Ձեր վստահելի աղբյուրը

Քաշաթաղում այս պահին վերաբնակեցված է սիրիահայ 34 ընտանիք, 90 մարդ: Այս մասին Panorama.am-ին տեղեկացրեց Քաշաթաղի շրջանի վարչակազմի վերաբնակեցման վարչության պետ Ռոբերտ Մաթևոսյանը:

«Հինգ ընտանիքի համար մենք կասկածում ենք, քանի որ մի ոտքը միշտ Երևանում է, մտածում ենք, որ հնարավոր է տեղափոխվեն: Մյուսներն արդեն ադապտացվել են, իրենց տնտեսությունն են ստեղծել»,- ասաց նա:

Ռոբերտ Մաթևոսյանը տեղեկացրեց, որ արդեն ավարտվում են Իշխանաձորում և Կովսականում սիրիահայերի համար կառուցվող շենքերի շինաշխատանքները: Նա նշեց, որ մինչև Նոր տարի բնակարանամուտ կանեն: Բացի դա, երեք առանձնատուն էլ Բերձորում է կառուցվում:

Ինչ վերաբերում է սիրիահայ երեխաների կրթությանը, ապա ուսուցիչները կամավոր, առանց վճարի երեխաների հետ առանձին լեզվի պարապմունքներ են անցկացնում: «Շատ արագ են սովորում, մենք սիրիահայ բնակիչ ենք ունեցել, որ հայերեն երկու-երեք բառ էր խոսում, իսկ հիմա շատ վարժ տիրապետում է լեզվին»,- ասաց նա:

Ռոբերտ Մաթևոսյանն ընդգծեց, որ բոլոր չափահաս սիրիահայերը, ովքեր ցանկություն են հայտնել, ապահովվել են աշխատանքով:

Նախորդիվ`

Քաշաթաղում սիրիահայ 25-30 ընտանիք է ապրում. Նրանց մի մասը բնակարանի է սպասում

Քաշաթաղում արդեն վերաբնակեցվել է 23 սիրիահայ ընտանիք