Ձեր վստահելի աղբյուրը

 «Մենք ոչ ոքի չենք խնդրում ճանաչել ուրանի հարստացման մեր իրավունքը, մենք այդ իրավունքն ունենք»,-այդ մասին իրանական «ՄԵՀՐ» լրատվական գործակալության հաղորդմամբ՝ հայտարարել է ԻԻՀ ԱԳ փոխնախարար Սեյյեդ Աբբաս Արաղչին:
Փոխնախարար Արաղչին, անդրադառնալով ԱՄՆ պետքարտուղար Ջոն Քերիի այն հայտարարությանը, թե ժնևյան համաձայնագրում «ուրանի հարստացման իրավունք» ձևակերպում չկա, մասնավորապես նշել է. «Իրանի՝ ուրանի հարստացման իրավունքն այնպիսի բան չէ, որը պետք է տան, մենք ոչ ոքի չենք խնդրում ճանաչել կամ մեզ տալ ուրանի հարստացման մեր իրավունքը»:

Շարունակելով խոսքը՝ ԻԻՀ փոխնախարարը հավելել է. «Մենք ինքներս ունենք այդ իրավունքը, հետևաբար ակնկալում ենք, որպեսզի մյուս երկրները ևս հարգեն մեր իրավունքը: Ժնևյան համաձայնագրում դա արձանագրվել է. «5+1 խմբի» անդամ երկրները, այդ թվում՝ ԱՄՆ-ն ընդունել են, որ Իրանի ուրանի հարստացման ծրագիրը շարունակություն է ունենալու»:

Արաղչին հերքել է, թե Ժնևում ստորագրված համաձայնագրի որոշ դրույթներ հնարավոր է վերանայվեն:

Նշենք, որ նոյեմբերի 23-ին տեղի ունեցավ պատմական իրադարձություն. Երկարամյա փակուղային իրավիճակից հետո Ժնևում

Իրանի և «5+1 խմբի» միջև ստորագրվեց համաձայնագիր, ըստ որի՝
1. Իրանը հայտարարում է, որ 6 ամսվա ընթացքում ուրանը 5 տոկոսից ավելի չի հարստացնի
2. Իրանի պետրոքիմիական արտադրանքի արտահանման և ոլորտի հետ կապված այլ ծառայությունների նկատմամբ սահմանված պատժամիջոցների կասեցում
3. Ոսկու և թանկարժեք մետաղների ոլորտում առկա սահմանափակումների կասեցում
4. Ավտոմոբիլային արդյունաբերության ոլորտի նկատմամբ ԱՄՆ-ի սահմանած պատժամիջոցների կասեցում
5. Իրանի քաղաքացիական ինքնաթիռների համար անվտանգ թռիչքներ ապահովելու նպատակով համապատասխան սերտեֆիկատի և անհրաժեշտ պահեստամասերի տրամադրում
6. ՄԱԿ-ի ԱԽ կողմից Իրանի նկատմամբ նոր պատժամիջոցներ չպետք է կիրառվեն
7. ԵՄ-ի կողմից Իրանի նկատմամբ նոր պատժամիջոցներ չպետք է կիրառվեն
8. ԱՄՆ-ի կառավարությունը նախագահի և Կոնգրեսի իրավասությունների շրջանակներում ձեռնպահ է մնալու Իրանի նկատմամբ նոր պատժամիջոցներ կիրառելուց:

Թեմայի առնչությամբ մեկնաբանություն՝
Իրանագետ. Ժնևյան համաձայնագիրը կնպաստի տարածաշրջանում խաղաղության և անվտանգության ապահովմանը