«Իտար-Տասս». Ադրբեջանը ԵՄ-ի հետ կստորագրի վիզային ռեժիմի դյուրացման մասին համաձայնագիր

Քաղաքական 17:10 26/11/2013

Նոյեմբերի 28-29 Վիլնյուսի գագաթաժողովի շրջանակներում Ադրբեջանը ԵՄ-ի հետ կստորագրի վիզային ռեժիմի դյուրացման մասին համաձայնագիրը: Այս մասին տեղեկացնում է ИТАР ТАСС լրատվական գործակալությունը՝ հղում անելով Ադրբեջանի Արտաքին գործերի նախարարի տեղակալ Մահմուդ Մամեդգուլիևի հայտարարությանը:

«Մենք միանշանակ կստորագրենք վիզային ռեժիմի դյուրացման մասին համաձայնագիրը»,- նշել է փոխնախարար Մամեդգուլիևը:

Վերջինս նաև ավելացրել է, որ նախատեսվում է ԵՄ-ի հետ ստորագրել մի շարք այլ ոլորտների վերաբերող ռազմավարական գործընկերության մասին համաձայնագիր, ինչպես նաև ԵՄ ծրագրերում Ադրբեջանի ներկայությունը ընդլայնող արձանագրություն:

«Եթե մինչև Վիլնյուս մենք կարողանանք ավարտել փաստաթղթերի նախապատրաստական աշխատանքները, ապա դրանք կստորագրվեն Վիլնյուսում, իսկ եթե ոչ, ապա այդ գործընթացը տեղի կունենա ավելի ուշ»,- շեշտել է Մահմուդ Մամեդգուլիևը:

Ըստ տեղեկությունների՝ Վիլնյուսյան գագաթաժողովին ադրբեջանական պատվիրակությունը կգլխավորի նախագահ Իլհամ Ալիևը:

Ավելի վաղ էլ ադրբեջանական կողմը տեղեկացրել էր, որ Ասոցացված անդամության շուրջ որևէ փաստաթուղթ ԵՄ-ի հետ չի ստորագրելու Վիլյնուսում:

Տարբեր փորձագիտական գնահատականների համաձայն այս պահին Բաքվի և ԵՄ-ի հարաբերություններում հիմնականում առավել գերակշռող է էներգետիկ համագործակցության գործոնը, քան այլ բնույթի խնդիրներ:

Կանխատեսվում է, որ այդ համագործակցությունը ավելի առարկայական կդառնա այն բանից հետո, երբ «Շահ Դենիզ» կոնսորցիումը պատրաստակամություն հայտնեց եվրոպական շուկա գազ մատակարարել Տրանսադիրատիկ խողովակաշարով: Հենց դա է պատճառներից մեկը, որ «Արևելյան գործընկերության» նախագծի ադրբեջանական ընկալումը զգալիորեն տարբեր էր այդ նախագծի մասնակից այլ երկրներից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: