Ձեր վստահելի աղբյուրը

5 տարեկան Լիզայի բուժման համար դրամահավաքը շարունակվում է. արդեն մեկնարկել է «Նախատոնական հրաշք» անվանումով բարեգործական ֆեյսբուքյան աճուրդ, որից ստացված գումարների մի մասը կուղղվի Լիզայի և ևս երեք երեխաների բուժմանը: Այդ մասին Panorama.am-ին տեղեկացրեց աճուրդի կազմակերպիչներից Արևիկ Բադալյանը:

«Մոտեցող տոների կապակցությամբ մարդիկ աճուրդում առաջարկվող իրերի շարքից կարող են իրենց նվերներն ընտրել՝ միաժամանակ նպաստելով փոքրիկների առողջացմանը: Երեխաների առողջացման համար շատ մեծ քայլ կատարած կլինեն», մեզ հետ զրույցում ասաց Արևիկ Բադալյանը` նշելով, որ աճուրդը կազմակերպվում է Առողջ մանկություն հիմնադրամի նախաձեռնությամբ:

Բացի այդ, նա տեղեկացրեց նաև, որ Լիզայի բուժման գործին միացել է նաև Կոմիտասի անվան կամերային երաժշտության տան անձնակազմը. դեկտեմբերի 25-ին Կամերային երաժշտության տանը Հայաստանի պետական կամերային նվագախումբը և «Հովեր» կամերային երգչախումբը հանդես կգա համերգով, որից ստացված ողջ հասույթը կուղղվի փոքրիկ Լիզայի բուժման ծախսերին:

Նկատենք, որ օրերս «Արթբրիջ»-ում մարդիկ 161 հազար դրամի հանգանակություն տվեցին Լիզայի բուժման համար և «Skype»-ի միջոցով կարողացան տեսնել երեխային, խոսել նրա մայրիկի հետ:

Panorama.am-ը Լիզայի առողջական վիճակին բազմիցս է անդրադարձել. տեղեկացրել ենք, որ երեխայի մոտ գլխուղեղի ուռուցք է հայտնաբերվել: Երևանում վիրահատությունից հետո բժիշկները խորհուրդ էին տվել բուժումը շարունակել արտերկրում, քանի որ այստեղ այդ հնարավորությունները չկան: Բազմաթիվ բարի մարդկանց նվիրատվությունների օգնությամբ Մոսկվայում երեխավիրահատվեց և այժմ արդեն քմիոթերապիայի 5-րդ փուլը պետք է անցնի: Բժիշկներն ասել են, որ սա ամենաբարդ փուլն է և երկար է տևելու: Մինչ այժմ Պողոսյանների ընտանիքին օգնել են «Կ. Խաբենսկու» անվան ռուսական բարեգործական հիմնադրամը և 5000 ԱՄՆ դոլարով «Նվիրիր կյանք» հիմնադրամը: Սակայն այժմ նրանք չեն կարող օգնել և Պողոսյանների ընտանիքը դարձյալ օգնության կարիք ունի:

Մարդիկ, ովքեր կցանկանան օժանդակություն տալ ներկայացնում ենք Լիզայի հայրիկի՝ Դավիթ Պողոսյանի անունով բացված հաշվեհամարի տվյալները.

ՎՏԲ - Հայաստան Բանկ
AMD 16004052756801
USD 16004052756802
EUR 16004052756803
RUR 16004052756804

Արտերկրից փոխանցումները կարելի է անել հետևյալ կերպ «VTB BANK» (ARMENIA) CJSC Yerevan, Armenia SWIFT: ARMJAM22
Ովքեր ունեն ARCA կրեդիտ քարտ, կարող են arca.am-ում գրանցել իրենց քարտը, որպեսզի օնլայն կատարեն փոխանցումները: 16 նիշանոց թիվն է` 9051210205309960