Վարդան Պետրոսյանի մասնակցությամբ վթարից տուժած կողմը խնդրել է հանրությանը ազգովի նախաքննություն չկատարել
Եղվարդ-Երևան ճանապարհին հոկտեմբերի 20-ին տեղի ունեցած վթարի փաստով հարուցված քրեական գործի շրջանակներում տուժող ճանաչված «Նիվա» մակնիշի ավտոմեքենայի վարորդ Արթուր Հակոբյանի նոր փաստաբան Ռուբեն Բալոյանը վստահ է՝ առանց հիմքերի հնարավոր չէր, որ Վարդան Պետրոսյանի նկատմամբ կալանք կիրառվեր:
Նկատենք՝ Ռուբեն Բալոյանը, որը նախկինում աշխատել է որպես Երևան քաղաքի քննչական վարչության ճանապարհատրանսպորտային պատահարների քննությամբ զբաղվող քննիչ, Հանրապետությունում ավտովթարների գործերով զբաղվող հայտնի փաստաբաններից է:
Panorama.am-ի թղթակցի հետ զրույցում Ռուբեն Բալոյանն ասաց, որ երեկ, նոյեմբերի 21-ին Վերաքննիչ դատարանում բողոքի քննության ժամանակ ինքը խնդրել է իրեն ևս տրամադրեն այն փաստաթղթերը, որոնք կան պաշտպանական կողմի մոտ, որպեսզի կողմերը ներկայացված լինեն հավասար սկզբունքներով:
Փաստաբան Բալոյանն այս պահին հրաժարվում է նախաքննության տվյալներ հրապարակել, քանի որ հակառակը կարող էր խոչընդոտել նախաքննությանը: «Նախաքննության տվյալներ հրապարակելը կխոչընդոտի քննությանը և բոլորիս էլ պետք է արդար նախաքննություն: Թե չէ, ստացվում է, որ ազգովի նախաքննություն են կատարում, ինչը անընդունելի է: Մենք պետք է հնարավորություն տանք քննչական մարմնին կատարել օբյեկտիվ նախաքննություն», -մեզ հետ զրույցում նկատեց փաստաբանը:
Մեր խնդրանքով անդրադառնալով պաշտպանական կողմի այն հայտարարությանը, թե «Նիվա» մակնիշի կողային հայելիները բացակայել են, Բալոյանն ասաց, որ դա չհիմնավորված փաստ է, որը չպետք է դառնա «համաժողովրդական քննության առարկա»: «Ի՞նչ է նշանակում հայելիներ չեն եղել, բայց ինչի՞ հայելիներ չեն եղել: Իսկ ո՞վ է ասում, որ հայելիներ չեն եղել: Դա նույնն է, որ ես ասեմ՝ «ԲՄՎ»-ի առջևի լապտերների վրա ապակիներ չեն եղել: Ես չունեմ դրա իրավունքը: Եթե փորձաքննությամբ կպարզեն դա, նոր միայն այդ փաստը կհամարենք ապացուցված», -նկատեց փաստաբանը:
Տուժող կողմի համար, ըստ Բալոյանի, անընդունելի են մամուլում կոպիտ արտահայտություններով հրապարակումները, մասնավորապես, նա մատնանշեց ԶԼՄ-ներից մեկում տպագրված մի արտահայտություն՝ ««Նիվա»-ի մեջ խցկել են 6 հոգի մարդու»:
«Ի՞նչ է նշանակում խցկել են, չի կարելի նման վերաբերմունքի արժանացնել մարդկանց», - տարակուսած է տուժող կողմի ներկայացուցիչը: Նա պնդում է՝ ուղևորների քանակը և այս դեպքում, և ընդհանրապես, չի կարող վթարի պատճառ հանդիսանալ: Փաստաբանն ասաց, որ ինքը ընդամենը մեկ օր է, ինչ ներգրավվել է գործում, հետևաբար չի կարող գնահատականներ կամ դիտարկումներ ներկայացնել: Սակայն մինչև գործի նյութերին ծանոթանալը, նա ուսումնասիրել է վթարի մասին Գագիկ Շամշյանի լուսանկարները, որոնցում պարզ երևում է, որ «ԲՄՎ»-ի վարորդը կանգնած է հողածածկ գոտում: Իսկ դա, ըստ Բալոյանի, նշանակում է, որ բախման տեղը երթևեկելի մասից դուրս է, մինչդեռ պաշտպանական կողմը պնդում է, որ բախումը եղել է երթևեկելի մասում:
Փաստաբանի փոխանցմամբ, տուժող կողմին՝ Հակոբյանների ընտանիքին, հետաքրքրում է բացառապես օբյեկտիվ քննությունը և նաև այն, որ «անհարկի քննարկումներ չլինեն»:
«Տուժող կողմը խնդրում է, որ մեղավորության հարցը չդրվի համընդհանուր քվեարկության: Քվեարկությամբ չի որոշվելու մեղավորությունը, բայց այնպիսի տպավորություն է, որ ազգովի նախաքննություն ենք կատարում: Չի կարելի: Տուժող կողմի ողբերգությունը առ այսօր չի շահարկվել, բայց սիրված դերասան անունը շահարկում են: Չի կարելի սրանով վրդովեցնել տուժող կողմին: Եկեք կոռեկտ լինենք մեր հայտարարությունների մեջ. կա նախաքննության մարմին, թող միջնորդություններ ներկայացնեն ու պետք չէ անհարկի, վաղաժամ հանդես գալ հայտարարությամբ ու ավելորդ մեկնաբանություններ անել», -մեզ հետ զրույցում հայտարարեց փաստաբան Բալոյանը:
Նշենք, որ նոյեմբերի 21-ին Վերաքննիչ դատարանը անփոփոխ է թողել Կոտայքի մարզի ընդհանուր իրավասության դատարանի որոշումը, և Վարդան Պետրոսյանը կշարունակի մնալ կալանքի տակ: Պետրոսյանի փաստաբան Նիկոլայ Բաղդասարյանը հայտարարել է, որ դիմելու է Վճռաբեկ դատարան՝ հասկանալու, թե ինչու են առանց հիմքերի կալանավորել իր պաշտպանյալին։ «Ես ուզում եմ մի բան անել, որ այս գործը գնա հաշտության, որովհետև երկու մարդ է մահացել: Եթե այդքան բանը չեն հասկանում քննիչը կամ իր վերադասները, ես այդքան բանը հասկանում եմ»,- դատական նիստից հետո ասել էր փաստաբանը:
Նախորդիվ`
Վարդան Պետրոսյանը ցուցմունք է տվել ու ասել , որ հրաժարվում է մասնակցել քննիչ Հակոբյանի քննչական գործողություններին
«Դեռասանն, մեյմունություն է անում». Վ. Պետրոսյանի փաստաբանը ոստիկանապետին խնդրում է պատժել քննիչ Հակոբյանին
Վարդան Պետրոսյանի կալանքի որոշման դեմ բողոքը Վերաքննիչ դատարանում կքննվի նոյեմբերի 21-ին
Վարդան Պետրոսյանի կալանքի մասին որոշումը դատարանը ընդունել է խախտումներով. Փաստաբանը թվարկում է դրանք
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
