Ձեր վստահելի աղբյուրը

 Նոյեմբերի 24-ին Վրաստանի նախկին վարչապետ Բիձինա Իվանիշվիլին պաշտոնապես հայտարարել է քաղաքականությունից հեռանալու մասին: Վերոնշյալի առնչությամբ պարզաբանումներ ստանալու նպատակով Panorama.am-ը զրուցել է Վրաստանի հարցերով փորձագետ Ալիկ Էրոյանցի հետ:

- Ինչպե՞ս կմեկնաբանեք Իվանիշվիլիի հրաժարականն ու քաղաքականությունից նրա հեռանալը:

- Նախ ասեմ, որ Վրաստանի՝ արդեն նախկին վարչապետի վերոնշյալ որոշումն անակնկալ չէր, քանզի վերհիշելով նախորդ երկու տարվա ընթացքում հարևան Վրաստանում տեղի ունեցած ներքաղաքական զարգացումները, հասկանում ենք, որ Իվանիշվիլիի պաշտոնավարումը հենց նման տրամաբանական ավարտ պետք է ունենար: Բանն այն է, որ դեռևս 2011թ.-ի հոկտեմբերի 5-ին` մինչև իշխանության գալն, Իվանիշվիլին հայտարարել էր քաղաքականություն մուտք գործելու, ապա երկու-երեք տարի հետո քաղաքականությունից հեռանալու իր նպատակների մասին: Նաև հարկ է նշել, որ 2012թ.-ի խորհրդարանական ընտրություններին և վարչապետի պաշտոնը ստանձնելուն հաջորդած երկամյա ժամանակահատվածում գրեթե բոլոր կարևոր հանդիպումների, միջոցառումների, հարցազրույցների և ասուլիսների ժամանակ Իվանիշվիլին մշտապես կրկնել է, որ նախագահական ընտրություններից հետո թողնելու է վարչապետի պաշտոնը և հեռանալու է քաղաքականությունից: Այնպես որ նախապես ամեն-ինչ որոշված էր:

- Իսկ ինչո՞վ էր պայմանավորված Իվանիշվիլիի կողմից նախագահական ընտրություններին հաջորդած ժամանակահատվածի ընտրությունը՝ քաղաքականությունից հեռանալու որոշումն իրականացնելու համար:

- Նախկին վարչապետի հիմնական նպատակն, ըստ էության, Միխեիլ Սաակաշվիլիի իշխանության և նրա թիմի տապալումն էր, դրան զուգահեռ` նոր խորհրդարանի և կառավարության կազմավորումը: Ս.թ. հոկտեմբերին կայացած նախագահական ընտրություններում Միխեիլ Սաակաշվիլին իրավասու չէր որպես նախագահի թեկնածու հանդես գալու, իսկ վերջինիս առաջնորդած «Միացյալ ազգային շարժում» կուսակցության թեկնածուն պարտություն կրեց: Արդյունքում նախագահ ընտրվեց Իվանիշվիլիի ղեկավարած «Վրացական երազանք» կոալիցիայի կողմից առաջադրված թեկնածուն` Գիորգի Մարգվելաշվիլին: Այդպիսով նախկին իշխանություններին եկավ փոխարինելու քաղաքական տարբեր ուժերից բաղկացած «Վրացական երազանք» կոալիցիան, որի ներկայացուցիչներն այսօր խորհրդարանում կազմում են մեծամասնություն, իսկ կառավարությունն ամբողջությամբ ձևավորված է վերոնշյալ կոալիցիայի անդամներից: Ուստի ներկայում Վրաստանում ստեղծված ներքաղաքական պատկերն, իհարկե, թույլ է տալիս հստակ արձանագրել, որ Իվանիշվիլին լուծեց իր առջև դրված թիվ մեկ խնդիրը. Սաակաշվիլին այլևս իշխանություն չունի:

- Ձեր կարծիքով ինչպե՞ս կզարգանան հետագայում իրադարձությունները Վրաստանի շուրջ և ի՞նչ գործունեություն կծավալեն Սաակաշվիլին և Իվանիշվիլին:

- Իվանիշվիլին բազմիցս հայտարարել է, որ ինքը մնալու է ժողովրդի կողքին, ակտիվ գործելու է հասարակական դաշտում, պաշտպանելու է ժաղովրդի շահը: Ակնհայտ է, սակայն, որ չլինելով քաղաքականության մեջ, նա անուղղակիորեն մասնակցելու է քաղաքական գործընթացներին և անմիջական շփումներ է ունենալու գործող իշխանությունների ներկայացուցիչների հետ` շարունակելով լուրջ ազդեցություն ունենալ իշխող քաղաքական ուժի վրա` որոշումների կայացման տեսանկյունից: Ինչ վերաբերում է նախկին նախագահ Միխեիլ սաակաշվիլիին, կարծում եմ` վերջինս ապագա ծրագրերի մասով դեռ չի կողմնորոշվել, սակայն կարելի է կանխատեսել, որ նա կշարունակի հանդես գալ դասախոսություններով աշխարհի հայտնի ԲՈՒՀ-երում, կարող է նաև հենց ինքը դառնալ որևէ համալսարանի ղեկավար: Հետագայում չի բացառվում, որ Սաակաշվիլին ընտրվի Եվրախորհրդարանի պատգամավոր, իսկ տարիներ անց կրկին փորձի Վրաստանում գալ իշխանության: Զարգացումները Վրաստանի շուրջ, ընդհանուր առմամբ, կլինեն ավելի ակտիվ և հետաքրքիր թե՛ ներքին և թե՛ արտաքին քաղաքականության մասով: Նորընտիր կառավրությանը դժվարին ժամանակներ են սպասվում, քանի որ խնդիրները բազում են և արդիական՝ սոցիալ-տնտեսական վիճակի բարելավումից մինչև արևմտյան ինտեգրացիոն գործընթացների զարգացում, զուգահեռ նաև Ռուսաստանի հետ հարաբերությունների կարգավորում, անմիջական հարևանների հետ համագործակցության խորացում: Դրանք են լինելու այն խնդիրները, որոնք պետք է մշտապես գտնվեն Վրաստանի կառավարության ուշադրության կենտրոնում, այլապես, ձախողման դեպքում, հասարակությունը կարող է անվստահություն հայտնել և ընդվզել գործող իշխանությունների դեմ: