Ձեր վստահելի աղբյուրը

Ներկայումս 47 հայեր Աբխազիայում են և չեն կարողանում հատել սահմանը: Նրանց բոլորին «դեպորտ է» սպասվում: Այս մասին Panorama.am-ի հետ զրույցում ասաց Սոչիի հայ համայնքի ղեկավար, «Ռուսաստանի հայերի միություն» հկ-ի Սոչիի կառույցի ղեկավար Հրաչ Մակեյանը: Վերջինս մեր հարցադրմանն ի պատասխան պարզաբանեց, որ այն ամենը, ինչ գրում են, թե հարյուրավոր հայեր չեն կարողանում Աբխազիայից վերադառնալ Սոչի, չի համապատասխանում իրականությանը,

«Ես հետևում եմ իրավիճակին, անընդհատ կապի մեջ եմ Աբխազիայի հայերի միության ղեկավարի հետ: Այս պահին Աբխազիայում ընդամենը 47 հայ է, որոնք չեն կարողանում հատել ռուսական սահմանը, վերադառնալ Սոչի, և չեն կարող, հասկանալի պատճառներով, Վրաստանով վերադառնալ հայրենիք, քանի որ այդ դեպքում նրանց քրեորն կհետապնդեն… փորձում ենք խնդիրը լուծել»,- տեղեկացրեց պարոն Մակեյանը ու նշեց, որ բոլոր 47-ին էլ Սոչի վերադառնալուն պես արտաքսում է սպասվում: Ինչ վերաբերում է պայմաններին, ապա մեր զրուցակիցը հավաստիացրեց, թե հայերը ոչ մի բանի կարիք չունեն` նրանց մեծ մասը բարեկամներ ունեն Աբխազիայում, իսկ ովքեր չունեն, սնունդով, կացարանով ու անհրաժեշտով ապահովվում են տեղի հայության ջանքերով:

Արձագանքելով մեր հարցին, նա տեղեկացրեց, որ վերջին մի քանի ամիսների ընթացքում Սոչիից 1000-ից ավելի հայ է արդեն արտաքսվել, բայց մեղադրեց դրանում միմիայն մեր հայրենակիցներին.

«Դեռ անցած տարի բոլորին զգուշացվել էր, ես անձամբ էլ զգուշացրել եմ բազմիցս, որ փաստաթղթերի հարցը պետք է լուծվի: Չեն անում, հայերին չգիտե՞ք` մեկ սա բաց կթողնեն, մեկ թիվը սխալ կգրեն, մեկ մյուսը… իսկ օրենքի առջև բոլորն էլ հավասար են, իրենց խելքից տուժում են»,- նեղսրտեց հայ համայնքի ղեկավարը, ում խոսքով հայերը թերևս բողոքելու տեղ այնքան էլ չունեն, քանի որ «Ռուսաստանը աշխարհի միակ երկիրն է, որտեղ հայերի համար «կանաչ լույս է» վառվում»: Նաև փորձեց հանգստացնել` նրանք, ում փաստաթղթերը կարգին են և ովքեր ձմեռային օլիմպիական խաղերին ընդառաջ ստիպված են լքել Սոչին, քանի որ այս ժամանակահատվածում խստացվել են բնակության և հաշվառման պայմանները, կկարողանան վերադառնալ Սոչի խաղերից հետո.

«Սոչիում 182 հազար հայ է բնակվում, նրանցից 100 հազարը համշենահայերի հետնորդներն են, որ 1848թ-ին են այստեղ եկել: Սոչիի հայ համայնքը ամենախոշորն է այս տարածաշրջանում, հայերն այստեղ ապրել են և կապրեն ու պետք են այստեղ, այնպես որ, եթե օրինական է ամեն ինչ` նրանք կվերադառնան խաղերից հետո»,- հավելեց  Հ.Մակեյանը:

Նշենք, որ ձմեռային օլիմպիական խաղերին ընդառաջ, որոնք կմեկնարկեն փետրվարի 7-ին, Սոչիում լուրջ միջոցառումներ են ձեռնարկվում, որոնցից մեկն էլ ուղղված է քաղաքը հնարավորինս բեռնաթափելուն: Այս կոնտեքստում այստեղ բնակվող կամ աշխատող բոլոր նրանք, ովքեր չունեն համապատասխան թույլտվություն այդ ժամանակահատվածում Սոչիում գտնվելու վերաբերյալ, արտաքսվում են:

Նախորդիվ` 

Օլիմպիական Սոչին սպասման մեջ է` կհասցնեն, արդյո՞ք, ավարտել բոլոր գործերը

Պատրաստ ենք մասնակցել ցանկացած սպորտաձևի ու հաղթել`ցույց տվեք մենակ. Սոչիի հայ համայնքի նախաօլիմպիադական տրամադրությունները