Ձեր վստահելի աղբյուրը

Հայաստանի Հանրապետության տարածքում կարտոֆիլի կարանտին վնասակար օրգանիզմներից առկա է կոլորադյան բզեզը, կարտոֆիլի ոսկեփայլ նեմատոդան, կարտոֆիլի քաղցկեղը և կարտոֆիլի ցեցը: Նման հայտարարությամբ է հանդես եկել ԳՆ սննդամթերքի անվտանգության պետական ծառայությունը` հիմք ընդունելով ծառայության կողմից անցկացված մոնիթորինգի արդյունքները:

Մոնիթորինգի արդյունքների համար հիմք են հանդիսացել նմուշառման և լաբորատոր փորձաքննության արդյունքները: Փորձաքննության է ենթարկվել շուրջ 6000 նմուշ, և արդյունքում վերոնշյալ հիվանդությունը Հայաստանի Հանրապետության տարածքում չի հայտնաբերվել գորշ փտում հիվանդություն:

Ինչպես Վրաստանի Հանրապետության սահմանային անցումային կետերից հետ վերադարձված կարտոֆիլի խմբաքանակներից, այնպես էլ դրանց աճման և պահեստային տարածքներից մեր կողմից իրականացվել են կրկնակի նմուշառում և լաբորատոր փորձաքննություն. արդյունքում կարտոֆիլի «գորշ փտում» հիվանդությունը չի հայտնաբերվել:

Այս տարվա ընթացքում կատարված մոնիթորինգի շրջանակներում առանձնահատուկ ուշադրություն է դարձվել կարտոֆիլատունկ տարածքներին, որտեղից վերցված նմուշների լաբորատոր փորձաքննության արդյունքներով խնդրո առարկա հիվանդությունը Հայաստանի Հանրապետության տարածքում կրկին չի հայտնաբերվել:

Հիշեցնենք, որ վրացական կողմը Հայաստանի Հանրապետությունում արտադրված կարտոֆիլի՝ Վրաստանի Հանրապետություն ներմուծման արգելքը փորձել է արդարացնել` նշելով, թե իբր բեռը վարակված է կարտոֆիլի «գորշ փտում» հիվանդությամբ, որը համարվում է բույսերի կարանտին վնասակար հիվանդություն:

«Չնայած այն հանգամանքին, որ Վրաստանի Հանրապետության սահմանային անցումային կետերից դեպի Հայաստանի Հանրապետության տարածք հետ վերադարձված կարտոֆիլը հիմնականում ուղեկցվել է Վրաստանի Հանրապետությունում կատարված լաբորատոր փորձաքննության եզրակացությամբ՝ այնուամենայնիվ, հարկ ենք համարում նշել, որ 2012 թվականի ընթացքում Սննդամթերքի անվտանգության պետական ծառայությունը Հայաստանի Հանրապետության ամբողջ տարածքում բույսերի վնասակար օրգանիզմների հայտնաբերման նպատակով իրականացրել է մոնիթորինգ»,-ասված է ծառայության հայտարարության մեջ:
Ծառայությունից ընդգծում են, որ կարտոֆիլի ցեցը աշխարհի գերակշիռ երկրներում, այդ թվում՝ Եվրամիության անդամ երկրներում, չի համարվում կարանտին օրգանիզմ: Չնայած այս հանգամանքին՝ Հայաստանի Հանրապետության տարածքից դեպի ցանկացած երկիր ցեցով վարակված կարտոֆիլի արտահանումը Ծառայության կողմից արգելվում է:

Ինչպես ավելի վաղ հայտնել էր Panorama.am-ը, այսօրվա դրությամբ Վրաստանի Հանրապետության Սադախլու սահմանային անցումային կետում առկա է Հայաստանի Հանրապետությունից արտահանված մոտ 350տ կարտոֆիլ: Ծառայություն տեղեկություններով յուրաքանչյուր բեռնատարից վրացական կողմը նմուշառում է իրականացրել և ուղարկել լաբորատոր փորձաքննության. այժմ սպասում են պատասխաններին:

«Խնդրի պարզաբանման և դրան լուծում տալու նպատակով վրացական կողմի հետ պայմանավորվածություն է ձեռք բերվել, որ եթե Վրաստանի Հանրապետության տարածքում կատարված լաբորատոր փորձաքննության արդյունքներով կարտոֆիլը վարակված ճանաչվի, ապա տվյալ խմբաքանակից հայկական և վրացական կողմերի մասնակցությամբ համատեղ նմուշառում պետք է իրականացվի և ուղարկվի երրորդ երկիր՝ լաբորատոր փորձաքննության, որի արդյունքներից ելնելով՝ կորոշվի խնդրի լուծումը»,-ասել էին ծառայությունից:

Նախորդող հրապարակումներ`

Բախչագուլյանի այցն արդյունք չտվե՞ց. Ծառայությունը դեռ հայտարարություն կանի

Կարտոֆիլային պատերա՞զմ. «Պատերազմները հո միայն զենքո՞վ չեն լինում»