Ձեր վստահելի աղբյուրը

 Հայաստանը ողջունում է Իրանի միջուկային ծրագրի շուրջ ձեռքբերված համաձայնությունը: Այս մասին այսօր Երևանում ռուս գործընկերոջ հետ ունեցած ասուլիսի ժամանակ հայտարարեց ՀՀ նախագահ Սերժ Սարգսյանը:

Տեղեկացնելով, որ Վլադիմիր Պուտինի հետ հանդիպման ընթացքում քննարկել են նաև տարածաշրջանային անվտանգության հարցեր՝ Սերժ Սարգսյանը նշեց. «Այս համատեքստում մենք ողջունում ենք Ժնևում Իրանի միջուկային ծրագրի վերաբերյալ ձեռքբերված համաձայնությունը, ինչն, անկասկած, կարևոր քայլ է, որը նպաստում է տարածաշրջանային և գլոբալ մակարդակներում կայունության և անվտանգության ամրապնդմանը»:

«Ինչպես հայտնի է Իրանը Հայաստանի համար կարևոր երկիր է, ուստի այն հարցերի խաղաղ լուծումը, որոնք առկա էին Իսլամական Հանրապետության ու Եվրոպական Հանրության, Իրանի ու Միացյալ Նահանգների միջև, մենք միայն դրական ենք գնահատում»,- նշեց ՀՀ նախագահը և օրինակ բերելով այն հանգամանքը, որ ստեղծված իրավիճակում տարեցտարի նվազում էր իրանցի զբոսաշրջիկների քանակը, վստահություն հայտնեց որ հարաբերությունների կարգավորումը միայն դրականի կհանգեցնի:

Իր հերթին ՌԴ նախագահ Վլադիմիր Պուտինը ևս ողջունեց Ժնևյան համաձայնությունը՝ հիշեցնելով, որ դրա հիմքում հիմնականում Ռուսաստանի առաջ քաշած առաջարկություններն էին: Նրա խոսքով, Իրանի միջուկային ծրագիրը պետք է լուծվի միջազգային իրավունքի նորմերի հիման վրա, և մի կողմից պետք է հարգվի Իրանի խաղաղ միջուկային էներգետիկան զարգացնելու իրավունքը, իսկ մյուս կողմից` տարածաշրջանի ու բոլոր երկրների անվտանգությունն ու կայունությունը:

«Սա առաջին փուլն է, մենք պետք է առաջ ընթանանք: Շատ մեծ հույս ունենք, որ միջազգային հանրությունը՝ մասնակից բոլոր կողմերով, մոտ ապագայում համաձայնության կգա համատեղ աշխատանքը շարունակելու ու նոր արդյունքներ ունենալու ուղղությամբ»:

Անդրադառնալով Իրանի խնդրի լուծման դեպքում տրասնպորտային հաղորդակցության հաստատման հնարավորության վերաբերյալ հարցին՝ Վլադիմիր Պուտինը նշեց.

«Իհարկե, հաշվի առնելով, որ Իրանի միջոցով հնարավոր է հաղորդակցություն հաստատել, մենք որոշակի ծրագրեր ունենք երկաթուղային տրանսպորտի հաշվով: Սա ֆինանսական տեսանկյունից պարզ նախագիծ չէ, բայց միանգամայն իրականանալի է: Միևնույն ժամանակ ես կարծում եմ, որ մենք պետք է անհրաժեշտ աշխատանքներ կատարենք, նաև այստեղ՝ Անդրկովկասում կորցրածը վերականգնելու համար՝ նկատի ունենալով հաղորդակցության կազմակերպումը ԱՊՀ երկրների շրջանակներում: Որոշակի խնդիրներ կան, բայց դրանց լուծումների մասին կարելի է պայմանավորվել: Համենայնդեպս այսօր դրա համար նախադրյալներ են ստեղծվում»: