Ձեր վստահելի աղբյուրը

Բազմակազմ դասարաններում ավելի դժվար է աշխատել, քան սովորական դասարաններում: Սա է պատճառներից մեկը, որ այժմ մանկավարժական բուհերը բազմապրոֆիլ ուսուցիչներ պատրաստելու մասին են մտածում:

Panorama.am-ի թղթակցի հետ զրույցում Հայաստանի պետական մանկավարժական համալսարանի Մասնագիտական կրթության և կիրառական մանկավարժության ամբիոնի վարիչ Աիդա Թոփուզյանը հայտնեց, որ բուհն այժմ աշակերտական տարբեր համակազմով դասարանների ուսուցիչ է պատրաստում, քանի որ հարցը առանձնահատուկ վերաբերմունք և մոտեցում է պահանջում:

Նա նկատեց, որ ըստ ուսուցման նյութի, ուսուցիչը պետք է կարողանա մի դասարանում նստած տարբեր տարիքի և գիտելիքի տարբեր մակարդակներով երեխաների հետ աշխատել: «Դա ամեն մի ուսուցչի խելքի բանը չէ: Ուսուցման մեթոդները նույն են, սակայն բազմակազմ դասարանը մյուսներից ամբողջությամբ տարբերվում է»,- ասաց Աիդա Թոփուզյանը:

Մանկավարժական համալսարանում, օրինակ, ֆիզիկները, քիմիկներն ու մաթեմատիկոսներն արդեն որպես բազմապրոֆիլ ուսուցիչներ են պատրաստվում: Մի ուսուցիչը, որը մաթեմատիկա է պարապում, պատրաստ կլինի դասավանդել նաև քիմիա և ֆիզիկա: «Գյուղական և հատկապես սահմանամերձ դպրոցների համար դա շատ կարևոր է, որովհետև աշակերտության թիվը քիչ է, դասարանների թիվը քիչ է, իսկ ուսուցչի դրույքը չի կոմպլեկտավորվում: Այս դեպքում, երբ մի ուսուցիչը կարողանա համարժեք մի քանի առարկա դասավանդել, և դրույքի հարցը կլուծվի, և երեխայի ու դպրոցի»,- ասաց նա:

Մեթոդները բոլոր դպրոցներում նույնն են, պարզապես, ըստ նրա, շատ ուսուցիչներ չեն կարողանում ավանդական մեթոդներին զուգահեռ օգտագործել նաև ինտերակտիվ մեթոդներն ու մանկավարժական նոր տեխնոլոգիաները: «Մի մասն էլ այնպիսի նկատառումներ է անում, թե, իբր, մերժված են ավանդական մեթոդները և միայն նորերը պետք է կիրառել: Այդպիսի բան չկա: Ուսուցիչը նյութից և թեմայից ելնելով, պետք է ինքը որոշի որ մեթոդն օգտագործել: Ոչ մեկը չի ասել ավանդական մեթոդները գցեք աղբարկղը, միայն ինտերակտիվ մեթոդներով աշխատեք: Նայած, թե դու ինչ խնդիր ես դնում քո առջև»,- ասաց Աիդա Թոփուզյանը:

Մասնագետը նկատեց, որ եթե ուսուցիչը նպատակ ունի հաղորդակցական ունակությունները զարգացնել, չի կարող դա ավանդական մեթոդներով անել, անպայման պետք է արվի համագործակցային մեթոդներով:

Ինչ վերաբերում է նոր մեթոդներին ծանոթ լինելուն և տիրապետելուն, Աիդա Թոփուզյանը նկատեց, որ ուսուցիչների մասսայական վերապատրաստում է եղել. «Արդեն նայած ով ինչպես է մասնակցել այդ վերապատրաստմանը: Սա արդեն նախարարության խնդիրն է»:

Նա ընդգծեց, որ գյուղական և հատկապես սահմանամերձ դպրոցներին հատուկ ուշադրություն է պետք. «Բոլոր նրանք, ովքեր զբաղվում են մանկավարժական հարցերով, պիտի իրենց պարտքը տան այդ դպրոցների առջև: Նրանք այնպիսի պայմաններում են ապրում և աշխատում, որ ինչ էլ անենք նրանց համար քիչ է»:

Կարդացեք նաև`

«Հեշտ ձևն ենք ընտրում` գրատախտակ, կավիճ ». Բազմակազմ դասարաններում ուսուցման մեթոդների խնդիր կա

«Կոմպլեկտավորած դասարանում ուսման որակի հերն անիծվում է». Դպրոցի տնօրենը զենքերը վայր չի դնում

Եթե ուսուցիչը դասի նպատակը ճիշտ չի ընտրել, հաստատ ոչ մի մեթոդ նրան օգնել չի կարող. Դպրոցի տնօրեն