Ձեր վստահելի աղբյուրը

2013-ի ավարտին հաշվված օրեր են մնացել: Ինչպիսի՞ն էր տարին գյուղատնտեսության ոլորտի համար, ի՞նչ ձեռքբերումներ ու կորուստներ արձանագրեց նախարարությունը, որո՞նք են լինելու գերակա խնդիրները: 

Panorama.am-ի հարցերին պատասխանում է գյուղատնտեսության նախարար Սերգո Կարապետյանը:

-Անցող տարին ինչպիսի՞ն էր գյուղատնտեսության, գյուղի և գյուղացիների համար:

-Անցնող տարին հազվադեպ արդյունավետներից ու բերքառատներից էր: Ոլորտի բոլոր ճյուղերն ու ոլորտներն այն ամփոփում են աճի որոշակի ցուցանիշներով:

- Գո՞հ եք նախարարության աշխատանքից: Ի՞նչ չարեց նախարարությունը, որ կարող էր անել:

- ՀՀ գյուղատնտեսության նախարարությունն ամբողջությամբ և արդյունավետորեն իրականացրեց տարվա համար նախատեսված բոլոր ծրագրերն ու առաջադրանքները: Գործունեության նախատեսված ծրագրերի թերակատարում կամ ձախողում թույլ չի տրվել:

- Գյուղմթերքի մթերման, արտահանման առումով ի՞նչ ցուցանիշներ կան տարեվերջին, գոհացուցի՞չ են:

- Տարվա ամենակարևոր ձեռքբերումը գյուղատնտեսական արտադրանքի իրացման և արտահանման ծավալների նշանակալի աճն էր:

-Պարոն Կարապետյան, մատնանշեք 2013-ի 5 կարևոր ձեռքբերումները և բացթողումները: Ի՞նչ ակնկալիքներով եք մուտք գործում հաջորդ տարի, որո՞նք են հաջորդ տարվա մարտահրավերները, ի՞նչ սպասելիքներ պետք է ունենան գյուղացիները ձիու տարուց:

Մյուս կարևոր ձեռքբերումներից կարելի է առանձնացնել՝
-գյուղացի –պետություն կապի ամրապնդման ուղղությամբ կատարված որոշակի քայլերը,
-գյուղացու հոգեբանության մեջ լավատեսության վերականգնման հուսալի միտումները,
-պետական աջակցության մի շարք ծրագրերի շարունակականության ապահովումն ու ընդլայնումը ,
-վերամշակողների միությունների ստեղծումը: Հաջորդ տարվա համար նախատեսվում են նման միություններ` արտադրողների համար,
-կոոպերատիվ շարժման հիմնադրման գործում ապահովված դրական տեղաշարժը: Ստեղծվեցին առաջին գյուղատնտեսական կոոպերատիվները, որոնք արդեն հասնում են մի քանի տասնյակի:

- Գարնանը պատուհասած կարկուտի, դրա հետևանքով փչացած բերքի իրացման հետ կապված խնդիրների առաջ կանգնած գյուղացուն որքանո՞վ կարողացավ օգնել պետությունը, ի՞նչ դասեր քաղեցինք: Նման կարկուտի կրկնվելու դեպքում որքանո՞վ է պաշտպանված բերքը:

-Կարկուտի հետևանքով որակազրկված ամբողջ բերքը,նախարարության հետևողական վերահսկողության ներքո , ամբողջությամբ ընդունվել է վերամշակող ձեռնարկությունների կողմից: Հայաստանի գյուղատնտեսությունը լիովին գտնվում է բարձր ռիսկայնության գոտում: Բնականաբար, բնության քմահաճույքներն ու անակնկալներն անխուսափելի են:

- Վրաստան կարտոֆիլ արտահանելու հետ կապված վերջերս հաճախ են խնդիրներ առաջանում: Ի՞նչ պարզվեց, ի՞նչ քայլեր են ձեռնարկվում:

- Ինչպես կարտոֆիլի, այնպես էլ գյուղատնտեսական մյուս արտադրատեսակների արտահանման ողջ գործընթացը նախարարության ամենօրյա և գործնական վերահսկողության ներքո է: Իրացման շուկաների և երկրների հետ ծագող բոլոր խնդիրները լուծվում են հնարավորինս արագ և օպերատիվորեն: Վրաստանն այս առումով բացառություն չէ: Արդյունքում միայն կարտոֆիլի արտահանումն այդ երկիր նախորդ տարվա համեմատությամբ մի քանի անգամ աճել է:

2013-ի ընթացքում Panorama.am-ի` գյուղատնտեսության խնդիրների վերաբերյալ հրապարակումների ցանկ`

Սերգո Կարապետյան. Անհրաժեշտ է բնատնտեսությունից անցնել արտադրական տնտեսության

Բերբերյանն ամփոփում է. «Աշխատանքը գնահատվում է ոչ թե Թերլեմզյանի նկարչական ուսումնարանն ավարտելով, այլ լավ արդյունքներով»