Ձեր վստահելի աղբյուրը

 Նոյեմբերի 11-ից 12-ը Թբիլիսիում տեղի է ունեցել  Հարավային կովկասի լրատվամիջոցների 10-րդ կոնֆերանսը, որը կազմակերպել էր ԶԼՄ-ների ազատության հարցերով ԵԱՀԿ ներկայացուցչի գրասենյակը ԵԱՀԿ-ի՝ Երևանի և Բաքվի գրասենյակների հետ համատեղ: Այս մասին տեղեկացնում է կազմակերպության պաշտոնական կայքը:

Կոնֆերանսի օրակարգում էր լրատվամիջոցների ազատության մասին ԵԱՀԿ-ի համաձայնագիրը և թե որքանով է այն կյանքի կոչվել տարածաշրջանում: Կոնֆերանսի ավարտին ընդունվեց հռչակագիր:

Ինչպես «Panorama.am»-ին տեղեկացրեց ՀՀ ԱԳՆ խոսնակ Տիգրան Բալայանը՝ հայկական պատվիրակության, մասնավորապես ՀՀ նախագահի աշխատակազմի, խորհրդարանի և ԱԳՆ ներկայացուցիչների ջանքերով, հաջողվեց ամփոփիչ հռչակագրի  մեջ ներառել ԶԼՄ-ների միջոցով հակասեմիթականության, այլատյացության և ռասիզմի քարոզչության տարածման անթույլատրելիության մասին դրույթը:

«Մենք սա կարևոր խնդիր ենք համարում տարածաշրջանում: Այս հարցը ներառված էր նաև Եվրոպայի խորհրդում հայկական նախագահության առաջնայնությունների ցանկում: Ես բարձրացրեցի այս հարցը կոնֆերանսի ժամանակ, և մենք առաջարկեցինք ներառել այդ կետը կոնֆերանսի հռչակագրի մեջ: Մենք համառորեն պնդում էինք, որ այն ներառվի և երկար քննարկումներից հետո մեր առաջարկն ընդունվեց»,- մեզ հետ զրույցում ասաց Տիգրան Բալայանը:

Կոնֆերանսի հռչակագրում նշվում է, որ մասնակիցները ողջունում են այն փաստը, որ Հայաստանի, Ադրբեջանի և Վրաստանի իշխանությունների, ԶԼՄ-ների, քաղաքացիական հասարակության և գիտական շրջանակների ներկայացուցիչները մասնակցել են կոնֆերանսին և քննարկել են լրատվամիջոցների ազատությանն առնչվող մի շարք հարցեր կառուցողական մթնոլորտում:

Նրանք քննադատել են լրագրողների հանդեպ տեղի ունեցող հալածանքները և կոչ են արել իշխանություններին միջոցներ ձեռք առնել այդ երևույթի կանխման համար, ինչպես նաև իրականացնել օրենսդրական բարեփոխումներ, ԵԱՀԿ համաձայնագրին համապատասխան՝ լրագրողների հանդեպ կամայական ձերբակալություններն ու հալածանքները կանխելու նպատակով:
Մասնակիցները նաև կոչ են արել իշխանություններին զերծ մնալ ցանկացած տիպի հակասեմիթականության, այլատյացության և ռասիզմի քարոզչության տարածմանն աջակցելուց, ինչպես նաև ԶԼՄ-ների ազատությունները սահմանափակող օրենքներ ընդունելուց: Նրանք նաև կոչ արեցին իշխանություններին ապահովել լրագրողների և բլոգերների անվտանգությունը թե° համացանցում և թե° համացանցից դուրս, զերծ մնալ առ-ցանց բովանդակության կոշտ վերահսկումից, ինչպես նաև ապահովել տեղեկատվական աղբյուրների բազմազանությունը:

Մասնակիցներն ընդգծել են  նաև ինքնակառավարման մարմինների, ինչպիսիք են օրինակ ԶԼՄ-ների գծով խորհուրդները, արդյունավետ գործունեության կարևորությունը: Կոչ արվեց նաև, որպեսզի ԶԼՄ-ների ազատության հարցերով ԵԱՀԿ ներկայացուցչի գրասենյակը մշակի այնպիսի մեխանիզմներ, որոնք կապահովեն, որ տվյալ հռչակագրում ամրագրված առաջարկությունները առավելագույնս նպաստեն տարածաշրջանում ԶԼՄ-ների ազատության բարելավմանը:

Միջոցառմանը ներկա է եղել մոտ 80 մասնակից, այդ թվում լրագրողներ, քաղաքացիական հասարակության ներկայացուցիչներ, պաշտոնյաներ, պատգամավորներ և գիտնականներ Հայաստանից, Վրաստանից և Ադրբեջանից, ինչպես նաև ԶԼՄ-ների հարցերով զբաղվող միջազգային փորձագետներ:

Հիշեցնենք, որ այս ամենամյա կոնֆերանսը անցկացվում է Թբիլիսիում 2004թ.-ից սկսած: Այս տարիների ընթացքում կոնֆերանսի ժամանակ քննարկվել են այնպիսի հարցեր, ինչպիսիք են ԶԼՄ-ների ազատությունը, տեղեկատվության ազատության միջազգային չափանիշները, բազմակարծությունը և համացանցի կառավարումը, տեղեկատվության և նոր տեխնոլոգիաների մատչելիությունը, լրագրողների կրթությունը և այլ հարցեր: