Սերգեյ Համբարձումյան. «Միացյալ խաչ» հուշարձանը խորհրդանշում է հայ և ռուս ժողովուրդների դարավոր բարեկամությունը

Հասարակություն 11:04 02/12/2013

«Հուշարձանը, որը տեղադրված է Երևանի կենտրոնում խորհրդանշում է հայ- ռուսական դարավոր բարեկամությունը»,- այս մասին այսօր Երևանում կայացած «Միացյալ խաչ» հուշարձանի հանդիսավոր բացման արարողությունից հետո լրագրողների հետ ճեպազրույցում ասաց հուշարձանի հովանավոր, մասկվայաբնակ գարծարար Սերգեյ Համբարձումյանը:

Նա նշեց, հայ ժողովուրդը ռուս ժողովրդի հետ ջերմ բարեկամություն է անում 200 տարի շարունակ: «Եղբայրություն ենք անում ոչ թե հինգ, կամ տասը տարի, այլ դարեր շարունակ»,- նշեց Սերգեյ Համբարձումյանը:

Նրա խոսքերով, Ֆրիդրիխ Սողոյանը փայլուն աշխատանք է իրականացրել և նույն այս հուշարձանից տեղադրված է նաև Մոսկվայում: «Մենք այս հուշարձանով ռուս ժողովրդին ցույց ենք տալիս, որ մեզ միավորում են քրիստոնեության արժեքները: Մենք` հայերս և ռուսները միևույն խաչն ենք տանում»,- հավելեց Սերգեյ Համբարձումյանը:

Նշենք, որ այսօր Երևանի Մոսկովյան-Նալբանդյան –Իսահակյան փողոցների խաչմերուկում տեղադրվեց հայ և ռուս ժողովուրդների դարավոր բարեկամությունը խորհրդանշող «Միացյալ խաչ» հուշարձանը: Արարողությանը ներկա են գտնվել ՀՀ նախագահ Սերժ Սարգսյանը, վարչապետ Տիգրան Սարգսյանը, ՌԴ տրանսպորտի նախարար Մաքսիմ Սոկոլովը, Երևանի քաղապետ Տարոն Մարգարյանը:

4.5 մետր բարձրությամբ հուշարձանը իրենից ներկայացնում է երկու բարեկամ` հայ և ռուս ժողովուրդները խորհրդանշող կանանց, ովքեր գլուխ են խոնարհել ընդհանուր հավատի խորհրդանիշ խաչի առջև և այդ խոնարհումով միաժամանակ պաշտպանում են խաչը:

Այս հուշարձանի նույնատիպը 1997թ Մոսկվայի 850 ամյակի առթիվ տեղադրվել է Մոսկվայի կենտրոնում: Հուշարձանը կառուցվել է մոսկվայաբնակ գործարարներ Սերգեյ Համբարձումյանի և Մակար Նահապետյանի հովանավորությամբ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: