Ձեր վստահելի աղբյուրը

 Երկրում տեղակայված ռուսական ռազմաբազայի արդիականացումը բխում է Հայաստանի անվտանգության շահերից, և այդ երկրի գերագույն գլխավոր հրամանատարի այցը ռազմաբազա այս առումով խթանիչ դերակատարում կունենա: Այսօր լրագրողների հետ հանդիպման ժամանակ նման համոզմունք հայտնեց ՀՀ նախագահի աշխատակազմի ղեկավար Վիգեն Սարգսյանը:

Խոսելով Հայաստանի և Ռուսաստանի նախագահների բանակցություններում անվտանգային խնդիրների արծարծման մասին՝ Վիգեն Սարգսյանը նշեց, որ այս առումով մի քանի բաղադրիչ կա.

«Հենց այսօր ՀՀ Ազգային ժողովում քննարկվում է մի պայմանագրի վավերացման հարց, որը ստորագրվել է այս տարվա հունիս ամսին: Դա ռազմատեխնիկական ոլորտում համագործակցության պայմանագիրն է, որը թույլ է տալու Հայաստանի Հանրապետությանը ձեռք բերել ռուսական արտադրողից զենք և զինամթերք Ռուսաստանի Դաշնության ներքին գներով, այսինքն՝ նույն գներով, որոնցով դա մատակարարվում է ՌԴ Զինված ուժերին: Պայմանավորվածություններ ձեռք բերվեցին մեր բազմակողմ համագործակցության շրջանակներում, ՀԱՊԿ-ի շրջանակներում անելիքների և ՀԱՊԿ մեր միավորված խմբավորման հետագա գործունեության հետ կապված հարցերի շուրջ»:

ՀՀ նախագահի աշխատակազմի ղեկավարի խոսքով՝ կարևոր և խորհրդանշական էր այն փաստը, որ ռուսական կողմն ընդունել էր առաջարկն ու Գյումրի այցելության շրջանակներում երկու երկրների ղեկավարները համատեղ այցելեցին Գյումրիում տեղակայված 102-րդ ռազմական բազա:

«Դուք գիտեք, որ այն պայմանագրով, որով երկարացվեց ռազմակայանի տեղակայումը Հայաստանում, հանվեց այն սահմանափակումը, որը կար նախկին պայմանագրում, որը նախատեսում էր, որ այդ ռազմակայանը կարող էր օգտագործվել միայն ԽՍՀՄ-ի նախկին արտաքին սահմանների երկայնքով առկա վտանգների համար: Այսինքն, ընդլայնվեց ռազմաբազայի գործունեության մանդատը: Կարծում եմ, այդ համատեսքտում մեզ համար շատ կարևոր է, որ այդ ռազմաբազան լինի շատ արդիական, շատ կարող և այնտեղ զինծառայություն անցնող զինծառայողները լինեն մարտական բարձր պատրաստվածության: Անշուշտ գլխավոր գերագույն հրամանատարի այցելությունը միշտ ունի այդպիսի խթանիչ դերակատարում և, կարծում եմ, այն հստակ ազդակ էր բոլորին, ով կասկածի տակ է առնում հայ-ռուսական ռազմաքաղաքական համագործակցության իրական ներուժը և ազդեցությունը տարածաշրջանային հիմնախնդիրների կարգավորման վրա»,- նշեց Վիգեն Սարգսյանը:

Հարցին, թե Վլադիմիր Պուտինի այցելությունը ռազմաբազա արդյոք հաստատումը չէ՞ր ռազմաբազայի հրամանատար Անդրեյ Ռուզինսկու այն հայտարարության, թե Լեռնային Ղարաբաղում զինված հակամարտության դեպքում ռազմաբազան կարող է ներգրավվել, Վիգեն Սարգսյանը հիշեցրեց, որ նման մի հարց երեկ ուղղվեց նաև Վլադիմիր Պուտինին:

«Դուք ստացաք կարևոր մի պատասխան, որ Ռուսաստանի Դաշնությունը չափազանց շահագրգռված է հարցի խաղաղ կարգավորմամբ, և եթե չեմ սխալվում, ՌԴ նախագահը նշեց, որ ավելի լավ է խոսել խաղաղության մասին, որովհետև պատերազմի մասին խոսելով կարող ենք միայն խթանել նրանց երևակայությունը, ով կարծում է, որ ռազմական ճանապարհը այնուամենայնիվ հնարավոր է այս խնդրի կարգավորման համար»,- ասաց Վիգեն Սարգսյանը, ապա անդրադառնալով հնչած հարցին, նշեց, «Ես լսում եմ Ձեր հարցի իմաստն ու բովանդակությունը, ես չեմ կարող մեկնաբանել ռուսական կողմի համար, թե ինչքանով է այցելությունը կոչված հաստատելու կամ վավերացնելու ռազմակայանի հրամանատարի արված հայտարարությունը, բայց վստահ եմ, որ ռուսական կողմը լավ տեղեկացված էր և գիտեր այդ հայտարարության մասին»:

Կարդացեք նաև`

Վիգեն Սարգսյան. Ակցիաները բնական են և բաց հասարակություններին բնորոշ

Վիգեն Սարգսյան. ՌԴ նախագահի պետական այցը բացառիկ էր (Տեսանյութ)

Վիգեն Սարգսյան. Շարքային սպառողի համար գազի սակագինը կմնա նույնը