ԱՄՆ Պետդեպ. Ձգձգվող հակամարտությունների կարգավորումը պետք է կարևոր տեղ զբաղեցնի ԵԱՀԿ-ի օրակարգում

Տարածաշրջան 17:21 13/12/2013

ԱՄՆ Պետդեպ. Ձգձգվող հակամարտությունների կարգավորումը պետք է կարևոր տեղ զբաղեցնի ԵԱՀԿ-ի օրակարգում

Ձգձգվող հակամարտությունների կարգավորման ուղղությամբ կոնկրետ և իրական քայլերը պետք է կարևոր տեղ զբաղեցնեն ԵԱՀԿ-ի օրակարգում: Կազմակերպությունը պետք է շարունակի կարևոր դեր խաղալ ԵԱՀԿ-ի տարածքում ձգձվող հակամարտությունների կարգավորման գործում: Այս մասին ասված է ԱՄՆ պետքարտուղարության տարածած հաղորդագրության մեջ:

«Հայաստանի և Ադրբեջանի արտգործնախարարները հանդիպել են Կիևում, որպեսզի շարունակեն Լեռնային Ղարաբաղի հակամարտության կարգավորման շուրջ երկխոսությունը: ԱՄՆ-ի, Ռուսաստանի ու Ֆրանսիայի պատվիրակությունների ղեկավարների հետ նրանց համատեղ հայտարարությունը, որը հավանության է արժանացել ԵԱՀԿ նախարարների խորհրդի կողմից, հուսադրող գործոն է խաղաղ կարգավորման ուղղությամբ առաջընթաց գրանցելու մեր ընդհանուր պարտավորության լույսի ներքո»,- հայտարարել է ԱՄՆ պետքարտուղարությունը:

Հիշեցնենք, որ դեկտեմբերի 5-ին Կիևում կայացել է Հայաստանի արտգործնախարար Էդվարդ Նալբանդյանի, Ադրբեջանի արտգործնախարար Էլմար Մամադյարովի, ԵԱՀԿ Մինսկի խմբի համանախագահներ Իգոր Պոպովի, Ժակ Ֆորի, Ջեյմս Ուորլիքի և ԵԱՀԿ գործող նախագահի անձնական ներկայացուցիչ Անջեյ Կասպրչիկի հանդիպումը: Ընդունվել է համատեղ հայտարարություն, որում համաձայնվել են մինչև օրս ձեռք բերվածի հիման վրա շարունակել Լեռնային Ղարաբաղի հակամարտության արդարացի և խաղաղ լուծմանը միտված աշխատանքները:

Նախորդող՝
Համանախագահող երկրների պատվիրակությունների ղեկավարները Լեռնային Ղարաբաղի հակամարտության վերաբերյալ հայտարարություն են ընդունել

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: