Ձեր վստահելի աղբյուրը

Տնտեսագետ Վահագն Խաչատրյանը «Հայռուսգազարդ» ընկերության բաժնետոմսերի վաճառքը ռուսական կողմին որակում է որպես Հայաստանի Հանրապետության շահերի դեմ կատարված գործարք, իսկ դրա պատաճառը համարում է Հայաստանի իշխանությունների վարած ապաշնորհ քաղաքականությունը:

«Բոլոր այն բացատրությունները, թե հինգ տարի գինը չի փոխվի և պետք է ուրախանանք, շատ կասկածելի է, որվհետև այս գինն ընդհանրապես ընդունելի չի: Եվ հիմա ստացվում է, որ մենք այս գործարքը կնքելով վնաս ենք կրել հանձինս 155 մլն այդ պարտքի, ու ևս 150 մլն դոլոր պարտքի, որի մասին երեկ խոսվեց»,-ասաց Վ. Խաչատրյանը: Նա նշեց, որ այս պահին չի հասկանում` ինչպես է կուտակվել այդ պարտքը:

«Դա նշանակում է, կա մի գաղտնի պայմանագիր, որի արդյունքում հայկական ու ռուսական կողմը համաձայնության են եկել, որի արդյունքում Հայաստանը կուտակում է պարտքեր, որի մասին մենք տեղյակ չենք եղել, ըստ էության հանցագործության նշաներ կան այստեղ»,-ասաց տնտեսագետը, ընդգծելով, որ նույն հաջողությամբ վաղը կարող են իշխանությունները հայտարարել մեկ այլ մեծ պարտքի մասին:

Երեկ ԱԺ-ում տեղի ունեցած հարց ու պատասխանի ժամանակ էներգետիկայի ու բնական պաշարների նախարար Արմեն Մովսիսյանը հայտարարեց, որ առաջիկա 5 տարիների ընթացքում Հայաստանը կարող է 800 մլն դոլար տնտեսել Ռուսաստանից գազի արտահանման մաքսատուրքերի վերացման շնորհիվ: Մովսիսյանը մեկնաբանել է նաև «Հայռուսգազարդի» 20% հայկական բաժնեմասի փոխանցման պատճառները: «20% բաժնեմասը փոխանցվել է կուտակված պարտքի դիմաց, այն գնահատվել է 155մլն դոլար» - նշել է նա:

Հիշեցնենք, որ Ռուսաստանի և Հայաստանի միջև դեկտեմբերի 2-ին կնքված համաձայնագրերի մի մասը վերաբերվում է գազի ոլորտին: Նշանավորվեց հատկապես Ռուսաստանից Հայաստան գազի արտահանման մաքսատուրքերի վերացումը, որը կազմում էր 30 %: Արդյունքում ռուսական գազի գինը 270 դոլարից կնվազի՝ հասնելով 189 դոլարի: Գազի ոլորտում պայմանագիր է կնքվել նաև «Գազպրոմի» և «Հայռուսգազարդի» միջև: Պայմանագրի համաձայն ռուսական գազային հոլդինգը 2014-2018թթ-ին տարեկան Հայաստան մատակարարելու է 2.5 մլրդ խորանարդ մետր, իսկ գինը շաղկապված է լինելու ռուսաստանում գազի գնագոյացման հետ: Նշենք, որ 2012թ-ին Հայաստան է մատակարարվել 1.7 մլրդ խորանարդ մետր գազ:

Ինչ վերաբերում է նախարարի այն հայտարարությանը, թե Իրանի առաջարկած գազի գինը 400 դոլարից ավելին է, այնինչ մենք ռուսական գազը ձեռք ենք բերում 189 դոլարով, ապա Խաչատրյանը դրա հետ համամիտ չէ:

«Էներգետիկայի նախարարն այնպես է խոսում, կարծես թե ինքն է ամենամեծ ճշմարտությանը տիրապետում, իսկ մնացածները հնարավորություն չունեն ստուգելու, թե Իրանը ի՞նչ գներով է գազ վաճառում, ինչպսի՞ն են միջազգային շուկայում գները: Դե եթե այդպես է, թող նախարարն ինձ ասի, այս պահին Իրանը Հայաստանին ինչ գնով է գազ վաճառում, թող հաշվարկը կատարի, 3կվտ էլեկտրանէներգիա և գազ, ստացվում է 1000 խմ դիմաց 180 դոլարից էժան: Կարելի էր Պարսկաստանի հետ նորմալ բանակցությունների արդյունքում ստանալ այն, ինչ որ ստանում էինք»,-ասաց Վ. Խաչատրյանը:

Նա հիշեցրեց, որ Իրանը համաձայնվել էր իր միջոցներով կառուցել Իրան-Հայաստան գազամուղը, Հրազդան ՋԷԿ-ի 5-րդ բլոկի կառուցումն ավարտել ամբողջությամբ, և այս ամեն ինչը մեկ պայմանով. «Հայաստանը պարտավորվում է գումարների դիմաց Հայաստանում արտադրվող էլէկտրաէներգիայից մատակարարել Իրանին: Եթե ես սրանց հիման վրա հաշվարկ կատարեմ, կարող է Իրանից ստացված գազը արժենա 50-70 դոլար»: