Ձեր վստահելի աղբյուրը

 ԼՂՀ Ազգային ժողովի խմբակցությունները և պատգամավորական խումբը Հեռուստամարաթոն 2013 -ի առթիվ դիմել է աշխարհասփյուռ հայությանը: Այս մասին տեղեկացնում է ԼՂՀ ԱԺ մամուլի ծառայությունը:

«Նոյեմբերի 28-ին կմեկնարկի «Հայաստան» համահայկական հիմնադրամի հերթական հեռուստամարաթոնի եզրափակիչ փուլը: Վստահաբար կարելի է ասել, որ այն դարձել է մեր կյանքի կարևորագույն իրադարձություններից մեկը և որին հայ ժողովուրդը նախապատրաստվում է ողջ տարվա ընթացքում:
Հեռուստամարաթոնի նշանակությունը ոչ միայն համազգային դրամահավաքն է, այլև ժամանակակից մարտահրավերները միասնաբար դիմագրավելու` մեր ժողովրդի ընդհանրական կամքի դրսևորումը:

Այս տարվա հեռուստամարաթոնը նվիրված է Վարդենիս-Մարտակերտ ռազմավարական նշանակության ավտոմայրուղու շինարարությանը: Այն կոչված է մեծացնելու մեր երկրի արտաքին հաղորդակցական հնարավորությունները, նպաստելու Արցախի հյուսիսային հատվածի` Մարտակերտի և Շահումյանի շրջանների տնտեսական զարգացմանը, ինչպես նաև մեղմելու Գորիս-Ստեփանակերտ մայրուղու ծանրաբեռնվածությունը:

Նկատի ունենալով ծրագրի ռազմավարական կարևորությունը՝ կոչ ենք անում աշխարհասփյուռ հայությանը մասնակցել հեռուստամարաթոնին և արժանի ավանդ բերել այդ հայրենանվեր գործին:

Հեռուստամարաթոնին մասնակցությունը բոլորիս բարոյական պարտքն է, իսկ նվիրատվության չափը կախված է յուրաքանչյուրիս հնարավորությունից: Վաղը համայն հայությունը պետք է մեկ անգամ ևս ապացուցի, որ կրողն է համազգային միասնության գաղափարի ու ոգու:

Մենք հաղթել ենք պատերազմում, պարտավոր ենք հաղթել նաև տնտեսական մրցակցության մեջ: Հեռուստամարաթոնի արդյունքը պետք է դառնա հայության հավաքական պատասխանը մեզ նետված մարտահրավերներին»,- նշված է դիմումում:

Արցախի վարչապետը կոչ է արել ֆինանսական միջոցներն օգտագործել խնայողաբար