Ձեր վստահելի աղբյուրը

 ՌԴ նախագահ պետական այցի ընթացքում Սերժ Սարգսյանն ու Վլադիմիր Պուտինը բանակցությունների զգալի հատված հատկացրել են երկկողմ տնտեսական հարաբերություններին ու Մաքսային միությանը Հայաստանի անդամակցության խնդիրներին:
Ինչպես հանդիպումից հետո կայացած ասուլիսում հայտնեց ՀՀ նախագահը՝ հայկական կողմն ընդհանուր մաքսային տարածք շուտ մտնելուն ուղղված քայլեր է իրականացրել, որոնց մասին նա տեղեկացրել է ռուս գործընկերոջը:

«Ռուսաստանի նախագահը հաստատել է այդ գործընթացին ամենայն աջակցություն ցուցաբերելու ռուսական կողմի պատրաստակամությունը` համապատասխան սույն թվականի սեպտեմբերի 3-ի մեր Համատեղ հայտարարության և Եվրասիական տնտեսական բարձրագույն խորհրդի հոկտեմբերի 24-ի որոշման: Հենց այդ թեմային էր նվիրված միջտարածաշրջանային 3-րդ համաժողովը, որի բացմանը մենք մասնակցեցինք Գյումրի քաղաքում»,- նշեց Սերժ Սարգսյանը:

Անդրադառնալով տնտեսական հարաբերություններին՝ երկրի ղեկավարը նշեց, որ ռուսական կողմի հետ պայմանավորվել են շարունակել առևտրի և Հայաստանում ռուսաստանյան ներդրումների կայուն ավելացման, համատեղ ձեռնարկությունների ստեղծման, գիտատեխնիկական համագործակցության խորացման ուղղությամբ համատեղ ջանքերը:

«Առաջնահերթ ուշադրություն ենք դարձնելու ատոմային էներգետիկային, տրանսպորտային ենթակառուցվածքի զարգացման հարցերին»,- ասաց Սերժ Սարգսյանը:

Իր հերթին Վլադիմիր Պուտինը ներկայացնելով երկկողմ տնտեսական հարաբերությունների ծավալը նկարագրող մի շարք ցուցանիշներ, նշեց, որ այսօր ստորագրված համձայնագրերը միտված են երկկողմ գործընկերության հետագա զարգացմանը: Կոնկրետ նախագծերցի ՌԴ նաախագահն առանձնացրեց Հայկական ԱԷԿ-ի գործող բլոկի շահագործման ժամկետի երկարաձգումը, Հրազդանի ՋԷԿ-ի 5-րդ բլոկի շահագործումը, ինչպես նաև մի շարք նախաձեռնություններ բարձր տեխնոլոգիաների ոլորտում: «Խոսքը, մասնավորապես, Հայաստանի տիեզերական կապի ու հեռարձակման սարքավորման ստեղծման, ինչպես նաև Բյուրականի աստղադիտարանի բազայի հիման վրա տիեզերաբանական գիտական հետազոտությունների իրականացման մասին է»,- նշեց ՌԴ նախագահը:

Ինչ վերաբերում է Մաքսային միությանը Հայաստանի անդամակցությանը, ապա Վլադիմիր Պուտինի խոսքով, մեկ ամսի առաջ այս մասին պայմանավորվածություն է եղել և ստեղծվել են համապատասխան աշխատանքային խմբեր, որոնք պետք է նախապատրաստական աշխատանքներ կատարեն: Պուտինի խոսքով՝ այս խմբերում հայ բանագնացները գերազանց աշխատանք են կատարում և մեծ պրոֆեսիոնալիզմ են դրսևորում: Ինչ վերաբերում է անդամակցությանը, ապա դա կախված է ոչ միայն Ռուսաստանից, այլև Բելառուսից և Ղազախստանից: «Կանենք ամեն ինչ, որ արագ լինի»,- խոստացավ ՌԴ նախագահը: