Ձեր վստահելի աղբյուրը

«Haqqin.az» լրատվական գործակալությունն անդրադարձել է երեկ Վիեննայում ՀՀ նախագահ Սերժ Սարգսյանի և Ադրբեջանի նախագահ Իլհամ Ալիևի միջև տեղի ունեցած հանդիպմանը: Պարբերականը նշել է, որ հանդիպման մասին տեղեկատվություն ստացել են միայն «Twitter» սոցիալական ցանցում ՀՀ նախագահի մամուլի խոսնակ Արման Սաղաթելյանի գրառումներից և Ազատություն ռադիոկայանի հայկական ծառայության հաղորդումներից, քանի որ Իլհամ Ալիևի մամուլի խոսնակ Ազեր Հասիմովը որևէ տեղեկություն չի հաղորդել:

Հոդվածը որոշ կրճատումներով ներկայացնում ենք թարգմանաբար.

««Վիեննայում սկսվեց Սերժ Սարգսյանի և Իլհամ Ալիևի հանդիպումը»: Այս մասին «Twitter» սոցիալական ցանցի իր միկրոբլոգում գրել է Հայաստանի նախագահի մամուլի քարտուղար Արման Սաղաթելյանը: Եվ այդ լուրը վերատպել են ոչ միայն հայկական, ռուսական, եվրոպական, այլև ադրբեջանական ԶԼՄ-ները: Քանի որ Ադրբեջանի նախագահի մամուլի ծառայության ղեկավարը լռում էր:

Իսկ Արման Սաղաթելյանը գրեթե ամեն րոպե թարմացնում էր հաղորդագրությունները «Twitter»-ում: Տեղեկատվական տարածությունում բաց էր թողնվում Սերժ Սարգսյանի յուրաքանչյուր քայլի մասին տեղեկատվություն: Որը, կրկին, վերատպում էին արտասահմանյան ԶԼՄ-ները: Նույնը ստիպված էինք անել և մենք:

«Սերժ Սարգսյանը հայտարարել է, որ երեքշաբթի Վիեննայում Ադրբեջանի ղեկավար Իլհամ Ալիևի հետ բանակցությունները նորմալ են ընթացել»: Ո՞վ է այս մասին հաղորդում: Ազատություն ռադիոկայանի հայկական ծառայությունը:

Հետաքրքիր հարց. արդյունքում մենք ի՞նչ ստացանք: Ստացանք հաղորդագրությունների հարկադիր մեջբերում, որը տարածում էր Հայաստանի նախագահի մամուլի ծառայության ղեկավարը և Ազատություն ռադիոկայանի հայկական ծառայությունը: Ինչպե՞ս դա անվանել: Ադրբեջանի տեղեկատվական տապալում Իլհամ Ալիևի և Սերժ Սարգսյանի վիենական հանդիպման լուսաբանման հարցում:

Հարց է առաջանում, թե ինչո՞ւ էր անհրաժեշտ մեզ, ադրբեջանցի լրագրողներին ստորացնել, ընդ որում այն աստիճան, որ մենք սեփական նախագահի մասին տեղեկատվություն ստանում ենք ոչ թե անգամ ավստրիական, այլ հայկական ԶԼՄ-ներից: Եվ այսքանից հետո մենք հպարտորեն հայտարարում ենք Ադրբեջանի ֆենոմենալ զարգացման և հայկական տնտեսության նկատմամբ նրա բազմակի գերազանցության մասին:

Չ՞է որ երկրում կան մի քանի ծառայություններ, որոնք ուղղակիորեն զբաղվում են տեղեկատվական անվտանգությամբ՝ Նախագահի աշխատակազմում, Ազգային անվտանգության ծառայությունում, Ներքին գործերի նախարարությունում և Վագիֆ Ախունդովայի ծառայությունում (Ադրբեջանի նախագահին ուղղակիորեն ենթակա Ադրբեջանի պետական պահպանության հատուկ ծառայություն – խմբ.): Եթե նրանց համար դժվար չէ, ապա թող Սերժ Սարգսյանի հետ Իլհամ Ալիևի վիենական հանդիպման ողջ տեղեկատվությունը հանեն և ուշադրություն դարձնեն, թե որտեղի՞ց է ողջ ադրբեջանական մեդիան բառացիորեն կտորներով հավաքել Ղարաբաղի ճակատագրի շուրջ բանակցություններից տեղեկատվությունը. Հայաստանից:

Հարց է առաջանում. հանուն ինչի՞ են Ադրբեջանում գործում տեղեկատվական անվտանգության ապահովման այդ բոլոր ծառայությունները: Եվ ի՞նչ է այս ամենից հետո իրենից ներկայացնում տեղեկատվական անվտանգությունը: Հանուն ինչի՞ Ադրբեջանում գոյություն ունեն ԶԼՄ-ներ, որոնք երկրի համար ամենապատասխանատու պահին հղում են անում «թշնամական աղբյուրներին»: Ո՞ւմ է պետք նախագահի մամուլի ծառայությունը, և առաջին հերթին արդյոք նա ինքը ո՞ւնի դրա կարիքը: Ինչի՞ համար է Իլհամ Ալիևը արժանացել սեփական աշխատակազմի կողմից նման վերաբերմունքի: Պետության, մեզ բոլորի համար սա շատ ամոթալի է»: