Համանախագահող երկրների պատվիրակությունների ղեկավարները Լեռնային Ղարաբաղի հակամարտության վերաբերյալ հայտարարություն են ընդունել
Կիևում ԵԱՀԿ նախարարական նիստի շրջանակներում ԵԱՀԿ Մինսկի խմբի համանախագահող երկրների պատվիրակությունների ղեկավարները՝ ՌԴ ԱԳ նախարար Սերգեյ Լավրովը, Ֆրանսիայի Եվրոպայի հարցերով նախարար Թիերի Ռեփենթին, ԱՄՆ պետքարտուղարի Եվրոպայի և Եվրասիայի հարցերով օգնական Վիկտորիա Նուլանդը Հայաստանի և Ադրբեջանի ԱԳ նախարարներ Էդվարդ Նալբանդյանի ու Էլմար Մամեդյարովի հետ համատեղ հայտարարություն են ընդունել, որում համաձայնվել են շարունակել Լեռնային Ղարաբաղի հակամարտության արդարացի և խաղաղ լուծմանը միտված աշխատանքները՝ միչև օրս ձեռք բերվածի հիման վրա:
ԵԱՀԿ պաշտոնական կայքում զետեղված հայտարարության տեքստի համաձայն, «ԵԱՀԿ Մինսկի խմբի համանախագահող երկրների պատվիրակությունների ղեկավարները ողջունել են Հայաստանի և Ադրբեջանի նախագահների միջև բարձր մակարդակով երկխոսության վերսկսումը և հույս հայտնել, թե առաջիկա հանդիպումները լիցք կհաղորդեն խաղաղ գործընթացին: Նրանք խրախուսում են կողմերին հաշվի առնել այն միջոցները, որոնք կթուլացնեն տարածաշրջանում առկա լարվածությունը»:
«Հայաստանի և Ադրբեջանի ԱԳ նախարարներ Էդվարդ Նալբանդյանն ու Էլմար Մամեդյարովը համաձայնվել են Մինսկի խմբի շրջանակներում հանդիպել 2014 թ-ի սկզբին՝ ամենաբարձր մակարդակով հետագա բանակցությունները կազմակերպելու նպատակով: Նախարարներն ընդգծել են, որ տարածաշրջանի ժողովուրդներն ակնկալում են և արժանի են տևական ժամանակ ընթացող հակամարտության լուծմանը, ինչպես նաև իրենց երախտագիտությունն են հայտնում համանախագահող երկրներին միջնորդական առաքելության համար», - ասված է հայտարարության տեքստում:
Ավելի ուշ հայտարարության վերաբերյալ պաշտոնական հաղորդագրություն տարածեց ՀՀ ԱԳՆ մամուլի և տեղեկատվության վարչությունը, որը ներկայացնում ենք ամբողջությամբ.
«ԵԱՀԿ Նախարարների խորհրդի՝ Կիևում անցկացվող նիստի կապակցությամբ, ԵԱՀԿ Մինսկի խմբի համանախագահող երկրների պատվիրակությունների ղեկավարները (Ռուսաստանի Դաշնության արտաքին գործերի նախարար Սերգեյ Լավրովը, Ֆրանսիայի Եվրոպական հարցերով նախարար Թիերի Ռեպանտենը, ԱՄՆ պետքարտուղարի՝ Եվրոպայի և Եվրասիական հարցերով տեղակալ Վիկտորիա Նուլանդը), Հայաստանի արտաքին գործերի նախարար Էդվարդ Նալբանդյանը և Ադրբեջանի արտաքին գործերի նախարար Էլմար Մամեդյարովը պայմանավորվեցին արդեն ձեռք բերվածի հիման վրա շարունակել համատեղ աշխատանքը` ուղղված Լեռնային Ղարաբաղի հիմնախնդրի արդարացի և խաղաղ կարգավորմանը:
Համանախագահող երկրների պատվիրակությունների ղեկավարները ողջունեցին Հայաստանի և Ադրբեջանի նախագահների միջև, վերջերս, բարձր մակարդակով երկխոսության վերսկսումը և հույս հայտնեցին, որ առաջիկա հանդիպումները կնպաստեն խաղաղ կարգավորման գործընթացին: Նրանք կոչ արեցին կողմերին դիտարկել միջոցներ, որոնք կնվազեցնեն լարվածությունը տարածաշրջանում:
Հայաստանի և Ադրբեջանի արտաքին գործերի նախարարները պայմանավորվեցին հանդիպել 2014 թվականի սկզբին` Մինսկի խմբի համանախագահների հովանու ներքո` նախապատրաստելու համար բարձրագույն մակարդակով հետագա բանակցությունները:
Նախարարներն նշեցին, որ տարածաշրջանի բնակչությունը ակնկալում է և արժանի է առաջընթացի չափազանց ձգձգված հակամարտության կարգավորման գործընթացում: Նախարարները բարձր գնահատեցին համանախագահող երկրների միջնորդական դերակատարությունը»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
