Ձեր վստահելի աղբյուրը

 Վլադիմիր Պուտինի այցի հետ կապված նախօրեին կայացած հասարակական ակցիաները ՀՀ նախագահի աշխատակազմի ղեկավար Վիգեն Սարգսյանը բնական է համարում և գտնում է, որ դրանք բաց հասարակությանը բնորոշ են: Այս մասին նա նշեց լրագրողների հետ հանդիպման ժամանակ:

Պատասխանելով հարցին, թե ինչպես է վերաբերում Ռուսաստանի նախագահի այցին ընդառաջ և այցին զուգահեռ Երևանի տարբեր հատվածներում բողոքի ակցիաներին`Վիգեն Սարգսյանը մասնավորապես ասաց.

«Եվ ներքին, և արտաքին քաղաքականության ոլորտում ցանկացած որոշում, քայլ, հանդիպում որևէ հասարակության մեջ, եթե դա տոտալիտար փակ հասարակություն չէ, պետք է առաջացնի բազմակարծություն: Այսինքն` պետք է լինեն մարդիկ, ովքեր ավելի կնախընտրեն, որ Հայաստան ժամանի մեկ այլ երկրի նախագահ, պետք է լինեն մարդիկ, որ պետք է համարեն, որ Մաքսային միության անդամակցելու ձգտումը, որոշումը սխալ է, և դրա փոխարեն պետք էր մեկ այլ որոշում կայացնել: Հենց դրանով է հանրային իշխանությունը և պետական կառավարման համակարգը քաղաքականացվում: Հանրապետության նախագահը, խորհրդարանը կառավարությունը, կայացնում են որոշումներ, իրականացնում են քաղաքական որոշումներից բխող քայլեր, որոնք արտացոլում են իրենց մոտեցումը տվյալ իրավիճակում պետության շահերին համապատասխանության կամ առավել արդյունավետ ծառայելու խնդիրների շուրջ: Ես կարծում եմ, որ երեկվա այն ցույցերը, որոնք դեմ էին կամ վերապահմամբ էին մոտենում ՌԴ նախագահի այցին, կարող են բնութագրվել այդ կոնտեքստում, նամանավանդ որ, կարծես թե, բոլոր կողմերը` և իրավապահ մարմինները, չանցան բարեբախտաբար այն գիծը, որ այդ քաղաքական կամքի, դիրքորոշման արտահայտությունը ընդուներ անթույլատրելի արտացոլումներ: Հետևաբար՝ ես կարծում եմ, որ այդպիսի ցույցեր, այդպիսի կարծիքներ, կամքի արտահայտում, բնական պետք է լինի հասարակության համար, եթե այն փակ հասարակություն չի: Իսկ մենք, կարծես թե, արդեն շուտվանից փակ հասարակություն չենք»:

Կարդացեք նաև`

Վիգեն Սարգսյան. Պուտինի այցը կխթանի Գյումրու ռազմաբազայի արդիականացմանը

Վիգեն Սարգսյան. ՌԴ նախագահի պետական այցը բացառիկ էր (Տեսանյութ)

Վիգեն Սարգսյան. Շարքային սպառողի համար գազի սակագինը կմնա նույնը