ԿԳՆ. Առնվազն անհասկանալի է, թե ինչու է ամեն տարի հատկապես «Գագիկ Ծառուկյան» հիմնադրամի պարագայում առաջանում թյուրընկալում

Մեկնաբանություններ 17:00 20/11/2013

ԿԳ նախարարությունը տարածել է պարզաբանում` «Գագիկ Ծառուկյան» հիմնադրամի կողմից կրթաթոշակներ տրամադրելու խնդրի վերաբերյալ:

«Հարկ ենք համարում տեղեկացնել, որ ՀՀ կրթության և գիտության նախարար Արմեն Աշոտյանին հասցեագրված ՀՀ ԱԺ պատգամավորներ, «Գագիկ Ծառուկյան» բարեգործական հիմնադրամի երիտասարդական ծրագրերի համակարգող Վ. Բաբայանի և ԲՀԿ Երիտասարդների Միության նախագահ Վ. Էնֆիաջյանի նամակներին տրվել են պատասխաններ: Վ. Բաբայանի և Վ. Էնֆիաջյանի գրությունների պաշտոնական պատասխանները առաքվել են համապատասխանաբար 04. 11.2013 թ. և 13.11.2013 թ.:

Միաժամանակ տեղեկացնում ենք, որ ՀՀ կրթության և գիտության նախարարությունը մեծ փորձ ունի բարեգործական հիմնադրամների հետ աշխատանքի, մասնավորապես համագործակցության հուշագրեր են կնքվել «Տաշիր» բարեգործական հիմնադրամի, Մարդկային ռեսուրսների զարգացման «Փյունիկ» համահայկական հիմնադրամի, Մոսկվայի «Կրթություն» կրթաթոշակային հիմնադրամի, «Բարեպաշտ սերունդ» հիմնադրամի և այլ հասարակական ու բարեգործական հիմնադրամների հետ:

Առնվազն անհասկանալի է, թե ինչու է ամեն տարի հատկապես «Գագիկ Ծառուկյան» բարեգործական հիմնադրամի պարագայում առաջանում թյուրընկալման խնդիր: Միաժամանակ հարկ ենք համարում տեղեկացնել, որ «Գագիկ Ծառուկյան» բարեգործական հիմնադրամի ղեկավար մարմինների կողմից պաշտոնական առաջարկի դեպքում` ՀՀ ԿԳ նախարարությունը պատրաստակամ է համագործակցել: ՀՀ ԿԳՆ-ն հավատարիմ է իր որդեգրած գործընկերային, բաց ու թափանցիկ գործելակերպին, և շահագրգիռ է համագործակցել բոլոր հասարակական, քաղաքացիական և բարեգործական կառույցների, ինչպես նաև տնտեսվարողների հետ՝ անկախ քաղաքական հայացքներից՝ ի շահ մեր երկրի ուսանողների:

Կից ներկայացնում ենք վերոնշյալ պատասխանները»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: