Ձեր վստահելի աղբյուրը

 ԵԱՀԿ Մինսկի խմբի համանախագահները ակնկալում են, որ գալիք տարվա սկզբին տեղի կունենա Ադրբեջանի ու Հայաստանի նախագահների հանդիպումը: «Թուրան» գործակալությանն ու «Ամերիկայի ձայն» ռադիոկայանին տված հարցազրույցում այս մասին նշել է ԵԱՀԿ ՄԽ ամերիկացի համանախագահ Ջեյմս Ուորլիքը` մեկնաբանելով միջնորդների այս այցը տարածաշրջան ու իրավիճակը ղարաբաղյան կարգավորման շուրջ:

«Այս այցը մեր կանոնավոր այցերի բաղկացուցիչ մասն է: Ինչպես հայտնի է նոյեմբերի Վիեննայում կայացավ Հայաստանի և Ադրբեջանի նախագահների հանդիպումը:Մենք ցանկանում ենք, որ հանդիպումները նախագահների միջև շարունակվեն: Մենք ծրագրում ենք և ակնկալում ենք, որ նախագահների հերթական հանդիպումը տեղի կունենա հաջորդ տարվա սկզբին»,-ասել է Ջ. Ուորլիքը:
Այն հարցին, թե որտեղ և երբ է նախատեսվում երկու երկրների ղեկավարների հանդիպումը, Ուորլիքն ասել է, որ հանդիպման վայրն ու հստակ ամսաթիվը դեռ հայտնի չեն: «Սակայն, երկու երկրների արտգործնախարարները քննարկումներ են անցկացնում այդ թեմայի շուրջ, և, հուսով ենք, հարցը շատ շուտով կհստակեցվի» -ասել է նա:

Ինչպես նշել է ԵԱՀԿ ՄԽ ամերիկացի համանախագահը, նոյեմբերի 19-ին Վիեննայում կայացած հանդիպմանը կողմերի երկխոսությունը վերսկսվեց ու այն կարևոր է երկարատև կարգավորման հասնելու տեսակետից և արդեն իսկ դրական հետևանքները տեսանելի են:
Ջ. Ուորլիքի խոսքերով, մասնավորապես, նվազել է միջադեպերի ու մահացու դեպքերի քանակը շփման գծում: «Զգալիորեն մեղմացել է պետությունների ղեկավարների ռազմատենչ հռետորաբանությունը: Այս ամենը շատ կարևոր է երկխոսության հաստատման համար, կորուստների կրճատման ու լարվածության նվազեցման համար»,-ասել է Ուորլիքը:

Այն հարցին, թե կան արդյոք որևէ նոր առաջարկներ, որոնք Մադրիդյան սկզբունքների հիման վրա բանակցությունների համար խթան կհանդիսանային, Ուորլիքն ասել է. «Իհարկե, մենք նոր գաղափարների կողմնակիցներ ենք: Սակայն, ինչպես և ինչ ձևով կլուծվի այդ հարցը, կողմերը իրենք պետք է որոշեն: Մեր խնդիրն է օգնել նրանց: Եթե կողմերը ցանկանում են հարցերը լուծել այս շրջանակում, ապա մենք կարող ենք օգնել: Եթե նրանք դա ցանկանում են անել նոր ուղիների, ձևերի հիման վրա, ապա մենք կօգնենք նրանց դրանում»:
Ինչպես նշել է Ուորլիքը, և Երևանը, և Բաքուն ձգտում են այնպիսի լուծման, որը բխում է Հայաստանի ու Ադրբեջանի շահերից, և դրանց ելելով են կառուցում իրենց դիրքորոշումները: «Մենք որպես միջնորդներ կարգավորման այնպիսի տարբերակ ենք ցանկանում, որը կբխի բոլոր կողմերի շահերից»,-հայտարարել է ամերիկացի համանախագահը:

Վերջինիս խոսքերով, պատերազմը շատ թանկ է նստում երկու կողմերի վրա և խոսքը միայն մարդկային կորուստների մասին չէ: «Ոչ պատերազմ, ոչ խաղաղություն» վիճակից ձերբազատվելը կնպաստեր ներդրումների աճին, կնպաստեր երկու ժողովուրդների նյութական բարգավաճմանը: «Երևանում և Բաքվում կայացած բանակցություններում ես զգացի նախագահների նման ուղի գտնելու ցանկությունը, որը կապահովեր տևական խաղաղություն»,-ասել է Ուորլիքը:

Պատասխանելով այն հարցին, թե հնարավոր են արդյոք նոր նախաձեռնություններ ԱՄՆ կողմից, Ուորլիքը նշել է, որ ԱՄՆ համար հիմնական առաջնահերթությունը ԵԱՀԿ ՄԽ միջնորդությամբ ղարաբաղյան հակամարտության խաղաղ կարգավորումն է:
Անդրադառնալով հակամարտության կարգավորման մեջ Թուրքիայի դերին և խաղաղ կարգավորման գործընթացի վրա հայ-թուրքական սահմանի բացման ազդեցությանը՝ Ուորլիքն ասել է. «Թե ինչ դեր կարող է ունենալ Թուրքիան հակամարտության կարգավորման մեջ իմ իրավասության մեջ չի մտնում: Սակայն ինչ-որ պահի Թուրքիան կարող է որոշակի դեր կատարել»:

Մեկնաբանելով մի շարք փորձագետների այն կարծիքը, թե առանց Ռուսաստանի դիրքորոշման փոփոխության կարգավումը հնարավոր չէ, Ուորլիքը հայտարարել է, որ շատ լավ հարաբերություններ ունի ռուս համանախագահի հետ, որը երկար ժամանակ է զբաղվում է այս հարցով ու փորձառու դիվանագետ է:

«Ղարաբաղյան կարգավորման հարցում ԱՄՆ ու ՌԴ դիրքորոշումները համընկնում են: ԱՄՆ-ն, Ֆրանսիան ու ԵՄ-ն, որպես գործընկերներ, նույնպես հանդես են գալիս միասնական դիրքերից: Ինչ վերաբերում է նրան, թե ինչպես հասնել կարգավորման, ապա դա պետք է անեն հակամարտության կողմերը, ոչ թե ինչ-որ պետություն»,-ամփոփել է Ջեյմս Ուորլիքը: