Արդյոք «Ռոֆերոն-Ա»-ն տրամադրվո՞ւմ է լեյկոզով տառապող բոլոր հիվանդներին
Թարթիչաբջջային լեյկոզով (волосатый клеточный лейкоз) տառապող հիվանդներին արդեն տրամադրվում է «Ռոֆերոն-Ա» դեղամիջոցը: Այս մասին Panorama.am-ի թղթակցին հայտնեց ՀՀ առողջապահության նախարարության դեղորայքային քաղաքականության բաժնի պետի ժամանակավոր պաշտոնակատար Անահիտ Մկրտչյանը:
Նշնենք, որ Panorama.am-ը պարբերաբար անդրադարձել է թարթիչաբջջային լեյկոզով հիվանդների խնդրին, ովքեր գրեթե մեկ տարի է Յոլյանի անվան Արյունաբանական կենտրոնից չեն կարողանում ստանալ իրենց համար կենսական նշանակություն ունեցող «Ռոֆերոն-Ա» դեղամիջոցը, որը նրանց տրամադրվում է անվճար` պետպատվերի շրջանակներում:
Մեր հրապարակումներից հետո առողջապահության նախարարությունը սկսեց որոշակի քայլեր ձեռնարկել: Դեղամիջոցը ձեռք բերելու նպատակով նախարարությունը դիմեց ներկրող կազմակերպություններին, որպեսզի կարողանան նախարարությանը մատակարարել
«Ռոֆերոն-Ա»-ն:
Ա.Մկրտչյանի խոսքերով` առողջապահության նախարարությունը մրցույթ է հայտարարել, որի արդյունքում հաղթող է ճանաչվել «Ցիտո ֆարմ» ընկերությունը: Ըստ նրա` ընկերությունն արդեն իսկ ներկրել է 70 սրվակ դեղ, որն ամբողջությամբ տրամադրվել է Արյունաբանական կենտրոնին: «15 օրից ավելի է դեղը հատկացրել ենք կենտրոնին: Մեզ զանգահարած հիվանդներին ևս այդ մասին տեղակացրել ենք»,- ասաց նա:
Ա.Մկրտչյանը հայտնեց նաև, որ «Ռոֆերոն-Ա»-ի հաջորդ խմբաքանակը մոտ օրերս արդեն կլինի Հայաստանում: «Հիմա հերթական ներկրումն է իրականացվում, մաքսազերծման փուլում է գտնվում: Պարզապես ներկա պահին փաթեթավորման հետ կապված խնդիրներ են առաջացել: Կապ ենք հաստատել «Հոֆֆման լյա Ռոշե» ընկերության հայաստանյան ներկայացուցչության և արտադրողի հետ: Խոստացել են 1-2 օրվա ընթացքում խնդիրը շտկել: Կարծում եմ` մեկ շաբաթվա ընթացքում մնացած խմբաքանակն արդեն Հայաստանում կլինի»,- նշեց Ա.Մկրտչյանը:
Նա վստահեցրեց, որ հաջորդ տարի թարթիչաբջջային լեյկոզով հիվանդները դեղի հետ կապված որևէ խնդիր չեն ունենա: «Տարվա պահանջարկը 1114 սրվակ է, և դա ամբողջությամբ կլինի»,- ասաց նա:
Մենք կապ հաստատեցինք հիվանդներից մեկի հետ` պարզելու, թե արդյոք Արյունաբանական կենտրոնից ստացել է իրեն հասանելիք դեղը:
Հարցը անակնկալի բերեց հիվանդ կնոջը: Նա ասաց, որ ինքն այդ մասին տեղյակ չէ: «Ես պարբերաբար զանգահարում եմ կենտրոն, բայց պատասխանում են, որ դեղ դեռ չունեն, իսկ լինելու դեպքում իրեն այդ մասին կհայտնեն»,- ասաց նա, և նույն պահին էլ զանգահարեց կենտրոնի բժիշկներից մեկին: Վերջինս հաստատեց մեր տեղեկությունը` ասելով, որ յուրաքանչյուր հիվանդի այս պահին տրամադրում են ընդամեն երկու սրվակ դեղ: Խոստացան, որ այսօր նրան կտրամադրեն «Ռոֆերոն-Ա»-ն:
Հարց է առաջանում, թե ինչո՞ւ մինչ օրս տեղյակ չէին պահում հիվանդին, և արդյոք բոլոր հիվանդները գիտե՞ն, որ իրենց կյանքի համար անհրաժեշտ դեղամիջոցն արդեն կարող են ստանալ Արյունաբանական կենտրոնից:
Նշենք նաև, որ թարթիչաբջջային լեյկոզը հազվադեպ հանդիպող հիվանդություն է. 10 հազար հիվանդից միայն 1-ի մոտ է ախտորոշվում HCL-ը (Hairy Cell Leukemia ): Հայաստանում թարթիչաբջջային լեյկոզով հիվանդ է ավելի քան 50 մարդ:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
