«Հայաստանում թեև քաղցկեղով հիվանդացության դեպքերն աճում են, սակայն փոքր ինչ նվազել են մահացության դեպքերը»
2012թ-ի համեմատությամբ այս տարի Հայաստանում քաղցկեղով հիվանդացության դեպքերի աճ է նկատվում, սակայն մի փոքր նվազել են մահացության դեպքերը: Այս մասին այսօր լրագրողների հետ հանդիպման ժամանակ ասաց Հայաստանի ուռուցքաբանության ազգային կենտրոնի փոխտնօրեն Գագիկ Բազիկյանը` հավելելով, որ վերջնական թվերը հայտնի կլինեն միայն հաջորդ տարվա հունվար-փետրվարին:
Նրա խոսքերով` Հայաստանում տարեկան 8000 մարդ հիվանդանում է քաղցկեղով: Գագիկ Բազիկյանը հայտնեց, որ վերջին հինգ տարիների համեմատությամբ քաղցկեղով հիվանդացողների թիվը նվազել է: Մասնավորապես, եթե մինչև 2010 թ-ը տարեկան 2-4 %-ով հիվանդությունն աճում էր, ապա այսօր այն կազմում է 1 %: «Ես չեմ կարծում, որ հիմա քիչ են հիվանդանում, դա ավելի շատ կապում եմ արտագաղթի հետ»,- ասաց Գ.Բազիկյանը` հավելելով, որ Ուռուցքաբանության կենտրոնում ստացիոնալ պայմաններում տարեկան բուժում է ստանում մոտ 10 հազար հիվանդ, մոտ 3500-ը ենթարկվում է վիրահատության, 2000 հիվանդ ստանում է ճառագայթային բուժումը, իսկ մնացածն ստանում են քիմիոթերապիայի տարբեր կուրսեր:
Ըստ նրա` 2012թ-ին կենտրոնի հսկողության տակ գտնվել են քաղցկեղով հիվանդ 32 հազար մարդ, որից 15 հազարը ապրել են 5 և ավելի տարի բուժվելուց հետո: «Նրանք բուժվել են և պրակտիկ առողջ են, բայց գտնվում են դիսպանսեր հսկողության տակ»,- ասաց Գ.Բազիկյանը: Ուռուցքաբանը նկատեց, որ հիվանդությունը նախնական փուլերում հայտնաբերելը մեծապես նպաստում է դրա կանխարգելմանն ու բուժմանը։ «Նախաքաղցկեղային վիճակում գտնվող մարդուն փրկելու հավանականությունը մոտ է 100 տոկոսի, առաջին փուլում, երբ ուռուցքը 2 սմ մեծություն ունի՝ 90-92 տոկոսի: Մյուս երեք փուլերում արդյունավետությունը համապասխանաբար նվազում է»,- տեղեկացրեց բժիշկը:
Գ.Բազիկյանի խոսքերով, որքան շուտ հայտնաբերվի հիվանդությունը, այնքան բուժումն ավելի արդյունավետ կլինի: Մինչդեռ, հիվանդների 42-46 տոկոսը գալիս են արդեն հիվանդության վերջին փուլում: «Այդ պատճառով մենք չենք կարող ստանալ հաջող արդյունք, այլ միայն երկարացնում ենք հիվանդների կյանքը»,- ասաց նա:
Նա նշեց նաև, տարածվածության առումով առաջին տեղում թոքային քաղցկեղն է, որին հաջորդում է կրծքագեղձի, ստամոքսի, հաստ աղիքի, արգանդի վզիկի, ձվարանների, միզապարկի և շագանակագեղձի քաղցկեղը: Ի դեպ, ուռուցքաբանը նկատեց, որ 2008թ-ի համեմատ թոքի քաղցկեղի դեպքերը փոքր ինչ նվազել են, իսկ շագանակագեղձի, կրծքագեղձի և հաստ աղիքի քաղցկեղի դեպքերն աճել են:
Քաղցկեղի առաջացման պատճառները, ըստ Գ.Բազիկյանի, տարբեր են` սնունդը, սթրեսը, ոչ ճիշտ կենսակերպը:
Ուռուցքաբանը նշեց նաև, որ մեր երկրում հիվանդությունը երիտասարդանում է, բայց ահռելի թվերի չի հասնում, որի մասին խոսվում է:
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
