Հայտնի չէ, քանի մարդ է կեղծ դեղ օգտագործել, ինչ հետևանքներ են եղել
Դեղատներում այս պահին էլ ուսումնասիրություններ են կատարում` պարզելու, թե ինչպես է իրականացվում օրերս կեղծ ճանաչված դեղի («Դոստինեքս 0,5մգ դեղահատեր N1» (խմբաքանակ U148B և U148C) ) հետհավաքը: Այս մասին Panorama.am-ին ասաց ԱՆ Դեղորայքային քաղաքականության և բժշկական տեխնոլոգիաների վարչության պետ Անահիտ Մկրտչյանը:
Հիշեցնենք, որ դեղերը ներկրող «Վիտալեքս» ընկերությանն առաջարկվել է անհապաղ դադարեցնել դրանց շրջանառությունը և ապահովել հետհավաքը Հայաստանի Հանրապետության տարածքում գործող դեղատներից:
«Վերահսկողություն իրականացվում է»,-հավաստեց նախարարության պաշտոնյան, ավելացնելով, թե այս պահին ուսումնասիրության արդյունքների մասին ոչինչ ասել չի կարող:
Նախարարությունում տվյալներ էլ չունեն, թե քանի մարդ է ձեռք բերել և օգտագործել հիշյալ դեղը: Դեղի հետազոտությունն էլ իրականացվել է ոչ թե քաղաքացիների բողոքների, այլ մասնագետների կասկածների հիման վրա:
«Իրազեկ և պաշտպանված սպառող» ՀԿ-ն քաղաքացիներից դեղերի վերաբերյալ որևէ բողոք չի ստացել, բայց կազմակերպությունում եկել են եզրակացության, որ ոլորտում սպառողների իրավունքների ու շահերի պաշտպանության առումով խնդիրներ կան, իսկ սպառողների իրավունքների պաշտպանությունը բավականին ցածր մակարդակում է:
«Հիմա չկա վերահսկողություն իրականացնող մարմին, որը հետհավաքի գործընթացը վերահսկի և հանձնարարականը չկատարելու դեպքում դեղատանը պատասխանատվության ենթարկեն»,-ասաց ՀԿ նախագահ Բաբկեն Պիպոյանը:
Սրանով հանդերձ, ՀԿ-ն չի պատրաստվում ուսումնասիրություններ իրականացնել, ասում են անհնար է` «լծակներ չունեն, կարելի է բացառապես դեղարտադրողների կամ դեղատների ցանցի համագործակցությամբ»:
«Հիմա առողջապահության նախարարությունը կարծես ձևավորում է նոր մարմին, որը հնարավորություն կունենա շուկայում վերահսկողություն իրականացնել, ինչն այսօր չկա»,-ասաց ՀԿ նախագահ Բաբկեն Պիպոյանը:
Նա համարում է, որ դեղերի ներկրման փուլում սահմանային վերահսկողությունը վատ չի իրականացվում, բայց մտահոգություններ ունի, արդյո՞ք մաքսանենգ ճանապարհով դեղեր չեն ներկրվում Հայաստան, դրանք արդյո՞ք չեն հայտնվում դեղատներում:
«Սրանք հարցեր են, որոնց պատասխանը չունի սպառողը, մինչդեռ պետությունը պետք է այս հարցերի պատասխանները տար»,-ասաց նա:
Նոյեմբերի սկզին ԱՆ Դեղերի փորձագիտական կենտրոնի հրապարակած տվյալների համաձայն, վերջին մեկ տարվա ընթացքում դեղերի ներկրման փորձաքննության արդյունքում չի թույլատրվել ևս 12 անորակ դեղի ներմուծումը հանրապետություն: Կենտրոնը նաև հիշեցրել էր, որ Դեղերի փորձագիտական կենտրոնը տեսչական ստուգումներ անելու, ինչպես նաև պատժելու լիազորություններ չունի։
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
