Ձեր վստահելի աղբյուրը

Բարձրագույն կրթական հաստատություններում անվճար սովորող ուսանողների 80 տոկոսը չի շարունակի ուսումը, եթե տեղափոխվի վճարովի համակարգ: Նման պատկեր են ցույց տվել սոցիոլոգիական հարցումները, որ կատարել են ՍԴՀԿ «Սարգիս Տխրունի» ուսանողական երիտասարդական միությունը և Երևանի պետական մանկավարժական համալսարանի ուսանողները:

Վարձավճարները բարձրացրած հինգ բուհերի 200 ուսանողների շրջանում անցկացված սոցհետազոտության արդյունքներն այսօր լրագրողների հետ հանդիպմանը ներկայացրեցին «Սարգիս Տխրունի» ուսանողական երիտասարդական միության ատենապետ Վարազդատ Եղիազարյանը և Մանկավարժական համալսարանի ուսանող Շուշանիկ Խաչատրյանը:

Ըստ նրանց՝ Մանկավարժական համալսարանում պատկերը դրական է, վարձերը չեն փոխվել: «Մեր պետությունը, այն կառույցները, որ թանկացումներ են անում, չեն հաշվի առնում ընտանեկան զամբյուղը: Մեր ծնողները ստիպված գնում են արտերկիր աշխատելու, մինիմում մոտ 45 հազար է աշխատավարձը, ընտանիքի միջին ծախսը՝ 60 հազար դրամ»,- ասաց Վարազդատ Եղիազարյանը:

Նա ընդգծեց, որ վարձավաճարները բուհերը պետք է իջեցնեն. «Աշխատավարձերի բարձրացում չկա, կրթամակարդակի բարձրացում չկա: Ուսման վարձերը բարձրացրել են, որ աղքատներն ավելի աղքատանան, հարուսները՝ ավելի հարստանան»:

Շուշանիկ Խաչատրյանը տեղեկացրեց, որ հարցվածների 10%-ը սովորում է անվճար, 90%-ը վճարովի համակարգում, իսկ 2-3 %-ը օգտվում է զեղչերից: «Անվճարների 80%-ը նշել է, որ եթե տեղափոխվի վճարովի համակարգ չի շարունակի ուսումը: Հարցմանը մասնակցած ուսանողների միջին ընտանիքների միջին բյուջեն 80 հազար դրամից ցածր է, իսկ ուսմանը հատկացվող ծախսերը կազմում են 50-60 հազար դրամ»,- ասաց նա և տեղեկացրեց, որ միայն 0,1%-ն է նշել, որ սոցիալական վիճակը բաձր է, իսկ մյուսների մոտ միջին և միջինից ցածր է:

Վարազդատ Եղիազարյանն էլ նշեց, որ կառավարությունից 50% սուբսիդավորում են պահանջում՝ մարզերից եկած ուսանողների, սոցիալապես անապահովների համար, նրանք պատաստվում են գրավոր առաջարկ ներկայացնել տարբեր ատյաններ: