Ձեր վստահելի աղբյուրը

Ազգային ժողովի ՀԱԿ խմբակցության քարտուղար Արամ Մանուկյանը այսօրվա  ճեպազրույցին ներկայացավ «գազի թղթապանակ»-ով ու հայտարարեց, որ գազի հետ կապված բացահայտումներ է արել և ցանկանում է դրանք ներկայացնել հանրությանը:

«Վեց ամիս տառապել եմ, բայց ստացա այն, ինչ պետք էր: Ես ստացա նաև 2008 թվականին ստորագրված պայմանագիրը, ըստ որի, երեք անգամ պետք է թանկանար գազը, և իրականությունն այն է, որ հինգ անգամ գազը թանկացել է: Հինգ անգամ գազը թանկացել է, և ընդամենը մեկ անգամ է ժողովուրդը տեղյակ եղել թանկացման մասին»,- հայտարարեց ընդդիմադիր խմբակցության ներկայացուցիչը: Պատգամավորը, հիմնվելով տեղեկատվության  ու ժամանակագրության վրա, վստահ հայտարարեց, որ դա եղել է մաքուր քաղաքական խաղ, որը կապված է եղել վերջին երեք ընտրությունների հետ, և ամբողջ գործընթացը գաղտնի է պահվել Ազգային ժողովից, ժողովրդից ու անգամ Հանրապետական կուսակցությունից:

Արամ Մանուկյանի ներկայացմամբ, 2008 թվականին, ընտրություններից մի քանի ամիս հետո, պայմանագիր է կնքվել, որով հինգ տարվա մեջ երեք անգամ պետք է թանկանար գազը՝ հասնելով մինչև 200 դոլարի 1000 խմ-ի համար: Նա նաև հավելեց, որ պայմանագրում եղել է կետ, որը թույլ է տվել, որ բացի այս պայմանավորվածությունը, դարձյալ կարելի է թանկացնել, որը կապված կարող էր լինել նվազագույն ջերմատվության հետ: «2010 թվականից մենք մուծում ենք 180 դոլար 1000 խմ-ի համար: 2011 թվականի մաքսային թվերով մենք պետք է մուծեինք 205, պառլամենտի ընտրություններից հետո միանգամից 244 դոլար: Երկու ընտրություններին` և խորհրդարանական, և նախագահական, հաջորդել է գազի կտրուկ թանկացում: 2013 թվականի պրեզիդնետի ընտրությունների ժամանակ բացառում են որևէ թակացում, որևէ գործարք, որևէ փաստաթուղթ, որի հիման վրա պետք է թանկանար գազը: Մենք անցյալ տարի ունեինք ինֆորմացիա, որ 20 տոկոսը աճուրդի առարկա է, հարցրինք կառավարությանը՝ կա՞ էդպիսի բան, ասեցին՝ ոչ, չկա»,- հայտարարեց ընդդիմադիր պատգամավորը:

Արամ Մանուկյանը հիշեցրեց իշխանության բարձրագույն ներկայացուցիչների խոսքերը, որոնք գազի գնի թնակացումը հերյուրանք ու բամբասանք էին համարում: 2013 թվականի նախագահական ընտրություններից հետո, նրա խոսքով, ստորագրվել է գազի գինը ապրիլին թանկացնելու մասին պայմանագիր, բայց քանի որ առջևում Երևանի ավագանու ընտրություններ են եղել, սա գաղտնի է պահվել:

«Ավագանու ընտրություններից 14 օր հետո Տիգրան Սարգսյանը պաշտոնական փաստաթղթով մտնում է գների կոմիտե, փաստաթուղթն ինձ մոտ է, գները թանկացնելու համար, 270 դարձնելու համար: Գազի գինը թանկացված է ապրիլի մեկից, պայմանագիրն ստորագրվել է մարտի 29-ին, բայց քանի որ կային ավագանու ընտրություններ, պետք էր ձգել, որ Տիգրանը մտներ գինը թանկացնելու համար: Գինը թանկացրել են՝ հասցնելով 270 դոլար, բայց այս ամբողջ ընթացքում երբեք ՀայՌուսգազարդը չի մուծել այն գներով, ինչ գնեով այս պայմանագրերն են, այս ստորագրություններն են: Անընդհատ մուծել է 180 դոլարի չափով, մնացածը անընդհատ պարտք է կուտակվել՝ փոխադարձ համաձայնությամբ: Հայկական կողմի խնդրանքով է եղել, որ չավելանա գինը, որովհետև դա կարող էր սոցիալական բունտ առաջացնել: Վարչապետը մասնավորապես, վերջին գրությամբ պաշտոնապես կառավարության որոշումով գրում է, որ 30 տոկոս տարբերությունը ինքը պետք է մուծի կառավարության միջոցներից: Չի մուծել, առաջացել է 300 մլն դոլարի պարտք»,- ասաց նա:

