Ձեր վստահելի աղբյուրը

 Մարդու իրավունքների եվրոպական դատարանը երեկ` դեկտեմբերի 17-ին վճիռ է կայացրել, համաձայն որի բավարարվել է Հայոց ցեղասպանությունը ժխտող թուրք քաղաքական գործչի ներկայացրած հայցը, ում նկատմամբ Շվեյցարիայում սահմանվել էր 9-օրյա կալանք կամ 3 հազար շվեյցարական ֆրանկ տուգանք:

Թուրքական բանվորական կուսակցության առաջնորդ Դողու Փերինչեկը հայց էր ներկայացրել ՄԻԵԴ` Շվեյցարիայում իր` կարծիք հայտնելու իրավունքը խախտելու համար, հայտնում է Asbarez պարբերականը:
ՄԻԵԴ-ը կայացված վճռի մեջ հայտնաբերել է 10-րդ հոդվածի խախտում՝ դրամական հատուցում չպահանջելով հայցվորի համար: Ըստ ՄԻԵԴ կայացրած վճռի`Հայոց ցեղասպանության ժխտումը հանցագործություն չէ:

«Զգայուն հարցերի վերաբերյալ բաց քննարկման իրավունքի ազատ դրսևորումը և հակառակ դիրքորոշում հայտնելու հնարավորությունը խոսքի ազատության իրավունքի հիմնարար դրույթներից են, և դրանով է հանդուրժողական ու բազմակարծիք ժողովրդավար հասարակությունը տարբերվում տոտալիտար կամ բռնատիրական ռեժիմներից», - ասվում է ՄԻԵԴ վճռի մեջ:

Հիշեցնենք, որ իրավաբանական գիտությունների դոկտոր և Թուրքական բանվորական կուսակցության առաջնորդ Դողու Փերինչեկը 2005 թ. Շվեյցարիայում մասնակցել է տարբեր խորհրդաժողովների, որտեղ հրապարակավ ժխտել է Հայոց ցեղասպանության փաստը: «Շվեյցարիա-Հայաստան» ասոցիացիան բողոք էր ներկայացրել Շվեյցարիայի դատարան 2005 թ. հուլիսին՝ պահանջելով քրեական գործ հարուցել Փերինչեկի դեմ: Լոզանի դատարանը 2007 թ. Փերինչեկին մեղավոր ճանաչեց ռասայական խտրականության մեջ: Դրանից հետո Փերինչեկը բողոք ներկայացերց ՄԻԵԴ իր իրավունքները խախտելու վերաբերյալ, հղում անելով Մարդու իրավունքների եվրոպական կոնվենցիայի մի շարք հոդվածների վրա, մասնավորապես, 7 հոդվածին (պատիժ բացառապես օրենքի հիման վրա), 10 (կարծիք հայտնելու ազատություն):
Նշենք, որ ՄԻԵԴ որոշումը վերջնական չէ և կարող է վիճարկվել 3 ամսվա ընթացքում:

Թուրքիան ավանդաբար հերքում է 20-րդ դարի սկզբին շուրջ 1.5 մլն հայերի զանգվածային ոչնչացման մեղադրանքները:

Հիշեցնենք, որ Հայոց ցեղասպանությունն (Armenian Genocide) արդեն ճանաչել և դատապարտել են Ուրուգվայը (1965թ.), Կիպրոսի Հանրապետությունը (1982թ.), Արգենտինան (1993թ.), Ռուսաստանի Դաշնությունը (1995թ.), Կանադան (1996թ.), Հունաստանը (1996թ.), Լիբանանը (1997թ.), Բելգիան (1998թ.), Իտալիան (2000թ.), Վատիկան (2000թ.), Ֆրանսիան (2001թ.), Շվեյցարիան (2003թ.), Սլովակիան (2004թ.), Հոլանդիան (2004թ.), Լեհաստան (2005թ.), Գերմանիան (2005թ.), Վենեսուելան (2005թ.), Լիտվիան (2005թ.), Չիլին (2007թ.), Շվեդիան (2010թ.): Հայոց Ցեղասպանությունը ճանաչել են նաև Վատիկանը, Եվրախորհուրդը և Եկեղեցիների համաշխարհային խորհուրդը: