրույցում ասաց, որ լավագույնը ճանաչվելու համար ոչ մի գաղտնիք գոյություն չունի, պարզապես պետք է լավ սովորել ու հավատալ ուժերին։ 

Նշենք, որ Խ. Աբովյանի անվան հայկական պետական մանկավարժական համալսարանի «Լավագույն ուսանող՚» մրցանակաբաշխությունը կազմակերպել էին Հայաստանի երիտասարդական հիմնադրամն ու բուհի ուսանողական խորհուրդը։