Շարունակելով ներկայացնել իր թղթապանակի տվյալները` Արամ Մանուկյանը նշեց, որ 162 մլն դոլար նախորդ տարի է պարտք կուտակվել, իսկ այս տարվա երրորդ եռամսյակում՝ 100 մլն դոլար, հիմա մոտավորապես 130 մլն դոլար: «Պարտքը մերոնք վճարել են միայն 20 տոկոսով՝ 155 մլն դոլարի փոխարեն: Ինչպե՞ս են մուծելու այս տարվա պարտքը 130 մլն դոլարը, ոչ մեկը չգիտի: Պայմանագրի մեջ կան կետեր, որ ամեն ամսվա գումարը ամենաուշը պետք է մուծվեր հաջորդ ամսվա վերջին, պլյուս հինգ օր: Եվ չեն մուծել, առաջացած գումարները, մանսավորապես վերջին ընտրություններից հետո, կազմում են ամիսը ամեն 1000 խմ-ի համար 70 դոլար: Սրանք պաշտոնական թվեր են, և այսպես գումարները կուտակվել են: Ռուսական կողմն իրավունք ուներ այս պայմանագրի համաձայն և տուգանքներ ավելացնել, և անջատել գազը: Կա կետ, որով ասվում է, որ չմուծելու դեպքում ինքը պարտավորվում է գազ չմատակարարել հայկական կողմին: Մերոնք բնականաբար, ասել են՝ մի անհանգստացեք, մենք ունենք սեփականություն, մենք ձեզ տալիք բաներ ունենք, կտանք: Մյուս զավեշտը, թե ինքչան են գնահատել գինը մեր տալիքի, ոչ թե գնահատել են ապրանքը, Հայաստանի սեփականությունը, այլ ասել են՝ եղբայր, քո պարտքն էսքան է, մենք գնահատում ենք քո պարտքը: Ղումար խաղալու ժամանակ եթե ժամացույցդ տաս, այն 50 ռուբլի է, քեզ ասում են՝ ես հինգ ռուբլի եմ գնահատում, և դու պարտավոր ես տալ այն գնով, ինչ գնով քեզ հաղթել են: Եվ Հայաստանն իր 250 մլն դոլարանոց արժեքը տվել է 155 մլն դոլարի փոխարեն, նվազագույնը 100 մլն դոլար պակաս: Արդյունքում՝ գազը չի կտրվել հենց այդ պայմանով, որովհետև ասել են՝ կտանք, ինչ ուզում եք, միայն գազը չկտրեք, միայն թե չբացահատեք, որ թալանում ենք ժողովրդին, պարտքեր ենք կուտակում Հայաստանի սեփականության հաշվին»,- հայտարարեց Արամ Մանուկյանը:

Խորհրդարանականի խոսքով, հայկական կողմն այդ սեփականությունը տալու իրավունք չուներ, քանի որ դա Փակ բաժնետիրական ընկերություն է, իսկ նման դեպքերում համաձայնությունը պետք է հաստատի խորհրդարանը: «Բաժնետիրական ընկերությունների կանոնադրությունն այսպիսին է՝ ով որքան կապիտալ ներդրում արել է, այնքան մասով պետք է ռիսկեը, օգուտները, կորուստները բաժանվեն, բայց ոչ թե 20 տոկոսանոց մասնաբաժնի տերը` հայ ժողովուրդը, պետք է 100 տոկոսով վարձահատույց լինի ՓԲԸ-ի, մասնավոր կառույցի առաջացրած պարտքի համար: Արդյունքում սա նշանակում է, որ մենք ոչ թե 1000 խմ գազի համար վճարել ենք 189 դոլարով, այլ շատ ավելի թանկ, որովհետև մենք պարտքի փոխարեն տվել ենք մեր սեփականությունը, որն արժեցել է ոչ թե 155 մլն դոլար, այլ նվազագունը 260 մլն դոլար»,- հավելեց նա: