Ձեր վստահելի աղբյուրը

«Մարդու իրավունքների պաշտպանը չի ասում, որ Հայաստանի Հանրապետությունում բոլոր դատավորները կաշառակեր են, նա չի ասում, որ Հայաստանի Հանրապետությունում բարեխիղճ դատավորներ չկան: Նա ասում է, որ իր հարցումների արդյունքում նման իրավիճակ կա», -Panorama.am-ի թղթակցի հետ զրույցում մեկնաբանելով դատական համակարգին վերաբերող Մարդու իրավունքների պաշտպանի արտահերթ զեկույցը, ասաց ԱԺ պատգամավոր, նախկին փաստաբան Էդմոն Մարուքյանը:

Նրա գնահատմամբ, Մարդու իրավունքների պաշտպանի զեկույցը իրավապաշտպան զեկույց է և այն չի կարող ամբողջությամբ լինել փաստարկված: «Երբ կոռուպցիայի վերաբերյալ հարցումներ են արվում, ապա այդ պարագայում շատ բարդ է փաստերի լեզվով խոսելը և փաստեր ներկայացնելը», -ասաց պատգամավորը` միևնույն ժամանակ նկատելով, որ Մարդու իրավունքների պաշտպանի արտահերթ զեկույցում առանձին գործեր, այնուամենայնիվ, նշված են եղել:

Մարուքյանի կարծիքով, այն խնդիրներն ու հարցերը, որոնք ներկայացվել են Պաշտպանի զեկույցում, պետք է լրջորեն քննարկվեն ու դրանց լուծումներ տրվեն: Ի վերջո, ըստ Մարուքյանի, զեկույցում նշվածը նորություն չէ և միջազգային տարբեր կառույցների կողմից հրապարակված զեկույցներում նշվել է, որ Հայաստանի արդարադատության համակարգը ունի խնդիրներ:

ՄԻՊ արտահերթ զեկույցում բարձրաձայնվում էր, որ դատական համակարգում կոռուպցիայի գոյության մասին ու նշվում կաշառքի սակագները: Հարցին, թե արդյոք Մարուքյանն իր փաստաբանական գործունեության ընթացքում նման երևույթի հանդիպել է, պատգամավորը պատասխանեց. «Ես դասական փաստաբանություն եմ արել և բրոկեր չեմ աշխատել ու չեմ կարող ասել, թե ինչ գներ են եղել: Դրա համար կան այդ ոլորտի հմուտ մասնագետներ, որն էլ փաստաբանական համայնքի ցավն է. մարդը փաստաբանություն չի անում, այլ միջնորդի դեր է կատարում: Բայց նման խոսակցություններ եղել են ու կան: Իսկ այդ ուղղությամբ քայլեր պետք է արվեն: Օմբուդսմենի զեկույցը նրա համար է, որ նշվածի ուղղությամբ քայլեր կատարվեն»:

Հայաստանի գլխավոր դատախազության արձագանքը, Մարուքյանը սպասելի ու բնական է համարում, քանի որ ցանկացած հրապարակային փաստաթուղթ կարող է դիտվել հաղորդում հանցագործության մասին: «Դատախազության կողմից կա առաջարկ ներկայացնել փաստեր և վստահեցում, որ գաղտնիությունը կապահովվի: Հիմա պետք է սպասենք, տեսնենք` օմբուդսմենը փաստեր կներկայացնի՞, թե՞ ոչ», -հավելեց Էդմոն Մարուքյանը:

Նախորդող հրապարակումներ.

Դատավորների միության խորհուրդը ՄԻՊ-ի զեկույցը համարում է հակապետական. Հայտարարություն

ՀՀ Գլխավոր դատախազը Պաշտպանին առաջարկել է առնվազն մեկ փաստ ներկայացնել դատախազությանը. Նամակ` ՄԻՊ-ին

Վճռաբեկ դատարանում կաշառքի չափը հասնում է 50 հազար ԱՄՆ դոլարի. ՄԻՊ արտահերթ զեկույց (տեսանյութ)

Ում, ինչպես և դատական որ փուլում են կաշառք տալիս դատավորներին. Պաշտպանի սենսացիոն բացահայտումը (Տեսանյութ)

Ովքեր են ամենասիրված ու ամենաչսիրված դատավորները

ՄԻՊ-ը կանխակալ վերաբերմունք է քարոզում դատարանների հանդեպ. Արսեն Բաբայան