«Խայտառակությունից հետո ո՞վ կմնար». Պարարվեստի քոլեջի նախկին տնօրենը ընտանիքի հետ միասին արտագաղթել է Հայաստանից
Պարարվեստի պետական քոլեջի նախկին տնօրեն Արմեն Գրիգորյանը, որը մշակույթի նախարար Հասմիկ Պողոսյանի հրամանով հեռացվել էր աշխատանքից, ընտանիքի հետ միասին արտագաղթել է Հայաստանից:
«Խայտառակությունից հետո ո՞վ կմնար: Չստուգված փաստերով մի քանի հեռուստաընկերություններ հայտարարում են, թե պարարվեստի քոլեջի տնօրենը ծեծել է 14 տարեկան երեխային: Բայց այդպես կարելի՞ է: Կարելի էր չէ՞ ճշտել, ստուգել փաստերը և նոր միայն տեղեկություն տարածել», Panorama.am-ի թղթակցի հետ զրույցում նշում է Պարարվեստի պետական քոլեջի նախկին տնօրենի կինը` Մարինա Գրիգորյանը, որը նաև քոլեջում մանկավարժ-պարուսույց էր:
Գրիգորյանների ընտանիքը այժմ հաստատվել է Դոնի Ռոստովում: Արմեն Գրիգորյանն այնտեղ օպերային բալետի խմբի հետ է աշխատում: Մի քանի օր է, ինչ գնացել են, բայց խմբի հետ միասին սկսել են «Շելկունչիկ» բեմադրել: Տիկին Գրիգորյանն ասում է` Պարարվեստի պետական քոլեջում մանուկների հետ իրենց այդպես էլ չհաջողվեց «Շելկունչիկ» բեմադրել, չնայած նրան, որ նման ծրագիր իրենք ունեին: «Այստեղ 4 տարի պայքարել ենք, որ մեր երեխաները մանկական շելկունչիկ բեմադրեն: Բայց Խառատյանը վերցրեց ու ասաց, որ Օպերան պետք է բեմադրի: Դրանից անցել է չորս տարի, բայց մինչ այժմ «Շելկունչիկ» բեմադրված չէ», -նշում է տիկին Գրիգորյանը:
Նկատենք, որ Մարինա Գրիգորյանի նշած Խառատյանը ՀՀ ժողովրդական արտիստ, Ազգային օպերային թատրոնի գլխավոր բալետմայստեր Ռուդոլֆ Խառատյանն է
Panorama.am-ը Պարարվեստի պետական քոլեջի նախկին տնօրեն Արմեն Գրիգորյանի հեռացման և դրա պատճառների վերաբերյալ մի քանի հրապարակումներ արել էր: Տեղեկություններ էին տարածվել, թե Արմեն Գրիգորյանը ծեծել է քոլեջի 14-ամյա սաներից մեկին և դրանից հետո մշակույթի նախարարը որոշել է հեռացնել նրան աշխատանքից: Սակայն Մշակույթի նախարար Հասմիկ Պողոսյանը Panorama.am-ին ասել էր, որ Արմեն Գրիգորյանը աշխատանքից հեռացվել է աշխատանքում ինչ-ինչ թերացումների պատճառով:
Մեր զրուցակիցը պատմում է, որ Արմեն Գրիգորյանը ցանկալի տնօրեն չի եղել Մշակույթի նախարարի համար, այդ պատճառով էլ ամեն միջոց օգտագործել է, որպեսզի նրան հեռացնի աշխատանքից: Նրա խոսքով, քոլեջի աշխատանքը խանգարող տարբեր խնդիրների վերաբերյալ Արմեն Գրիգորյանը բազմաթիվ անգամ դիմել է նախարարություն, սակայն դրանց որևէ մեկը չի արձագանքել:
«Մշակույթի նախարարը մեր դպրոց մտել է մի անգամ, այն էլ վարչապետի հետ եկել էին վերանորոգման աշխատանքներին ծանոթանալու համար: Վերջ: Նա մեզանով չի հետաքրքրվել ու քոլեջի խնդիրներին հաղորդակից չի եղել: Արմեն Գրիգորյանը զանգում էր, նամաներ էր գրում այն մասին, որ քոլեջն ունի այս-այս խնդիրը, բայց փոխարենը նախարարն ասում էր, որ Արմեն Գրիգորյանն իրեն անհանգստացնող տնօրեն է եղել», -պատմում է Մարինա Գրիգորյանը և նշում, որ Արմեն Գրիգորյանին աշխատանքից հեռացնելու մասին որոշումը վաղուց ծրագրված է եղել և դրան ընդառաջ առաջին նկատողությունը Գրիգորյանը նախարարի կողմից ստացել է հետևյալ պատճառաբանությամբ` ինչու քոլեջի տնօրենը չի պատասխանում հեռախոսազանգերին:
Գրիգորյանն ասում է, որ թե երեխաները, թե ծնողները հորդորել են իրենց մնալ, շարունակել ստեղծագործել այստեղ, բայց իրենք չեն համաձայնում: «Այս խայտառակությանը հնարավոր չէ դիմանալ: Այս երկիրը արվեստագետների համար չէ: Մենք ցանկանում էինք ուսումնարանում որակյալ ուսուցում զարգացնել, մենք լավ հիմքերի վրա էինք դրել այստեղ կրթությունը: Մենք ոչ միայն պարել էինք սովորեցնում, այլ նաև կուլտուրա էինք փոխանցում: Վստահ եմ, որ կգտնվի մեկը, որը կհերքի իմ ասած ամեն բառը, և դա հասկանալի է, դա նրա գործն է: Ինչևէ, մենք մեր ազնվությունը տանում ենք մեզ հետ` թողնելով իրենց ստի ու կեղծիքի մեջ»,- ասում է Մարինա Գրիգորյանը:
Նախորդող հրապարակումներ`
Պարարվեստի քոլեջի տնօրենը աշխատանքից ազատվել է երկու պատճառով. Մանրամասնում է մշակույթի նախարարը
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
