Ձեր վստահելի աղբյուրը

«Ցաղակրոն» կուսակցության նախագահ Շանթ Հարությունյանը, որը նոյեմբերի 5-ից անազատության մեջ է, մեղադրվում է քաղաքացիական հագուստով ոստիկանի նկատմամբ բռնություն գործադրելու, նրան ծեծելու համար: Այդ մասին այսօր լրագրողների հետ հանդիպման ժամանակ հայտարարեց Շանթ Հարությունյանի փաստաբան, փաստաբանների պալատի անդամ Ինեսա Պետրոսյանը:

«Այդ մեղադրանքը մենք գտնում ենք, որ անհիմն է, անօրինական է, Շանթ Հարությունյանը չի ընդունում մեղադրանքը, այդ կապակցությամբ որևէ ցուցմունք չի տվել», -հայտարարեց փաստաբանը:

Ներկայացնելով Շանթ Հարությունյանի նկատմամբ մեղադրանքը, Ինեսա Պետրոսյանը մանրամասնեց, որ Շանթը մեղադրվում է հատկապես ոստիկանության Երևան քաղաքի վարչության 2-րդ բաժանմունքի պետ Էդգար Բարսեղյանի նկատմամբ բռնություն գործադրելու համար: Ըստ մեղադրանքի, Շանթ Հարությունյանը վազելով մոտեցել է նրան, ձեռքին եղած փայտյա մահակով մի քանի հարվածներ հասցրել ոստիկան Էդգար Բարսեղյանի մարմնի տարբեր մասերին: «Շանթ Հարությունյանը չէր կարող իմանալ, թե տվյալ անձնավորությունը ոստիկանության աշխատակից է, թե ոչ, ինչպես գիտեք այդտեղ եղել են շատ անձինք, որոնք եղել են ոչ թե համազգեստով, այլ քաղաքացիական հագուստով: Ի սկզբանե բացառվում է այս մեղադրանքի գոյությունը, որովհետև անձը չէր կարող իմանալ գործ ունի ոստիկանի հետ, թե ոչ», -հավելեց փաստաբանը:

Ինեսա Պետրոսյանն ասաց, որ ասուլիսից առաջ «Նուբարաշեն» հոգեբուժարանում հանդիպել է Շանթ Հարությունյանի հետ և մի քանի ուղերձներ ստացել նրանից` հանրությանը փոխանցելու համար: Պետրոսյանը նախ հիշեցրեց, որ նոյեմբերի 5-ին ակցիան սկսելուց առաջ Շանթ Հարությունյանը հորդորել էր որևէ մեկին չսադրել, խաղաղ երթ է տեղի ունենալու և եթե լինի սադրանք, ապա կլինի համարժեք պատասխան, այնուհետև հավելեց. «Նա ասում է` ես գիտեի` իշխանությունն ինչի է ընդունակ, ասում էի` ես գիտեի մարտի 1, 10 զոհեր, որ կարող է յուրաքանչյուր խաղաղ երթ կամ հանրահավաք տապալվեր, և ասում է նկատի ունենալով այդ ամենը, ես ինձ հետ դրա համար վերցրեցի այդ փայտերը: Ինքս գիտակցել եմ, որ իշխանությունները կարող են այդ շարժումների նկատմամբ դրսևորել վատ վերաբերմունք, տապալել դրանք: Ես որոշել էի վճռական լինել և, եթե իրենք հարձակվեին մեզ վրա միայն այդ դեպքում վճռական պատասխան տրվի: Մենք վճռական ենք եղել անզիջում մեր սահմանադրական իրավունքը իրականացնելու: Եվ նաև ասում է, որ թող ինձ ու իմ ընկերներին չխառնեն մյուս ընդդիմադիրների հետ. Մենք ունեցել ենք հստակ նպատակ»:

Փաստաբանը փոխանցեց Շանթ Հարությունյանի խոսքերը նոյեմբերի 5-ի ակցիայի մասին և ասաց, որ ակցիան քաղաքական էր և ըստ էության Գայ Ֆոքսի հայտնի «Անոնիմուս» կոչվող ակցիաների շարունակությունն էր Երևանում: «Նա ասում է, որ բոլորն էլ կարող են մտնել համացանց և տեսնել, որ այդ ակցիաներըր վաղուց կան, որ տեղի են ունենում նոյեմբերի 5-ին: 400 քաղաքներ միացել են, այդ թվում Երևանը: Նրանք այստեղից նաև հաղորդագրություն են ուղարկել` ասելով, որ կմիանան այդ շարժմանը ևս»,- փոխանցեց փաստաբանը` չբացառելով, որ «անոնիմոսների» դիմակների հետևում թաքնված եղած լինեն նաև ոստիկանության ծառայողներ:

Նա պնդեց նաև նախկինում արած իր հայտարարությունը, որ Շանթ Հարությունյանը հոգեկան առողջության հետ կապված խնդիրներ չունի և հոգեբուժարանում դատահոգեբուժական փորձաքննության ենթարկվելու մասին Կենտրոն և Նորք Մարաշ վարչական շրջանների ընդհանուր իրավասության դատարանի որոշումը բողոքարկել է Վերաքննիչ դատարան, որտեղ բողոքը հավանաբար քննության կառնվի հաջորդ շաբաթ:

Նշենք, որ Շանթ Հարությունյանը կալանավորվել է նոյեմբերի 5-ին Երևանի Մաշտոցի պողոտայում տեղի ունեցած դեպքերի ժամանակ իշխանության ներկայացուցչի նկատմամբ բռնություն գործադրելու մեղադրանքով: Հայտնի է, որ նա չի ընդունում իր նկատմամբ առաջադրված մեղադրանքը: Նրա նկատմամբ մեղադրանքն առաջադրվել է ՀՀ քրեական օրենսգրքի 316 հոդվածի 2-րդ մասի հատկանիշներով` «Իշխանության ներկայացուցչի նկատմամբ կյանքի կամ առողջության համար վտանգավոր բռնությունը»: