Ձեր վստահելի աղբյուրը

«Մանկական Եվրատեսիլ- 2013» երգի մրցույթում Հայաստանը ներկայացնող Մոնիկա Ավանեսյանը իր «Շոկո ֆաբրիկա» երգով ելույթ է ունենալու երրորդ համարի ներքո: Վիճակահանության ընթացքում մցույթի մասնակիցներն իրենք են իրենց ձեռքով հանել այն թվերը, որոնց ներքո պետք է ելույթ ունենան նոյեմբերի 30-ին: Այս մասին տեղեկանում ենք մրցույթի պաշտոնական կայքից:

Ըստ վիճակահանության, մրցույթի մասնակիցները ելույթ են ունենալու հետևյալ հերթականությամբ.
1. Շվեդիա
2. Ադրբեջան
3. Հայաստան
4. Սան Մարինո
5. Մակեդոնիա
6. Ուկրաինա
7. Բելառուս
8. Մոլդովա
9. Վրաստան
10. Նիդերլանդներ
11. Մալթա
12. Ռուսաստան

Նշենք, որ այս տարի մրցույթի կանոնակարգում որոշակի փոփոխություն էր կատարվել. վիճակահանությանը մասնակցել են հենց մրցույթի մասնակիցները, ոչ թե պատվիրակությունների ղեկավարները, ինչպես եղել է նախկինում:

«Մանկական Եվրատեսիլ- 2013»-ն այս տարի կանցկացվի նոյեմբերի 30-ին Կիևում «Եղիր ստեղծագործ» կարգախոսի ներքո, տարբերանշանն է Puzzle Man-ը: Այս տարի մրցանակային են համարվելու 1-ին, 2-րդ և 3-րդ հորիզոնականները: Հեղինակավոր մրցույթի հաղթողին կընձեռվի Կոպենհագենում կայանալիք «Եվրատեսիլ-2014» երգի մրցույթին հանդես գալու հնարավորություն, թեև դեռ հայտնի չէ, թե ինչ ձևաչափով:

Մոնիկա Ավանեսյանի «Շոկո ֆաբրիկա» երգի համահեղինակներն են հենց փոքրիկ երգչուհին և Էմմա Ասատրյանը, երգի գործիքավորումը կատարել է Մարտին Միրզոյանը, ելույթի ռեժիսորը Վահան Բադալյանն է, հագուստների հեղինակը մոդելավորող Լիլիթ Մարգարյանը:

Հիշեցնենք, որ Հայաստանը «Մանկական Եվրատեսիլին» առաջին անգամ մասնակցել է 2007 թվականին. «Արևիկ» մանկական խումբը իր «Երազանք» երգով, որի արդյունքում երկրորդ տեղը գրավեց 1 միավորի տարբերությամբ: 2008-ին Հայաստանը ներկայացրեց Մոնիկա Մանուչարովան, ով զբաղեցրեց 8-րդ հորիզոնականը: 2009-ին «Մանկական Եվրատեսիլին» մասնակցել է Լուարա Հայապետյանը՝ զբաղեցնելով 2-դ հորիզոնականը: 2010-ին ծնունդով արցախցի 12-ամյա Վլադիմիր Արզումանյանը իր «Մամա» երգով կարողացավ Հայաստանին հաղթանակ բերել: 2011-ին մրցույթն անցկացվեց Հայաստանում և մեր երկիրը այս անգամ ներկայացրել է Դալիթան՝ զբաղեցնելով 5-րդ տեղը: 2012-ին Հայաստանը ներկայացրել է «Compass band» խումբը՝ զբաղեցնելով 3-րդ հորիզոնականը:

Նախորդող հրապարակում՝

««Մանկական Եվրատեսիլ- 2013»-ում հայաստանյան մասնակիցը համեղ ելույթ է ցուցադրելու կիևյան բեմում»