Ձեր վստահելի աղբյուրը

Հայաստանում վերջին տարիներին թերսնուցման ու գիրության ցուցանիշները ոչ միայն չեն բարելավել, չեն իջել, այլ նաև ավելացել են: Ասուլիսում այս մասին ցավով փաստեց «Վստահություն» առողջապահական ՀԿ նախագահ, մանկաբույժ, դասախոս Սուսաննա Հարությունյանը: Ըստ նրա, թերսնուցման հետ կապված ավելացել է նաև ցածրահասակության ցուցանիշը, թերքաշությունը: «Հայաստանում սնուցման հետ կապված աճի բոլոր խնդիրներն ավելացել են»,- ասաց մասնագետը:

Ս. Հարությունյանի դիտարկմամբ, թերքաշության ու թերաճության խնդիրները կախված չեն միայն երեխայի ֆիզիկական աճի հետ, այլ անդրադառնում են երեխայի զարգացման վրա. եթե երեխաները 1 սմ ավելի ցածր հասակ են ունենում թերսնվածության պատճառով, ապա նրանց ինտելեկտուալ զարգացման գործակիցն իջնում է: «Եթե երկիրն ունի շատ թերսնված երեխաներ, չի կարող ունենալ կայուն սոցիալ-տնտեսական աճ, մինչև չլուծի իր թերսնված երեխաների խնդիրը»,- ասաց մանկաբույժը:

Ըստ նրա, այսօր Հայաստանն ունի ինչպես զարգացող երկրներին բնորոշ թերսնվածության բարձր ցուցանիշներ, այնպես էլ զարգացած երկրներին բնորոշ գիրության ցուցանիշներ: «Այս խնդիրները հրատապ լուծում են պահանջում»,- ընդգծեց նա:

Խոսելով պատճառների մասին, բժիշկն ասաց, որ դրանք տարբեր են, իսկ սոցիալ-տնտեսական պայմանները այդ պատճառներից մեկն է: «Խնդիրներ կա նաև բնակչության գիտելիքների հետ կապված, երբ մայրերը բավականաչափ տեղեկացված չեն, ինչպես կերակրել երեխաներին»,- ասաց Ս. Հարությունյանը: Նա նշեց, որ Երեխաների իրավունքների հռչակագրի 24-րդ հոդածում ընդգծված է՝ «Յուրաքանչյուր երեխա իրավունք ունի ստանալու լավագույն սնուցումը, պատճաշ բուժսպասրակումը առողջության հնարավորին բարձր ստանդարտի հասնելու համար»: «Այսօր մեր երեխաներից շատերը զրկված են դրանից»,- նշեց մասնագետը:

Ըստ մասնագետների, երեխաները կյանքի առաջին վեց ամիսը պետք է սնվեն միմիայն կրծքի կաթով: Վեց ամսականից հետո պետք է հավելյալ սնունդ տալ երեխաներին, միաժամանակ մինչև երկու տարեկան շարունակել կրծքով կերակրումը:

«Հերացի» համալսարանական պոլիկլինիկայի տնօրեն Աննա Բալյանն էլ ասաց, որ ամեն տարիքի երեխա պոլիկնինիկա այցելելու ժամանակացույց ունի, որի ընթացքում կատարում են՝ մինչև մեկ տարեկան աճի և զարգացման գնահատում, ստուգում են քաշը, հասակը, գլխի շրջագիծը, նյարդահոգեբանական զարգացումը: