Ձեր վստահելի աղբյուրը

«Ավագ դպրոցների 11-րդ դասարաններում Հայոց լեզու, Գրականություն, Հանրահաշիվ և Երկրաչափություն առարկաներից աշակերտների գիտելիքները, մեղմ ասած, ցածր մակարդակի վրա է: Գնահատման և թեստավորման կենտրոնը 2013 թվականի փետրվար-մարտ ամիսներին արտաքին գնահատման վերլուծություն է կատարել Հանարապետության 19 ավագ, 41 միջնակարգ դպրոցների և 3 պետական վարժարանների 11-րդ դասարանների 4111 աշակերտների շրջանում: Նրանց գիտելիքներն արտաքին գնահատման են ենթարկվել՝ նպատակ ունենալով պարզել նշված առարկաներից առաջադիմության դինամիկան»: Այսօր լրագրողների հետ հանդիպմանը վերլուծությունը ներկայացրեց Կրթության ազգային ինստիտուտի փոխտնօրեն Անահիտ Բախշյանը, ում արդյունքները շատ են տխրեցրել:

Արտաքին և ներքին գնահատման համեմատությամբ վերլուծությունը ցույց է տվել, որ աշակերտների 47 տոկոսը չի առաջադիմել Հայոց լեզու, Գրականություն, Հանրահաշիվ և Երկրաչափություն առարկաներից: Արտաքին գնահատման և ներքին գնահատման արդյունքներով 16 տոկոսն է առաջադիմել: Միջին առաջադիմությունը 37 տոկոս է:

Հայոց լեզվից միջին գնահատականը 10 բալանոց համակարգով եղել է 5,1 և մաթեմատիկայից՝ 3,8:

Անահիտ Բախշյանը նկատեց, որ թեստերը կազմվել են պետական չափորոշիչի Ա՝ նվազագույն մակարդակի համապատասխան: «11-րդ դասարանում այսպիսի արդյունք է գրանցվում, իսկ 12-րդ դասարանից հետո բոլորն ավարտում են դպրոցը: Նման իրավիճակ ավարտական դասարաններում ու հանկարծ 99 տոկոսը դրական միավորներ են ստանում նույն ԳԹԿ կողմից անցկացված քննությունների արդյունքում: Կամ այդ մեկ տարվա ընթացքում կրկնուսույցները լավ վարժեցնում են, որը քիչ հավանական է, կամ ավարտական քննությունների արդյունքներն օբյեկտիվ չեն, արտաքին միջամտություն կա»,- ասաց նա:

Կրթության ազգային ինստիտուտի փոխտնօրենն այլ եզրակացություն դժվարանում է անել: «Ո՞վ է այս ամենի պատասխանատուն, ո՞վ և որտե՞ղ պիտի այս խնդիրները բարձրացնի: Ո՞վ պիտի համապատասխան վերլուծությունից հետո ասի՝ Կրթության ազգային ինստիտուտ, դու սա պիտի անես, եթե պետք է, նույնիսկ պետական չափորոշիչը վերանայել տա... կրթության վարչություններ, դուք սա պիտի անեք: Պիտի երևա, որ պետությունն անհանգստացած է այս ամենով, պիտի սկսի լարել զսպանակները»,- ասաց նա:

Անահիտ Բախշյանը նշեց, որ նույն վերլուծությունն արվել է նաև ոչ պետական դպրոցներում, որտեղ արդյունավետությունն ավելի բարձր է: «Այնտեղ ֆինանսավորումը չորս անգամ ավելի բարձր է, քան պետական ֆինանսավորումը: Երեխային լիարժեք կշտացնելու համար, նույնն է, որ մարդու ուղեղը մոտավորապես կրթվի, պետք է չորս-հինգ անգամ ավելի մեծ ներդրումներ անել, որ ստանանք այդ արդյունքը: Եթե այսպիսի համատարած վիճակ է, կապ չունի ում ենթակայության տակ է դպրոցը: Կա ախտորոշելու անահրաժեշտություն: Այդքան խոսում ենք ավագ դպրոցի կայացման մասին, իսկ այս վերլուծությունը խոսում է այն մասին, որ ավագ դպրոցում կրթությունը բոլորովին մեր երազածը չէ: Հնչեցնում ենք այս ահազանգը, որ պետական լիազոր մարմինը հասկանա՝ հերիք է իրար աչքերին թոզ փչենք: Նայենք իրականության աչքերին և անենք շատ արմատական կտրուկ, նույնիսկ ցավեցնող քայլեր ՝ հանրակրթական կրթության որակը բարձրացնելու համար»,- ասաց նա:

Անահիտ Բախշյանը տեղեկացրեց նաև, որ անանուն հարցումներ են կատարվել նաև ուսուցիչների և տնօրենների շրջանում: Տնօրենների 48 տոկոսը մտահոգված է ուսուցիչների մասնագիտական պատրաստվածության պակասով, 21 տոկոսը գտնում է, որ նրանք կարիք ունեն մասնակցելու առարկայական, 62 տոկոսը մեթոդական, 39 տոկոսը հոգեբանամանկավարժական թեմաներով վերապատրաստումների: