Ձեր վստահելի աղբյուրը

Առողջապահության նախարարությունն ուսումնասիրությունների արդյունքում, ինչպես նաև պարբերաբար ստացած ահազանգերի հետևանքով պարզել է, որ ոչ բոլոր բուժհիմնարկներն են պահպանում պետպատվերի շրջանակներում ցուցաբերվող բուժօգնության սահմանված կարգը: Այս մասին ասուլիսում հայտարարեց ՀՀ առողջապահության նախարարության աշխատակազմի պետական առողջապահական գործակալության պետ Սարո Ծատուրյանը:

Ըստ նրա, պետպատվերի շրջանակներում անվճար կամ արտոնյալ պայմաններով բուժօգնություն ստացող քաղաքացիներին համապատասխան ծառայություններով ողջ տարվա ընթացքում ապահովելը հանդիսանում է առողջապահության նախարարության հետ պետպատվերի պայմանագիր կնքած յուրաքանչյուր բժշկական կազմակերպության առաջնահերթ պարտավորություններից մեկը. «Եթե խախտում են կարգը, նշանակում է խախտում են պայմանագիրը»:

«Պետք է բացառել այնպիսի իրավիճակները, որ որևէ պահից սկսած պետպատվերի շրջանակներում ցուցաբերվող ծառայության մատուցումը մերժվի այն պատճառաբանությամբ, թե տվյալ տարվա բյուջեն վերջացել է, պետպատվերի պայմանագրի գումարն ավարտվել է»,- ասաց Ս. Ծառուկյանը:

Նա նշեց, որ պայմանագրով սահմանվում է տվյալ կազմակերպության տարեկան կտրվածքով գլոբալ բյուջեն, որը, համաձայն գործող կարգի, բուժհիմնարկը պարտավոր է այն պլանավորել և ծախսել համամասնորեն, ամսեկան կտրվածքով՝ այդ նպատակով կատարելով նաև քաղաքացիների հերթագրում, եթե առաջանում է նման անհրաժեշտություն:

Կառավարության որոշմամբ սահմանված են այն հատուկ դեպքերը, երբ հերթագրում չի կարող կատարվել՝ սոցիալական հատուկ կարևորություն ունեցող և շրջապատի վրա վտանգ ներկայացնող հիվանդությունները, ծննդօգնությունը, 0-7 տարեկան երեխաների բուժօգնությունը և անհետաձգելի վիճակների բուժօգնությունը: Մնացած բոլոր դեպքերում բուժհիմնարկը պարտավոր է ձեռնարկել համապատասխան միջոցառումներ՝ հերթագրման թափանցիկ կարգ կիրառելու և բուժօգնության համար դիմող քաղաքացիների ֆինանսական հիմնավորումներով մերժման դեպքերը բացառելու համար:

«Եթե սահմանված կարգը պահպանվի բոլոր հիմնարկներում, զգալիորեն կբացառվեն քաղաքացիների արդարացի դժգոհությունները պետպատվերի հետ կապված»,- ասաց Ս. Ծատուրյանը: