Ձեր վստահելի աղբյուրը

«Երկու խորհրդարանների նախագահների մասնակցությունը համաժողովին վկայում է մեր պետությունների միջև միջխորհրդարանական կապերն էլ ավելի ամրապնդելու և ընդլայնելու երկուստեք պատրաստակամության մասին»,- «Հայ-վրացական միջխորհրդարանական համագործակցության հեռանկարները» խորագրով խորհրդաժողովի մասնակիցներին ողջունելով հայտարարել է ԱԺ նախագահ Հովիկ Աբրահամյանը: Նշենք, որ համաժողովին ներկա է նաև նրա վրաց գործընկեր, Վրաստանի խորհրդարանի նախագահ պարոն Ուսուպաշվիլին:

Հ.Աբրահամյանի խոսքով, Հայաստանի և Վրաստանի միջև բարեկամական հարաբերությունները բազմադարյա պատմություն ունեն՝ հիմնված բարի կամքի դրսևորման և փոխադարձ հարգանքի վրա.

«Մեր երկու ժողովուրդներին միավորում են նաև մշակութային և հոգևոր ընդհանրությունները, ինչպես նաև մշակութային ժառանգության հանդեպ պետությունների հոգատար վերաբերմունքը: Մեր երկու երկրները մշտապես առաջնորդվել են համամարդկային արժեհամակարգով, և մենք հանձնառու ենք շարունակելու բարեփոխումները ժողովրդավարության ամրապնդման և մարդու իրավունքների ապահովման ուղղությամբ»,- ընդգծել է ԱԺ նախագահը:

Անդրադառնալով անկախությունից հետո Հայաստանի և Վրաստանի միջև հարաբերություններին, Հ.Աբրահամյանը նշել է, որ դրանք հասել են բարձր մակարդակի, ինչը կայուն հիմք է հանդիսանում փոխշահավետ համագործակցության դինամիկ զարգացման համար:
«Ինչպես ձեզ հայտնի է, Հայաստանը նախաձեռնել է ՀՀ հյուսիսային 3 պետական սահմանակետերի՝ Բավրայի, Գոգավանի, Բագրատաշենի անցակետերի արդիականացման համապարփակ ծրագիր՝ շուրջ 60 միլիոն եվրո արժողությամբ. նոր անցակետերի շինարարությունը մեկնարկել է 2013թ. սեպտեմբերին: Շինարարական աշխատանքների իրականացման հարցում անհրաժեշտ էր սերտ համագործակցություն վրացի գործընկերների հետ, մասնավորապես Բագրատաշենի նոր կամուրջի շինարարության հարցում, ինչպես նաև Բավրա անցակետի ճանապարհային հանգույցի տեղի ընտրության հարցում: Ցավոք, այս հարցերում դեռևս չկա լիարժեք համագործակցություն: Տվյալ փուլում անհրաժեշտ է համաձայնության հասնել անցակետերի հատվածների շինարարության հարցում: ՀՀ կառավարությունը առաջիկայում քննարկում կունենա վրացի գործընկերների հետ այդ հարցերի շուրջ»,- նշել է բանախոսն ու ավելացրել, որ քաղաքական երկխոսության բարձր մակարդակը լայն հնարավորություններ է ընձեռում արտաքին քաղաքականության ոլորտում երկու պետությունների միջև կառուցողական համագործակցության համար՝ ելնելով Հայաստանի և Վրաստանի համար սկզբունքային նշանակություն ունեցող խնդիրներից:

«Հայկական կողմը մեծապես կարևորում է միջխորհրդարանական կապերի դերը միջպետական հարաբերությունների զարգացման գործում: Այս համատեքստում մեծ նշանակություն եմ տալիս խորհրդարանական համագործակցության հանձնաժողովների գործունեությանը: Ժամանակին մեր խորհրդարաններում գործում էին նման հանձնաժողովներ, ինչը բնորոշ է միայն ռազմավարական գործընկերությանը, սակայն հանձնաժողովների գործունեությունը օբյեկտիվ պատճառներով դադարեցվեց: Հայկական կողմը վերահաստատում է իր պատրաստակամությունը վերականգնել համագործակցության նշված ձևաչափը՝ ակնկալելով փոխադարձ նախաձեռնություն: Այդ քայլով մենք մեծապես կնպաստենք միջխորհրդարանական կապերի աշխուժացմանը՝ ճանապարհ հարթելով կենսական նշանակություն ունեցող այլ ոլորտներում ընդգրկուն փոխգործակցություն ծավալելու համար»,- հայտարարել է Հ.Աբրահամյանը և հավելելով հույս հայտնել, որ համաժողովը հիմք կհանդիսանա միջխորհրդարանական երկխոսության շարունակականության համար և ինչու ոչ` նաև արդյունավետ լինել միջազգային խորհրդարանական կառույցներում կողմերի համար կենսական նշանակություն ունեցող բանաձևերի քվեարկության ժամանակ համակարգված մոտեցումներ և միջազգային ատյաններում միմյանց թեկնածություններին փոխադարձ աջակցություն ցուցաբերելու առումով: